Exodus 40:1-38
40 Jehovah nih Moses cu hitin a ti:
2 “Thla khatnak thla, ni khatnak ni ah tonnak thlam, puan biakinn kha na dirh lai.
3 Biakamnak kuang cu puan biakinn chung ah na chiah lai i puanzar in kuang cu na phenh lai.
4 Cabuai kha a chung ah na chiah lai i cabuai cung thilri vialte zong ningcang tein na chiah lai. Mei vannak tung kha a chung ah na chiah lai i meiinn kha na van lai.
5 Rimhmui khanghnak caah sui biakṭheng kha Tehte Khaannak kuang hmaiah na chiah lai i puan biakinn luhnak ah puanzar na zar lai.
6 “Khangh thawinak biakṭheng kha tonnak thlam, puan biakinn luhnak hmaiah na chiah lai.
7 Hmaihum kha tonnak thlam le biakṭheng karah na chiah lai i ti na rawn lai.
8 Puan biakinn kha tual in na kulh lai i tual luhnak ah puanzar na zar lai.
9 Thuhmi chiti kha na lak lai i puan biakinn le a chung thilri vialte kha na toih lai i na thianter lai. Cuticun puan biakinn cu a thiangmi a hung si lai.
10 Khangh thawinak biakṭheng le a thilri vialte kha chiti na toih lai. Cuticun a thiang bikmi biakṭheng a hung si lai.
11 Hmaihum le a tohnak kha chiti na toih lai i na thianter lai.
12 “Cun Aaron le a fapale kha tonnak thlam luhnak pawng ah na ratpi hna lai i ti na kholhter hna lai.
13 Aaron kha a thiangmi thilthuam na hrukter lai. Chiti na toih lai i na thianter lai. Cun anih cu ka caah tlangbawi rian a ṭuan lai.
14 A fapale zong na ratpi hna lai i angki fual na hrukter hna lai.
15 Aaron chiti na toih bantuk in chiti na toih hna lai i ka caah tlangbawi rian an ṭuan lai. Cuticun chiti toih an si caah chan khat hnu chan khat in tlangbawi rian an ṭuan zungzal lai.”
16 Jehovah nih nawl a pekmi ning tein Moses nih a tuah dih. A fialmi ning in a tuah dih.
17 Izipt ram in an chuah hnu a kum hnihnak, thla khatnak thla, ni khatnak ni ah puan biakinn cu dirh a si.
18 Moses nih puan biakinn a dirh tikah a kedanh kha a chiah, a tungtlang kha a bunh, a thingthluan kha a hrolh i a tung kha a dirter.
19 Cun puan biakinn a khuh kha a khuh i mah cung ah a dang a khuh cu a khuh chap. Mah cu Jehovah nih Moses nawl a pekmi ning tein a si.
20 Cun Tehte Khaannak lungtlap kha a lak i Kuang chung ah a chiah. Kuang ah khan laang cu a hrolh i a chin a chinh.
21 Tehte Khaannak kuang kha puan biakinn chung ah a chiah i puanzar in Kuang cu a phenh. Mah cu Jehovah nih Moses nawl a pekmi ning tein a si.
22 Cun cabuai kha tonnak thlam chung ah a chiah. Puanzar a lenglei, puan biakinn chaklei kam ah a chiah.
23 Jehovah hmai i cabuai cung ah changreu kha a thapthap in a chiah hna. Mah cu Jehovah nih Moses nawl a pekmi ning tein a si.
24 Mei vannak tung cu tonnak thlam chung i cabuai hmaiah a chiah. Mah cu puan biakinn thlanglei kam ah a si.
25 Cun Jehovah hmaiah mei cu a van. Mah cu Jehovah nih Moses nawl a pekmi ning tein a si.
26 Sui in sermi biakṭheng cu tonnak thlam chung i puanzar hmaiah a chiah.
27 Cu biakṭheng cu rimhmui khanghnak caah a si. Mah cu Jehovah nih Moses nawl a pekmi ning tein a si.
28 Puan biakinn luhnak ah puanzar kha a zar.
29 Khangh thawinak biakṭheng kha tonnak thlam, puan biakinn luhnak ah a chiah. Cu biakṭheng cu khangh thawinak le changvut thawinak peknak caah a si. Mah cu Jehovah nih Moses nawl a pekmi ning tein a si.
30 Kholhṭawlnak caah hmaihum kha tonnak thlam le biakṭheng karah a chiah i ti a rawn.
31 Moses le Aaron le Aaron fapale cu cuka ah an kut le an ke an i ṭawl.
32 Tonnak thlam an luh fatin, biakṭheng pawng ah an kal fatin an i ṭawl. Mah cu Jehovah nih Moses nawl a pekmi ning tein a si.
33 A donghnak ah puan biakinn le biakṭheng velchum cu tual in a kulh. Cun tual luhnak ah puanzar a zar.
Cuticun Moses nih rian cu a liim.
34 Mah tikah tonnak thlam cu minmei nih a khuh i puan biakinn cu Jehovah sunparnak in a khat.
35 Minmei nih thlam cu a khuh dih caah le puan biakinn cu Jehovah sunparnak in a khah caah Moses cu tonnak thlam chung ah a lut kho lo.
36 Minmei cu puan biakinn in aa ṭhial tikah Israel mi nih an riahhmun kha an fim i an khuallam cu an peh.
37 Asinain minmei aa ṭhial lo ahcun minmei aa ṭhial hlan tiang riahhmun ah cun an um ko.
38 Israel mi nih khual an tlawn chung vialte puan biakinn cung ah chun ah Jehovah minmei tung a ummi le zan ah meitung in a ummi kha an hmuh.
