Exodus 15:1-27
15 Moses le Israel mi nih Jehovah kha hi hla in an thangṭhat:
“Jehovah cu hla in ka thangṭhat lai, teinak nganpi a hmuh cang.
Rang le aa cittu hna cu rili chung ah a paih hna.
2 Jah* cu ka thazaang le ka ṭhawnnak a si. Amah cu a ka khamhtu a si.
Ka Pathian a si i amah cu ka thangṭhat lai; ka pa Pathian a si i amah cu ka hlorh lai.
3 Jehovah cu a ṭhawngmi ralkap a si. A min cu Jehovah a si.
4 Faraoh rangleng le a ralkap hna cu rili chung ah a hlonh hna.A ralbawi a ṭhawng bikbik hna cu Rili Sen chung ah an pil dih.
5 Tilet nganpipi nih a phum dih hna; lung bantuk in a tawne ah an pil dih.
6 Maw Jehovah, na orhlei kut cu a ṭhawng tuk hringhran;Maw Jehovah, na orhlei kut nih ral kha a den dih cikcek hna.
7 A liannganmi na ṭhawnnak in nangmah aan ralchanhtu hna cu na hlonh hna;Na thinhunnak cu a alh i capawl bantuk in a kangh hna.
8 Na thaw in na chem i ti cu an i fon dih.Ti cu vanpang bantuk in an dir;Tilet nganpipi cu rili laifang ah an khal dih.
9 Ral nih ‘Ka dawi hna lai i ka tlaih hna lai!
Hranchaw kha ka duh paoh in ka phawt hna lai!
Ka nam kha ka zuh lai i ka kut nih a hrawh hna lai!’ tiah a ti.
10 Na thaw in na chem hna tikah rili nih a khuh dih hna;Tilet nganpipi lakah suan bantuk in an pil dih.
11 Maw Jehovah, pathian hna lakah nangmah bantuk Pathian ahodah a um?
Nangmah bantuk in a thiang bikmi Pathian ahodah a um?
Nang cu ṭihzah awk le hla in thangṭhat awkah aa tlakmi, khuaruahhar thil a tuahtu na si.
12 Na orhlei kut kha na samh tikah ral cu vawlei nih a dolh hna.
13 Na tlanhmi miphun kha a fekmi dawtnak in na hruai hna;A thiangmi hmun ah na thazaang in na hruai hna lai.
14 Mah kong cu mi nih an theih tikah a ther in an ther lai;Filistin ram ah a ummi hna nih fahnak nganpi* an ing lai.
15 Mah tikah Edom hruaitu hna cu an ṭih tuk lai,A ṭhawngmi Moab uktu hna cu a ther in an ther lai.
Kanaan ram ah a ummi vialte cu an lung a dong lai.
16 Ṭihnak le phannak cu an cung ah a tlung lai.
Maw Jehovah, na mi pawl an lanh dih hlan tiang,Na tlanhmi na miphun pawl an lanh dih hlan tiang,A ṭhawngmi na ban ruang ah lung bantuk in cawlcaang loin an dir lai.
17 Na mi cu na ratpi hna lai i na tlang* cung ah na phun hna lai,Maw Jehovah, nangmah umnak caah na timhtuahmi hmun ah na phun hna lai,Maw Jehovah, a thiangmi na hmun ah na phun hna lai.
18 Jehovah nih zungzal in zungzal tiang siangpahrang in a uk lai.
19 Faraoh rang hna le raltuknak rangleng le rangcung ralkap hna cu rili chung an luh tikah,Jehovah nih rili ti cu a kirter ṭhan,Asinain Israel mi cu rili chung ah lei ro in an kal.”
20 Cun Aaron farnu, profet nu Miriam nih khuang kha aa lak i a tum. Nu vialte zong nih a hnu in an zulh i khuang kha an tum i an laam.
21 Pa pawl nih hla an sakmi kha Miriam nih hitin a leh hna:
“Jehovah cu hla in thangṭhat u, teinak nganpi a hmuh cang.
Rang le aa cittu hna kha rili chung ah a paih hna.”
22 A hnuah Moses nih Israel mi cu Rili Sen in a chuahpi hna i Shur ramcar lei ah a luhpi hna. Ramcar ah ni thum chung an kal cang nain ti an hmu lo.
23 Marah* hmun an phak tikah cuka i ti cu a khaat caah an ding kho lo. Cucaah mah hmun cu Marah tiah min a sak.
24 Cucaah mi cu Moses sinah an phunzai i “Zeidah kan din lai?” tiah an ti.
25 Moses nih Jehovah sinah bawmhnak a hal i Jehovah nih thingkung pakhat kha a hmuhsak. Mah thing cu ti chung ah a hlonh tikah ti cu a hung thlum.
Cuka ah Pathian nih biaceihnak caah nawlbia kha a serpiak hna i cuka ah cun a hneksak hna.
26 “Keimah cu Jehovah nan Pathian ka si. Ka aw kha ṭha tein nan ngaih i ka mithmuh ah a hmaanmi thil kha nan tuah ahcun, ka nawlbia ah lungthin nan pek i ka phunglam vialte kha nan zulh ahcun Izipt mi cung ah ka tluntermi rai pakhat hmanh nan cung ah ka tlunter lai lo. Zeicahtiah keimah Jehovah cu aan damtertu hna ka si” tiah a ti.
27 Mah hnuah Elim ah an va phan i cuka ah cerhti 12 le tum kung 70 a um. Cuka i ti pawng ah cun an riak.
