Exodus 12:1-51
12 Jehovah nih Moses le Aaron cu Izipt ram ah hitin a ti hna:
2 “Atu thla hi nan caah kum khat chung i thla hmasa bik a si lai.
3 Israel mi vialte kha hitin chim hna, ‘Atu thla ni hranak ni ah an innchungkhar ning cio in innkhat ah tuu pakhat cio in la hna seh.
4 Asinain chungkhar pakhat cu tuu pakhat kha a pum ning in anmah lawng in ei awkah an tlawm tuk ahcun an innpa he i hrawm hna seh. Pakhat cio nih zeizat dah an ei khawh lai ti kha tuak hna seh.
5 Tuu cu kum khat a si i do a tlami a pa a si lai. Tuukawng no chung in siseh, meheh chung in siseh nan i thim khawh.
6 Atu thla, ni 14 ni tiang tuu cu nan zohkhenh lai i ni a tlak tikah Israel mi nih an chungkhar ning cio in mah tuu kha an thah lai.
7 A thi tlawmpal kha la u law innka tung pahnih le innka ba ah nan theh lai. Cun cu innchung ah sa cu nan ei lai.
8 “‘Cu zan ah sa cu nan ei lai. Sa cu mei in nan em lai i thilnu phulh lo changreu le ankha he nan ei lai.
9 Sa cu a hring in siseh, a chumh in siseh nan ei lai lo. A pum ning in nan em lai. A lu he, a ke he, a chungril he mei ah nan em lai i nan ei lai.
10 Sa cu zingka tiang zeihmanh nan ngaan lai lo. Zingka tiang a taan rih ahcun mei in nan khangh dih lai.
11 Nan ei tikah taisawm nan i sawmh lai, phanat nan i danh lai. Ṭhiangṭhunh nan i put lai i khulrang in nan ei lai. Cucu Jehovah Lanhtak Puai* a si.
12 Cu zan ah cun Izipt ram ah kaa chawk lai i Izipt ram fater vialte minung si hna seh, saram si hna seh ka thah dih hna lai. Izipt pathian vialte zong bia ka ceih hna lai i dan ka tat hna lai. Keimah cu Jehovah ka si.
13 Thisen cu nan umnak inn hmelchunhnak a si lai. Thisen cu ka hmuh tikah kaan lanhtak hna lai i Izipt ram dan ka tat tikah rai cu nanmah hrawh awkah nan cung ah a tlung lai lo.
14 “‘Cu ni cu nan caah philh khawh lomi ni a si lai. Jehovah caah puai a si lai i chan khat hnu chan khat in nan tuah lai. Hihi cu a hmun zungzalmi nawlbia a si.
15 Ni sarih chung thilnu phulh lo changreu kha nan ei lai. Ni khatnak ni ah nan innchung in thilnu kha nan hlonh dih lai. Zeicahtiah ni khat ni in ni sarih ni tiang thilnu phulhmi changreu a eimi cu Israel mi chung in hloh a si lai.*
16 Ni khatnak ni ah a thiangmi pumhnak nan ngei lai i ni sarihnak ni zong ah a dang a thiangmi pumhnak nan ngei lai. Cu ni hnih ah cun zei rian hmanh nan ṭuan lai lo. Nan ei awk rawl a herhmi zat lawng nan timhtuah lai.
17 “‘Izipt ram in nan bupi in kaan chuahpi hna lai ni ah Thilnu Phulh Lo Changreu Puai kha nan tuah hrimhrim lai. Mah ni cu chan khat hnu chan khat in nan ulh lai. Hihi cu a hmun zungzalmi nawlbia a si.
18 Thla khatnak thla, ni 14 ni zanlei in ni 21 zanlei tiang thilnu phulh lo changreu kha nan ei lai.
19 Ni sarih chung nan innchung ah thilnu nan chia hrimhrim lai lo. Ramdang mi an si ah, Israel mi an si ah thilnu phulhmi changreu a eimi cu hloh a si lai.
20 Thilnu aa telmi zeihmanh nan ei lai lo. Innkip ah thilnu phulh lomi changreu lawng nan ei lai.’”
21 Moses nih Israel upa pawl kha a auh colh hna i hitin a ti hna: “Va kal u law nan innchungkhar cio caah tuufa maw, meheh fa maw va thim u law Lanhtak Puai caah va that u.
22 Hyssop* nge tom khat kha khengkuar chung i thi ah nan hnim lai. Mah thi cu innka ba le innka tung pahnih ah nan nalh lai. Zinglei tiang ahohmanh innchung in nan chuak lai lo.
23 Jehovah cu Izipt mi hna cung ah rai tlunter ding in aa chawh tikah innka ba le innka tung pahnih i thi kha a hmuh lai i innka cung in Jehovah nih aan lanhtak hna lai. Nan inn chung ah thihnak rai luh ding in a awnh lai lo.
24 “Mah puai cu nanmah le nan fale nih zungzal in nan ulh dingmi a hmunmi phung a si.
25 Jehovah nih kaan pek hna lai tiah bia aa kammi ram nan luh tikah mah puai cu nan tuah zungzal lai.
26 Nan fale nih ‘Hi puai hi zeicah kan tuah?’ tiah an in hal hna tikah,
27 ‘Jehovah caah Lanhtak Puai a si. Izipt mi cung ah rai a tlunter lioah Izipt ram i Israel mi hna inn cu a lanhtak i kan innchungkhar kha a kan khamh’ tiah nan ti lai” tiah a ti.
Mah hnuah mi pawl cu an kun i an bawk.
28 Cucaah Israel mi cu an kal i Jehovah nih Moses le Aaron nawl a pekmi hna ning tein an tuah. A fialmi hna ning in an tuah dih.
29 Zanṭim ah Jehovah nih Izipt ram fater vialte kha a thah hna. Bawiṭhutdan ah a ṭhumi Faraoh fater thawk in thonginn chung i thongtla fater le saṭil fater vialte tiang in a thah dih hna.
30 Cu zan ah cun Faraoh le a bawile vialte le Izipt mi vialte cu an tho i fakpi in an ṭap. Zeicahtiah mithi a um lonak inn pakhat hmanh a um lo.
31 Zan ah cun Faraoh nih Moses le Aaron cu a auh colh hna i “Nanmah he, Israel mi he ka mi hna sinin chuak u. Nan chim ning tein Jehovah cu va bia u.
32 Nan chim bantuk in nan tuurun le nan saṭilrun zong i kalpi hna u law keimah ca zong ah Pathian sinah thluachuah ka halpiak ve u” tiah a ti hna.
33 Izipt mi nih cun an ram in khulrang in chuah awkah an hnawh chih hna i “Nan chuah lo ahcun kan thi dih cang lai hih!” tiah an ti hna.
34 Cucaah Israel mi nih thilnu phulh rih lomi chang nawnmi le chang nawnnak kheng kha an puan in an fun i an liang ah an i khinh.
35 Moses nih a fial hna ning in Israel mi nih Izipt mi sinah sui hlawn le ngun hlawn le hnipuan kha an hal hna.
36 Jehovah nih Israel mi kha Izipt mi hna hmaiah mithmai ṭha a hmuhter hna caah an halmi paoh kha an pek hna. Cuticun Izipt mi hna chawhlawn kha an i lak.
37 Israel mi cu Rameses in an i thawh i Sukkoth ah an kal. Ngakchia tel loin ke in a kalmi cu pa lawng ah 600,000 hrawng an si.
38 An sinah cun mibu nganpi* le an tuurun, an cawrun le an saṭilrun tampi zong an kal ve.
39 Izipt ram in an rak i phorhmi chang an nawnmi kha thilnu phulh lo changreu hlum ah an ser hna. Izipt ram in khulrang in an ṭhawl hna caah thilnu cu an phulh manh lo. Rawl i timhtuahnak caan zeihmanh an ngei lo.
40 Israel mi cu Izipt ram ah an umnak kum 430 a si cang.
41 Kum 430 a tlin ni te ah khan Jehovah mibupi cu Izipt ram in an chuak.
42 Cu zan cu Jehovah nih Izipt ram in a rak chuahpi hna caah puai an tuah zan a si. Cu zan cu Israel mi vialte nih chan khat hnu chan khat in Jehovah caah an ulh lai.
43 Jehovah nih Moses le Aaron kha “Lanhtak Puai he aa tlaimi nawlbia cu hihi a si: Ramdang mi ahohmanh nih lanhtak rawl an ei lai lo.
44 Asinain pakhatkhat nih tangka in cawkmi sal a ngeih ahcun a cuarpar a tanpiak awk a si. Mah hnu lawng ah lanhtak rawl kha a ei khawh lai.
45 A rak pemmi hna le rianṭuan awkah nan hlanmi hna nih cun an ei lai lo.
46 Tuufa kha a pum ning in inn pakhat ah nan ei lai. A sa pakhat hmanh inn leng ah nan chuahpi lai lo i a ruh zong pakhat hmanh nan khiak lai lo.
47 Israel mi vialte nih hi puai cu nan tuah awk a si.
48 Nan sin i a ummi ramdang mi pakhat nih Jehovah caah Lanhtak Puai tuah a duh ahcun a sin i a ummi pa vialte cu an cuarpar an i tan awk a si. Mah hnu lawng ah puai a tuah khawh lai i Israel mi bantuk a hung si lai. Asinain cuarpar aa tan lomi nih cun a ei lai lo.
49 Israel mi caah le nan lakah a ummi ramdang mi caah nawlbia pakhat lawng a um lai” tiah a ti hna.
50 Cucaah Jehovah nih Moses le Aaron nawl a pekmi hna ning tein Israel mi vialte nih an tuah. A fialmi hna ning in an tuah dih.
51 Cu ni hrimhrim ah cun Jehovah nih Israel mi mibupi kha Izipt ram in a rak chuahpi hna.
Footnotes
^ Biafang Fianternak ah zoh.
^ Asiloah “thihdan pek a si lai.”
^ Biafang Fianternak ah zoh.
^ Izipt mi i telin Israel miphun a si lomi kha an si.
