Exodus 1:1-22
1 Israel tiah auhmi Jakob cu Izipt ram a kal tikah a fapale nih anmahle an chungkhar cio he an zulh. Jakob fapale min cu:
2 Reuben, Simeon, Levi, Judah;
3 Issakhar, Zebulun, Benjamin;
4 Dan, Naftali, Gad le Asher an si.
5 Jakob tefa cu an dihlak ah 70 an si, Josef cu Izipt ram ah a rak um cang.
6 A donghnak ah Josef cu a thi, a unau hna le cu chan mi vialte zong an thi dih cang.
7 Israel mi* cu tefa an ngei i an karh chin lengmang. Khulrang in an karh i an ṭhawn tuk caah ram chung ah a khah in an khat.
8 A hnuah Izipt ram ah Josef a hngal lomi siangpahrang thar pakhat a hung bawi.
9 A mi pawl kha “Zoh hmanh u! Israel mi cu kanmah nakin an tam deuh i an ṭhawng deuh cang.
10 Cucaah an karh chin lengmang ti nakhnga lo an cung ah fimzer ngai in thil tuah u sih. Cutin a si lo ahcun ral a thawh tikah kan ral sinah an ṭang lai, kanmah kha an kan doh lai i hi ram hin an chuak lai” tiah a ti.
11 Cucaah rianhrang ṭuan ding in hnek awkah an cung ah rian bawi kha an chiah hna. Cun annih nih Faraoh ca thil khonnak caah Pithom le Raamses khua kha an dirh.
12 Asinain an hrem deuhdeuh hna tikah an tam chinchin i an karh chinchin caah Israel mi cu an ṭih tuk hna i an huat tuk hna.
13 Cucaah Izipt mi nih Israel mi kha sal ah an hman hna i fakpi in rian an ṭuanter hna.
14 Cun tlak sernak rian le tlak rawhnak rian kha an ṭuanter hna i lo zong ah an ṭuanter hna. Cuticun rethei ngaingai in an nunter hna. Izipt mi nih zaangfahnak ngei loin an hrem hna i sal rian phunzakip kha rumro in an hnek hna.
15 A hnuah Izipt siangpahrang nih Shifrah le Puah tiah auhmi Hebru minu nauhlawmtu pahnih kha a auh hna i,
16 “Hebru nu pawl fa nan ngeihter hna tikah pa an si ahcun nan thah hna lai; asinain nu an si ahcun nan nunh hna lai” tiah a ti.
17 Asinain nauhlawmtu hna nih a hmaanmi Pathian kha an ṭih caah Izipt siangpahrang nih a chim ning in an tuah lo i pa ngakchia kha an nunh hna.
18 Cucaah Izipt siangpahrang nih cun a auh hna i “Zeicah pa ngakchia kha nan nunh hna?” tiah a hal hna.
19 Nauhlawmtu hna nih cun “Hebru nu cu Izipt nu he an i lo lo. Nau hrin an i fawih tuk i nauhlawmtu phanh hlanah nau an rak hring diam cang” tiah an leh.
20 Cucaah Pathian nih nauhlawmtu hna kha thluahchuah a pek hna. Israel mi cu an karh chin lengmang i an ṭhawng chin lengmang.
21 Nauhlawmtu hna nih a hmaanmi Pathian kha an ṭih caah a hnuah Pathian nih chungkhar a pek hna.
22 A donghnak ah Faraoh nih a mi pawl kha “Hebru mi nih fa an hrinkami pa paohpaoh cu Nile Tiva ah nan hlonh hna lai, asinain nu a simi paoh cu nan nunh hna lai” tiah nawl a pek hna.
Footnotes
^ A hrampi, “Israel fapale.”
