Exodus 21:1-36
21 “Na chimh hna dingmi nawlbia cu hihi an si:
2 “Hebru mi pakhat kha sal ah nan cawk ahcun kum ruk chung nan sal a si lai, asinain a kum sarihnak ah amah nih zeihmanh pek hau loin nan luatter lai.
3 Amah lawng in a rami a si ahcun amah lawng in nan luatter lai. A nupi he an si ahcun a nupi he nan luatter hna lai.
4 A bawipa nih nupi a ṭhitpiak i fanu, fapa a ngeih hna ahcun a nupi le a fale cu a bawipa ta an si lai i amah lawng in a kal lai.
5 Asinain salpa nih ‘Ka bawipa le ka nupi le ka fale kha ka dawt hna, cucaah luat ka duh lo’ tiah a nawl chih ahcun,
6 a bawipa nih a hmaanmi Pathian hmaiah a chuahpi lai. Cun innka ah maw, innka tung ah maw a kalpi lai i a hna kha thir zum in a vih lai, cun a nun chung a sal a si lai.
7 “Mipa pakhat nih a fanu kha sal ah a zuar ahcun salpa bantuk in anih cu luatter a si lai lo.
8 A bawipa lung a ton lo i nuchun caah aa lak duh lo ahcun midang sinah a zuar khawh. Asinain cucu a ding lomi thil a si caah ramdang mi sinah a zuar lai lo.
9 A fapa caah a hampiak ahcun fanu covo kha a pek lai.
10 A fapa nih nupi dang a ṭhit ahcun a hmasa nupi kha rawl le hnipuan a pek ṭhiamṭhiam lai i a umpi ṭhiamṭhiam lai.*
11 Hi thil pathum hi a tuah khawh lo ahcun salnu cu tangka zeihmanh la loin a luatter lai.
12 “Thi lak in mi a velmi cu thihdan pek a si lai.
13 Asinain ruahlopi in a thah sual i a hmaanmi Pathian nih a awnhmi a si ahcun zam khawhnak hmun kha ka timhpiak lai.
14 A minunghawi cung ah a thin a hung tuk i timh ciamman tein mi a thattu cu ka biakṭheng hmanh in nan hnuh lai i nan thah lai.
15 A nu siseh, a pa siseh a velmi cu thihdan pek a si lai.
16 “Mi pakhat kha hramhram in a tlaih i a zuar asiloah a kut chung ah hmuh a si ahcun anih cu thihdan pek a si lai.
17 “A nu siseh, a pa siseh chiat a serhtu cu thihdan pek a si lai.
18 “Mi pakhat cu a minunghawi he aa si i lung in a cumh asiloah a thongh* i mipa cu a thi lo nain ihkhun cung ah a kuah hei ti u sih:
19 A hnuah mipa cu a tho kho i ṭhiangṭhunh he leng ah a chuah khawh ahcun a veltu pa cu dantatnak in a luat lai. Asinain ṭha tein a dam hlan cu rian a ṭuan khawh lai lo caah a dam hlan tiang a rian ṭuan man cu a liamh lai.
20 “Mi pakhat nih a salnu maw, a salpa maw fung in a tuk i a kut in a thih ahcun cu pa cu dantat a si lai.
21 Asinain ni khat maw, ni hnih maw a nun rih ahcun a bawipa cu dantat a si lai lo, zeicahtiah a tangka in a cawkmi sal a si caah a si.
22 “Pa pahnih an i velhnak ah fapawi nu kha an khawn sual i thla tling loin fa a hrin ahcun a nu he, a fa he an thih lo hmanh ah minu a va nih ka liamh seh a ti zat kha biaceihtu hna nih bia an khiahmi ning in a pek lai.
23 Asinain pakhatkhat an thih ahcun nunnak caah nunnak,
24 mit caah mit, ha caah ha, kut caah kut, ke caah ke,
25 khanghnak caah khanghnak, hliamhma caah hliamhma, tuknak caah tuknak a si lai.
26 “Mi pakhat nih salnu maw, salpa maw a tuk i a mit a hrawh ahcun a mit man caah cu sal cu a luatter lai.
27 A ha a thlongh ahcun a ha man caah a luatter lai.
28 “Cawtum nih minu maw, mipa maw a suk i a thih ahcun cu cawtum cu lung in thi lak in cheh a si lai, a sa cu ei a si lai lo; asinain a ngeitu cu dantatnak in a luat lai.
29 Asinain cu cawtum cu suk a hmang i a ngeitu zong ralrin pek a si cang nain ṭha tein a hren lo ruang ah minu maw, mipa maw thi lak in a suk ahcun cu cawtum cu lung in thi lak in cheh a si lai i a ngeitu zong thihdan pek a si lai.
30 Man pek in dantat a si ahcun a nunnak tlanhnak man caah an halmi zat in a pek lai.
31 Cawtum nih cun ngakchianu maw, ngakchiapa maw thi lak in a suk ahcun cu nawlbia ṭhiamṭhiam ning in a ngeitu nih a tuah lai.
32 Cawtum nih salnu maw, salpa maw thi lak in a suk ahcun a bawipa kha shekel* 30 pek a si lai, cun cu cawtum cu lung in thi lak in cheh a si lai.
33 “Mi pakhat nih khor a cawh i a chin a chinh lo ruang ah cawtum maw, laa maw khor chung ah a tlak ahcun,
34 khor ngeitu nih a liam lai. Saṭil man kha a ngeitu cu a pek lai i a thimi saṭil cu aa lak lai.
35 Mi pakhat i a cawtum nih midang cawtum kha thi lak in a suk ahcun a nungmi cawtum kha a zuar lai i a man an i cheu lai; a thimi cawtum zong an i cheu lai.
36 Asinain a ngeitu nih cawtum cu suk a hmang ti a hngalh ko nain ṭha tein a hren lo ahcun cawtum caah cawtum in a liam lai i a thimi cawtum cu aa lak lai.
Footnotes
^ A hrampi, “nuleva sinak a hmanpi lai.”
^ Asiloah “hriamnam pakhatkhat in a tuk” ti zong a si kho.
^ Shekel pakhat cu 11.4 g he aa tluk. Thlaihhlei B14 ah zoh.
