Exodus 38:1-31
38 Bezalel nih anri thing in khangh thawinak caah biakṭheng a ser. Biakṭheng cu tungvang palh a si i a sau dong* nga, a kauh dong nga le a san dong thum a si.
2 Biakṭheng a kil pali ah ki a bunh hna. A ki cu biakṭheng he aa tlai i biakṭheng cu dar in a hut.
3 Biakṭheng caah hmanmi umkheng vialte, balṭin, cawhlek, khengkuar, keuṭe le meiṭil ruhnak hna kha a ser. Cun umkheng vialte cu dar in a ser.
4 Biakṭheng caah dar fingrilh zong a ser. A tlangkamh tang ah a chiah i biakṭheng a lai tiang a phan.
5 Laang hrolhnak caah a kual pali in a ser i dar fingrilh a kil pali ah a bunh.
6 Laang cu anri thing in a ser i dar in a hut.
7 Biakṭheng zawnhnak caah biakṭheng a kap pahnih ah a ummi a kual ah laang cu a hrolh. Biakṭheng cu thingphel in a ser i a chung a kuami kuang bantuk a si.
8 Tonnak thlam luhnak ah rian a ṭuantu nu hna nih an i bihmi thlalang khan hmaihum le a tohnak cu dar in a ser.
9 Cun tual kha a ser, thlanglei kam tual caah dong 100 a saumi puanzar kha la hmangṭhia thlurmi in a tah.
10 Dar in tung 20 le a kedanh 20 kha a ser hna i ngun in tung ah a bahnak le a tlaihnak kha a ser.
11 Chaklei kam zong ah dong 100 a saumi puanzar a um. Dar in tung 20 le a kedanh 20 kha a ser hna i ngun in tung ah a bahnak le a tlaihnak kha a ser.
12 A hnulei caah dong 50 a saumi puanzar a um. Tung pahra le a kedanh pahra zong a um i ngun in tung ah a bahnak le a tlaihnak a ser hna.
13 Nichuahlei hoih in a ummi a hmailei cu dong 50 a sau.
14 Tual luhnak khatlei i puanzar cu dong 15 a sau i tung pathum le kedanh pathum a um.
15 Tual luhnak a dang khatlei zong ah dong 15 a saumi puanzar a um i tung pathum le kedanh pathum a um.
16 Tual velchum puanzar vialte cu la hmangṭhia thlurmi in tahmi a si.
17 Tung kedanh cu dar in ser an si i tung i a bahnak le a tlaihnak cu ngun in ser an si. Tungpar cu ngun in hut a si i tual chung tung vialte caah ngun in sermi a tlaihnak a um.
18 Tual luhnak puanzar cu la dum, maimaw tuuhmul, la sen le la hmangṭhia thlurmi in tahmi a si. Puanzar cu dong 20 a sau. A san cu dong 5 a si i tual puanzar i a san he an i can.
19 A tung pali le a kedanh pali cu dar in ser an si. Tung i a bahnak le a tlaihnak cu ngun in ser an si i tungpar cu ngun in hut a si.
20 Puan biakinn caah thlam khenhnak fung le tual khenhnak fung vialte cu dar in ser an si.
21 Moses nih Tehte Khaannak puan biakinn caah cazin a lakter hna. Tlangbawi Aaron fapa Ithamar lamhruainak tang ah Levi mi nih mah rian cu an ṭuan.
22 Jehovah nih Moses nawl a pekmi vialte kha Judah phun chung in Hur fapa, Uri fapa Bezalel nih a tuah dih.
23 Amah a bawmtu Dan phun chung in Ahisamak fapa Oholiab cu zungthiammi, pungsan suai a thiammi le la dum, maimaw tuuhmul, la sen le la hmangṭhia la hna in puan tah a thiammi a si.
24 Hmunthiang rian caah hmanmi sui vialte cu hninh thawinak caah pekmi sui he an i zat. Mah cu hmunthiang shekel tahnak ning in talent* 29 le shekel* 730 a si.
25 Min cazin lak a simi hna nih an pekmi ngun cu hmunthiang i shekel tahnak ning in talent 100 le shekel 1,775 a si.
26 Kum 20 le kum 20 cung min cazin lak a simi hna cu 603,550 an si i hmunthiang shekel tahnak ning in shekel a cheu cio an pek.
27 Hmunthiang ca kedanh le puanzar ca kedanh sernak ah talent 100 hman a si. Kedanh pakhat caah talent pakhat a si i kedanh 100 caah talent 100 a si.
28 Shekel 1,775 kha hmang in tungpar cu ngun in a hut, tung caah a bahnak kha a ser hna i tung ah a bunh hna.
29 An pekchanhmi* dar cu talent 70 le shekel 2,400 a si.
30 Tonnak thlam luhnak caah kedanh, dar biakṭheng, dar fingrilh le biakṭheng umkheng vialte kha dar in a ser.
31 Tual velchum caah kedanh, tual luhnak caah kedanh, thlam khenhnak fung le tual khenhnak fung vialte cu dar in ser an si.
Footnotes
^ Dong khat cu lehmah 17.5 he aa tluk. Thlaihhlei B14 ah zoh.
^ Talent pakhat cu 34.2 kg he aa tluk. Thlaihhlei B14 ah zoh.
^ Shekel pakhat cu 11.4 g he aa tluk. Thlaihhlei B14 ah zoh.
^ Asiloah “Hninh thawinak.”
