Exodus 25:1-40
25 Jehovah nih Moses cu hitin a ti:
2 “Israel mi kha ka sinah thawhlawm pek ding in chim hna. Ahopaoh nih mah lungtho tein an pekmi thawhlawm kha na cohlan lai.
3 An sinin na cohlan dingmi thawhlawm cu hihi an si: sui, ngun, dar,
4 la dum, maimaw tuuhmul, la sen, la hmangṭhia, meheh hmul,
5 sii sen buhmi tuukawng phaw, rili saihrem phaw, anri thing,
6 meiinn caah chiti, chiti thuhnak ca le rimhmui caah balsam chiti,
7 tlangbawi angki* le ṭangbenh caah oniks lungvar le a dang lungvar hna an si.
8 Ka caah hmunthiang pakhat in nan sak lai i nan lakah ka um lai.
9 Puan biakinn le a chung thilri vialte cu kaan hmuhsakmi muisam ning tein na tuah lai.
10 “Anri thing in kuang pakhat na ser lai. A tung dong* hnih le a cheu, a vang dong khat le a cheu, a san dong khat le a cheu in na ser lai.
11 Kuang cu sui thiang in na hut lai. A chung he, a leng he sui thiang in na hut lai i a tlang cu sui in na kamh lai.
12 Sui kual pali in na ser lai i kuang ke pali cung ah na bunh lai. Kap khat ah pahnih pahnih in na bunh lai.
13 Anri thing in zawnhnak laang kha na ser lai i sui in na hut lai.
14 Kuang zawnhnak caah kuang i a sirlei ah a ummi a kual chung ah cu laang cu na hrolh lai.
15 Laang cu kuang i a kual chung ah na hrolh lai i na zuk ṭhan lai lo.
16 Kaan pek laimi lungtlap kha kuang chung ah cun na chiah lai.
17 “Kuang a chin cu sui thiang in na ser lai i a tung dong hnih le a cheu, a vang dong khat le a cheu in na ser lai.
18 Cherubim pahnih kha sui in na den lai i a chin a ki veve ah na chiah hna lai.
19 A chin khatlei ki le khatlei ki ah cherubim kha pakhat cio in na chiah lai.
20 Cherubim nih an thla pahnih kha cunglei ah an samh lai i an thla nih kuang a chin cu a khuh lai. Cun cherubim cu hmaitonh in an um lai i kuang a chin kha an zoh lai.
21 Kaan pek laimi Tehte Khaannak lungtlap cu Kuang chung ah na chiah lai i Kuang cu a chin na chinh lai.
22 Cuka ah ka um lai i kuang a chin cung in kaan chawnh lai. Israel mi vialte caah kaan pek laimi nawlbia vialte kha Tehte Khaannak kuang cung i cherubim pahnih karlak in kaan hngalhter lai.
23 “Anri thing in cabuai pakhat zong na ser lai i a tung dong hnih, a vang dong khat, a san dong khat le a cheu a si lai.
24 Cabuai cu sui thiang in na hut lai i a tlang kha sui in na kamh lai.
25 Cabuai velchum i a tlangkam kha zapar ngaw* in na ser lai i a tlang kha sui in na kamh ṭhan lai.
26 Cun sui kual pali in na ser lai i a ke pali a umnak a kil pali ah khan na bunh lai.
27 Cabuai a tlangkam pawng ah sui kual cu na bunh lai i a zawnhnak laang cu na hrolh lai.
28 Cabuai zawnhnak laang cu anri thing in na ser lai i sui in na hut lai.
29 “Cabuai cung hman awkah kheng, hrai, thlet thawinak caah ti-thawl le khengkuar zong sui thiang in na ser hna lai.
30 Pathian hmaiah hunhmi changreu cu cabuai cung ah na chiah zungzal lai.
31 “Mei vannak tung cu sui thiang in na ser lai. Mei vannak tung a ke, a tungpi, a ṭe, a cawng, a mom tete le a par tete hna cu suitlang pakhat chung in na den lai.
32 Mei vannak tung in a ṭe paruk kha ser hna law khatlei ah pathum, khatlei ah pathum in ser hna.
33 A ṭe pakhat cio ah almond pangpar he aa lomi a cawng pathum a um lai i a mom tete le a par tete zong aa changchang in a um lai. Cu bantuk in a ṭe khatlei zong ah a um ve lai. Mei vannak tung in a chuakmi a ṭe paruk cu cuticun a si lai.
34 Mei vannak a tungpi ah almond pangpar he aa lomi a cawng pali a um lai i a par tete le a mom tete zong aa changchang in a um lai.
35 A tungpi in a ṭetnak khuah thum tang cio ah a mommi pakhat cio an um lai.
36 A mom tete le a ṭe le mei vannak tung a ningpi cu sui thiang tlang khat chung in na den lai.
37 Mei vannak tung caah meiinn pasarih na ser lai. Meiinn cu van a si tikah a hmailei kha a ceuh dih lai.
38 Cengceh le meiṭil ruhnak cu sui thiang in ser a si lai.
39 Mei vannak tung le a thilri sernak caah sui thiang talent* pakhat in na hman lai.
40 Tlang cung i kaan hmuhsakmi muisam ning in cu thil hna cu na ser lai.
Footnotes
^ Biafang Fianternak ah zoh.
^ Dong khat cu lehmah 17.5 he aa tluk. Thlaihhlei B14 ah zoh.
^ Lehmah 2.9 hrawng. Thlaihhlei B14 ah zoh.
^ Talent pakhat cu 34.2 kg he aa tluk. Thlaihhlei B14 ah zoh.
