Exodus 2:1-25
2 Cu caan hrawng ah cun Levi mipa pakhat nih Levi minu pakhat kha a ṭhit.
2 Minu cu fa a pawi i fapate a hrin. A fa cu aa dawh tuk ti kha a hmuh tikah thla thum chung a thuh.
3 A thuh khawh ti lo tikah phaikung* in tahmi bawm pakhat kha a lak, cun kattaza sii a thuh i bawm chung ah naute cu a chiah. Cun Nile Tivakam i phaikung lakah a va chiah.
4 Zeidah a cang lai ti hngalh awkah a unute cu lamhlat nawn ah a dir.
5 Faraoh fanu cu Nile Tiva ah ti kholh awkah a ra i amah a zohkhenhtu nu pawl cu tivakam ah an i chawk. Faraoh fanu nih phaikung lakah a ummi bawmte kha a hmuh i a salnule cu a va lakter colh hna.
6 Bawm cu a vun hun tikah a ṭapmi ngakchiapa te kha a hmuh. A zaang a fak tuk i “Mah hi Hebru mi pakhatkhat i an fa a si ko lai” tiah a ti.
7 Mah tikah a unute nih “Hi ngakchia aan umhpiaktu ding ah Hebru minu pakhat in kaan auhpiak lai maw?” tiah a hal.
8 Faraoh fanu nih cun “Va au!” tiah a ti. Ngakchianu cu a kal i naute a nu kha a va auh colh.
9 Faraoh fanu nih cun “Hi ngakchia hi i kalpi law rak ka zohkhenhpiak. Cun a man kaan pek lai” tiah a ti. Cucaah minu nih cun naute cu a kalpi i a zohkhenh.
10 Ngakchia cu a hun ṭhan tikah Faraoh fanu sinah cun a kalpi i Faraoh fanu nih cun a fapa ah aa ser. Anih nih “Ti chung in ka chuahmi a si” tiah a ti i a min ah Moses* tiah a sak.
11 Moses cu a hun cutzat tikah a unau pawl sinah a kal i zeitluk in dah rianhrang ṭuan awkah an hnek hna ti kha a va hmuh. Cun a unau Hebru mi pakhat Izipt mipa nih a tuk lio kha a hmuh.
12 Cucaah a pawngkam kha a zoh i ahohmanh a hmuh hna lo tikah Izipt mipa cu a thah i thetse lakah a thuh.
13 A thaizing ah a va kal ṭhan i Hebru mi pahnih an rak i velhmi kha a hmuh. Cucaah a palhmi pa kha “Zeicah na phunhawi a simi pa cu na velh?” tiah a ti.
14 Cu pa nih cun “Aho nih dah nangmah cu kan uktu le biaceihtu ah aan ser? Izipt mipa na thah bantuk in maw na ka thah hnik?” tiah a ti. Moses nih “Hi kong hi mi nih an hngalh dih cang ko hi ta!” tiah a ruah i a thin a phang tuk.
15 Cu kong cu Faraoh nih a theih tikah Moses kha thah a timh. Asinain Moses cu Faraoh sinin a zam i Midian ram lei ah a kal. Cuka a phanh tikah tikhor pawng ah a ṭhu.
16 Midian tlangbawi nih fanu pasarih a ngeih hna. Annih cu an ra i an pa tuurun ti dinh awkah ti kha an than i tikuang ah an tlen.
17 Asinain voidang bantuk in tuukhal pawl cu an ra i an ṭhawl hna. Mah tikah Moses cu a tho i nu pawl kha a bawmh* hna i an tuurun cu ti a dinh hna.
18 Inn an phak tikah an pa Reuel* nih “Nihin cu nan tlun a tuan ko e, zeitindah a si?” tiah a hal hna.
19 Annih nih “Izipt mipa pakhat nih tuukhal pawl sinin a kan khamh. Ti hmanh a kan thanpiak i tuurun zong ti a dinh hna” tiah an leh.
20 Reuel nih cun “Cu pa cu khuazei ah dah a um kun? Zeicah nan kaltak? Va au u law kan sinah rawl rak ei seh” tiah a ti hna.
21 A hnuah Moses cu Reuel sin um awkah a hna a tla. Reuel nih cun a fanu Zipporah kha nupi caah a pek.
22 Zipporah nih fapa a hrin i Moses nih “Kei cu ramdang ah khual ka si cang” tiah a ti i Gershom* tiah min a sak.
23 Caan saupi hnuah Izipt siangpahrang cu a thi. Asinain Israel mi cu sal an si ruang ah an hrum, an ai lengmang rih ko. An aihram thawng cu a hmaanmi Pathian sinah a phan.
24 Pathian nih an aihram thawng kha a theih i Abraham, Isak le Jakob sinah a sermi biakamnak kha a philh lo.
25 Cucaah Pathian nih Israel mi hna an sining kha ṭha tein a zoh i an harnak kha a hmuh.
