Exodus 11:1-10
11 Jehovah nih Moses cu “Faraoh le Izipt mi cung ah rai pakhat in ka tlunter rih lai. Mah hnuah hika hin aan kalter hna lai. Aan kalter hna tikah hi ram in a ṭhawl in aan ṭhawl hna lai.
2 Israel mi kha chim hna: ‘Pa he, nu he an dihlak in an innpa sinah sui hlawn le ngun hlawn kha hal hna seh’” tiah a ti.
3 Cun Jehovah nih Israel mi cu Izipt mi hna hmaiah mithmai ṭha a hmuhter hna. Mah leng ah Moses cu Izipt ram ah Faraoh bawile le mi nih an upat ngaimi a hung si.
4 Moses nih Faraoh cu “Jehovah nih hitin a ti, ‘Zanṭim hrawng ah Izipt ram ah kaa chawk lai i,
5 Izipt ram fater vialte cu an thi lai. Bawiṭhutdan ah a ṭhumi Faraoh fater thawk in facang rialnak ah rian a ṭuanmi salnu fater tiang an thi lai. Cun saṭil fater vialte zong an thi lai.
6 Izipt ram pumpi ah a fak tukmi ṭahnak a um lai. Mah bantuk ṭah aihramnak cu hi hlan zong ah a um bal lo i hmailei zong ah a um ti lai lo.
7 Asinain Jehovah nih Izipt mi le Israel mi cu a thleidan khawh hna ti kha na hngalh nakhnga Israel mi le an saṭil cu uico hmanh nih a baoh hna lai lo.’
8 Cun na bawile vialte cu ka sinah an ra lai i ka hmaiah an kun lai. ‘Nangmah le na mi vialte cu va kal cang ko u’ tiah an ka ti lai. Mah hnu cun ka kal lai” tiah a ti i Faraoh hmai cun thinhung ngai in a chuak.
9 Jehovah nih Moses cu “Izipt ram ah khuaruahhar thil tampi ka tuah khawh nakhnga Faraoh nih na bia a ngai lai lo” tiah a ti.
10 Moses le Aaron nih Faraoh hmaiah khuaruahhar thil vialte kha an tuah ko nain Jehovah nih Faraoh cu a lungkhon awkah a awnh caah Israel mi kha a ram in a kalter duh hna lo.
