Exodus 28:1-43
28 “Tlangbawi rian ṭuan awkah Israel mi chung in na u Aaron le a fapale Nadab, Abihu, Eleazar le Ithamar kha thim hna.
2 Na u Aaron caah rumra a ngei i aa dawhmi, a thiangmi thilthuam kha na ṭhitpiak lai.
3 Aaron a thianter hngami thilthuam kha ṭhit awkah keimah nih fimnak in ka khahtermi zungthiammi vialte kha fial hna. Aaron cu ka caah tlangbawi rian a ṭuan lai.
4 “Zungthiam hna nih ṭangbenh, tlangbawi angki, ban ngei lo angki, a kulh tete in tahmi angki fual, lupawng le taisawm kha an ṭhit lai. Na u Aaron le a fapale nih ka caah tlangbawi rian an ṭuan khawh nakhnga a thiangmi thilthuam kha an ṭhitpiak hna lai.
5 Zungthiam hna nih sui hri, la dum, maimaw tuuhmul, la sen le la hmangṭhia kha an hman lai.
6 “Tlangbawi angki cu sui hri, la dum, maimaw tuuhmul, la sen le la hmangṭhia thlurmi in an tah lai.
7 A hnu le a hmai aa tonnak ah a liang hnam pahnih a um lai.
8 Tlangbawi angki cu dawh te le rem tein a um nakhnga tlangbawi angki he aa pehmi taisawm kha an tah lai. Mah taisawm cu angki tahnak ah hmanmi sui hri, la dum, maimaw tuuhmul, la sen, la hmangṭhia thlurmi in an tah lai.
9 “Oniks lungvar pahnih kha na lak lai i cu lungvar cung ah cun Israel miphun hna min kha na ṭial lai.
10 Lung pakhat ah min paruk, a dang lung pakhat ah min paruk kha upa bik in ngakchia bik tiang aa changchang in na ṭial hna lai.
11 Lung caṭialtu nih minkhenhnak ah a ṭial bantuk in Israel miphun hna min kha cu lungvar pahnih cung ah na ṭial lai. Cun cu lungvar hna cu sui in a tlang na kamh lai.
12 Israel miphun hna min philhlonak caah tlangbawi angki i a liang hnam ah lungvar pahnih cu na ṭhit chih lai. Aaron nih Israel miphun hna min philhlonak caah Jehovah hmaiah a liang in a phorh lai.
13 Sui in a tlangkamh na ser lai.
14 Hri bantuk in hrualmi sui hri pahnih na ser lai i mah hri cu a tlangkamh he na peh lai.
15 “Biaceihnak ṭangbenh kha na ser lai i tlangbawi angki bantuk in sui hri, la dum, maimaw tuuhmul, la sen le la hmangṭhia thlurmi in na tah lai.
16 Ṭangbenh cu bil tikah tungvang palh a si lai i a sau khap khat,* a kauh khap khat a si lai.
17 Ṭangbenh cung ah cun lungvar tlar li in na benh lai i a pakhatnak tlar ah rubi lungvar, topaz lungvar le emeral lungvar an si lai.
18 A pahnihnak tlar ah hring dum lungvar, safaiar lungvar le jasper lungvar an si lai.
19 A pathumnak tlar ah leshem* lungvar, agate lungvar le ametist lungvar an si lai.
20 A palinak tlar ah krisolite lungvar, oniks lungvar le lungvar hring an si lai. Mah lungvar hna kha sui in a tlang na kamh lai.
21 Lungvar nih Israel phun 12 i an min kha a aiawh lai. Lungvar pakhat cio cung ah phun 12 lakin pakhat cio i an min kha minkhenhnak cung i ṭial bantuk in ṭial an si lai.
22 “Sui thiang hri kha na hrual lai i ṭangbenh cu na kulh lai.
23 Ṭangbenh caah sui kual pahnih na ser lai i ṭangbenh a cunglei a ki, ki hnih ah cu sui kual pahnih cu na thlaih lai.
24 Sui hrihrual pahnih kha ṭangbenh a ki i a kual pahnih ah na khih lai.
25 Sui hrihrual pahnih i a par cu a tlangkamh pahnih ah khan na khih lai i tlangbawi angki a hmailei a liang hnam ah na ṭem lai.
26 Sui kual pahnih na ser lai i ṭangbenh a tanglei i a chunglei ki pahnih ah na khih lai. Cun tlangbawi angki he aa tawng lai.
27 Sui kual pahnih in na ser chap lai i tlangbawi angki a hmailei ah na khih lai. A liang hnam pahnih a tang i tlangbawi angki le taisawm aa pehnak a cung te ah khan a si lai.
28 Ṭangbenh a kual le tlangbawi angki a kual cu la dum in na ṭem chih lai. Cuticun ṭangbenh cu taisawm a cung ah ningcang tein a um lai.
29 “Aaron nih A Thiangmi Khaan a luh tikah biaceihnak ṭangbenh cu aa hruk lai. Cu ṭangbenh cung ah Israel miphun hna an min aa ṭial caah Jehovah nih a philh hna lai lo.
30 Aaron cu Jehovah hmai i a rat tikah Urim le Thummin* kha biaceihnak ṭangbenh chung ah a chiah lai. Jehovah hmaiah Israel mi kha bia a ceih hna tikah ṭangbenh cu aa hruk zungzal lai.
31 “Ban ngei lo angki cu a ningpi in la dum in na tah lai.
32 Angki cu a hngawng caah a awng na ser lai. A hngawng a tleh nakhnga lo a tlang na kamh lai. Thir angki bantuk in a hngawng na kamh lai.
33 Ban ngei lo angki a tanglei tlang velchum ah la dum, maimaw tuuhmul le la sen in sermi taleti kha na thlaih hna lai i a karlak ah sui darkhing zong na thlaih hna lai.
34 Ban ngei lo angki a tanglei tlang velchum ah sui darkhing le taleti kha aa changchang in na thlaih lai.
35 Aaron nih tlangbawi rian a ṭuan tikah cu angki cu aa hruk lai. Jehovah hmaiah hmunthiang chung a luh, a chuah tikah darkhing thawng cu theih a si lai i thihnak in a luat lai.
36 “Sui thiang in a tleumi a per pakhat kha na ser lai i cu cung ah cun ‘Jehovah cu a thiang’ tiah na ṭial lai.
37 Mah sui per cu lupawng a hmailei ah la dum in na ṭem chih lai.
38 Cu sui per cu Aaron a cal zawn ah a um lai. Israel mi nih an pekmi a thiangmi thil he aa tlaiin pakhatkhat nih palhnak a tuah sual ahcun Aaron nih ṭuanvo a lak lai. Annih nih Jehovah mithmai ṭha an hmuh nakhnga cu sui per cu Aaron a cal ah a um peng lai.
39 “A kulh tete in a ummi angki fual kha la hmangṭhia in na tah lai i lupawng zong la hmangṭhia in na tah lai. Cun taisawm zong na tah lai.
40 “Aaron fapale caah rumra a ngei i aa dawhmi angki fual, taisawm le luchin zong na serpiak hna lai.
41 Cu thilthuam cu na u Aaron le a fapale kha na hrukter hna lai. Chiti na toih hna lai, rian na pek hna lai i na thianter hna lai. Cun annih cu ka caah tlangbawi rian an ṭuan lai.
42 An chiaṭha lang sual hna hlah seh tinak caah an tai in an phei tiang a phanmi tawhrolh tawi na ṭhitpiak hna lai.
43 Aaron le a fapale nih tonnak thlam an luh tik le hmunthiang ah tlangbawi rian ṭuan ding in biakṭheng an fuh tikah palhnak an tuah sual i an thih nakhnga lo mah thilthuam cu an i hruk lai. Mah cu Aaron le a tefa hna nih an zulh dingmi a hmunmi phunglam a si.
Footnotes
^ Khap khat cu lehmah 8.75 hrawng a si. Thlaihhlei B14 ah zoh.
^ Amber, hyacinth, opal le tourmaline ti bantuk lungvar phun khatkhat a si kho men.
^ Biafang Fianternak ah zoh.
