Exodus 18:1-27
18 Moses a nupi i a pa, Midian tlangbawi Jethro nih Moses le Israel mi caah Jehovah Pathian nih a tuahmi vialte le Israel mi Izipt ram in a chuahpi hna ning kha a rak theih.
2 Moses nih inn ah a tluntermi a nupi Zipporah kha Jethro nih a zohkhenh.
3 Zipporah fapale pahnih zong a zohkhenh hna. Moses nih a fapa pakhat cu “Kei cu ramdang ah khual ka si cang” tiah a ti i Gershom* tiah min a sak.
4 A dang pakhat cu “Ka pa Pathian cu a ka bawmtu le Faraoh vainam in a ka khamhtu a si” tiah a ti i Eliezer* tiah min a sak.
5 Jethro nih Moses nupi le a fapale kha ramcar i riahhmun an khuarnak, a hmaanmi Pathian tlang ah Moses sinah cun a ratpi hna.
6 Cun Moses sinah “Keimah Jethro le na nupi le na fapale pahnih cu na sinah kan ra lio” tiah bia a cah.
7 Moses cu a nupi pa kha ton awkah a va kal colh i a hmaiah a kun i a hnamh. Cun pakhat le pakhat thawng an i hal i thlam chung ah an lut.
8 Moses nih a nupi pa cu Jehovah nih Israel mi caah Faraoh cung ah le Izipt ram i a tuahmi vialte kha a chimh. Lampi ah an tonmi harnak kong hna le Jehovah nih a khamh hnanak kong vialte zong a chimh.
9 Jehovah nih Israel mi kha Izipt mi kut in a khamh hna i an cung ah a tuahmi ṭhatnak kong vialte a theih tikah Jethro cu aa lawm tuk.
10 Cun Jethro nih “Izipt mi hna kut le Faraoh kut in aan khamhtu hna Jehovah cu thangṭhat si ko seh. Izipt mi hremnak in Israel mi a luattertu Pathian cu thangṭhat si ko seh.
11 A miphun cung ah porhlaw ngai in a ummi kha dan a tat hna caah Jehovah cu a dang pathian vialte nakin a lianngan deuh ti kha ka hngalh cang” tiah a ti.
12 Moses a nupi pa Jethro nih Pathian sinah khangh thawinak le raithawinak a rak put. Cun Aaron le Israel upa vialte cu Jethro he rawl eiṭi awkah a hmaanmi Pathian hmaiah an ra.
13 A thaizing ah Moses cu mizapi an bia ceihpiak awkah a ṭhut tawnnak ah khan a ṭhu. Zingka in zanlei tiang Moses hmaiah mi cu an dir ko.
14 Moses nih mi vialte caah a tuahmi kha Jethro nih a hmuh tikah “Zeicah hitihin na tuah? Zeicah nangmah lawng in na ṭhut i mi cu zingka in zanlei tiang na hmaika ah an dir ko?” tiah a ti.
15 Moses nih cun “Pathian sin lamhruainak hal awkah ka sinah an ratmi a si.
16 Pakhat le pakhat karlak ah buainak an ngeih tikah ka sinah an ra i an bia ka ceihpiak hna. Cun a hmaanmi Pathian biakhiahnak le a nawlbia kha ka hngalhter hna” tiah a leh.
17 Cun Jethro nih hitin a ti: “Na thil tuah ning hi a ṭha lo.
18 Nangmah he, hi mi hna he nan ba tuk lai. Zeicahtiah hi rian cu a rit tuk i nangmah lawng in na phor kho lai lo.
19 Ka chimmi hi ngai law ruahnak kaan cheuh lai. Pathian nih aan umpi ko lai. A hmaanmi Pathian hmaiah mizapi aiawhtu na si lai i an tonmi buainak cu a hmaanmi Pathian sinah na chuahpi lai.
20 Pathian phunglam le nawlbia kha na cawnpiak hna lai i an zulh awk a simi le an tuah awk a simi kha na hngalhter hna lai.
21 Cun Israel mi pa hna lakin thil a ti khomi, Pathian a ṭihmi, zumhawk a tlakmi, a ding loin mah ca ṭhatnak a kawl lomi kha na thim hna lai i thong khat haotu, za khat haotu, sawm nga haotu, pahra haotu in rian na pek hna lai.
22 Annih nih buainak a chuah tikah mi cu biaceih ko hna seh. Bia ngan deuh a si ahcun na sinah rak chuahpi hna seh law, bia hme deuh a si ahcun anmah tein biachahnak tuah ko hna seh. Cuticun na caah a fawi deuh lai i na thilrit zong an in chaan lai.
23 Cutin na tuah i Pathian duhnak a si ahcun na tha a dam deuh lai i mi vialte zong lungtling tein inn ah an ṭin lai.”
24 Moses nih a nupi pa chimmi kha a ngaih i a chim ning te cun a tuah dih.
25 Moses nih Israel mi lakin thil a ti khomi pa kha a thim hna i thongkhat haotu, zakhat haotu, sawm nga haotu, pahra haotu tiin rian a pek hna.
26 Cucaah annih nih buainak a chuah tikah mi cu an bia an ceihpiak hna. Bia ngan deuh kha Moses sinah an chuahpi i bia hme deuh kha anmah tein bia an chah.
27 Mah hnuah Moses nih a thlah i Jethro cu a ram lei ah a kir.
