Exodus 7:1-25
7 Jehovah nih Moses kha “Nang cu Faraoh caah Pathian bantuk in kaan ser cang.* Na u Aaron cu na profet a si lai.
2 Kaan chimhmi vialte kha na u Aaron cu na chimh lai i Faraoh sinah amah nih bia a chim lai. Cun Faraoh nih Israel mi kha a ram in a chuahter hna lai.
3 Faraoh cu a lungkhon awkah ka awnh lai i Izipt ram ah hmelchunhnak le khuaruahhar thil tampi ka tuah lai.
4 Asinain Faraoh nih nan bia kha a ngai lai lo. Cucaah Izipt ram cu a ṭhawngmi ka kut in fakpi in dan ka tat lai i ka miphun Israel mi, mibupi cu Izipt ram in ka chuahpi hna lai.
5 Izipt ram cu ka kut in dan ka tat i Israel mi kha an sinin ka chuahpi hna tikah Izipt mi nih keimah cu Jehovah ka si ti kha an hngalh hrimhrim lai” tiah a ti.
6 Moses le Aaron nih Jehovah nawl pekmi ning in an tuah; a fial hna ning in an tuah dih.
7 Faraoh sin bia an chim lioah Moses cu kum 80 a si i Aaron cu kum 83 a si.
8 Jehovah nih Moses le Aaron cu,
9 “Faraoh nih ‘Khuaruahhar thil pakhat in tuah u’ aan ti hna ahcun Aaron kha ‘Na ṭhiangṭhunh cu i lak law Faraoh hmaiah hlonh’ na ti lai i ṭhiangṭhunh cu rul nganpi ah aa cang lai” tiah a ti.
10 Cuticun Moses le Aaron cu Faraoh sinah an kal i Jehovah nih a fial hna ning tein an tuah. Aaron nih a ṭhiangṭhunh cu Faraoh le a bawile hmaiah a hlonh i rul nganpi ah aa cang.
11 Asinain Faraoh nih a mifim pawl le camhthiam pawl kha a auh hna. Izipt ram i mitleh thiam hna zong nih an mitleh thiamnak kha hmang in cutin an tuah ve.
12 An ṭhiangṭhunh cu an hlonh cio tikah rul nganpi ah an i cang dih; Asinain Aaron ṭhiangṭhunh nih an ṭhiangṭhunh cu a dolh dih hna.
13 Asinain Faraoh cu a lung a khong ṭhiamṭhiam, Jehovah nih a chim bantuk te khan an bia cu a ngai duh lo.
14 Mah tikah Jehovah nih Moses cu hitin a ti: “Faraoh cu a lung aa thleng hlei lo. Ka mi pawl kha a thlah duh hna lo.
15 Thaizing zingka ah Faraoh cu Nile Tiva ah a kal lai. Nile Tivakam ah cun va hngak law va tong! Cun rul ah aa cangmi na ṭhiangṭhunh kha i put.
16 Cun hitin na va ti lai, ‘Hebru mi hna Pathian Jehovah nih na sinah a ka thlah i “Ka miphun nih ramlak ah an ka biak khawh nakhnga kalter hna” tiah aan ti. Asinain atu tiang na ngai duh lo.
17 Cucaah Jehovah nih “Ka tuah dingmi thil hna in keimah cu Jehovah ka si kha na hngalh lai. Ka kut ah a ummi ṭhiangṭhunh in Nile Tiva ti cu ka tuk lai i thi ah aa cang lai.
18 Nga cu an thu dih lai i Nile Tiva cu a thut in a thu lai. Cucaah Izipt mi nih Nile Tiva ti cu an ding kho lai lo” tiah a ti.’”
19 Cun Jehovah nih Moses cu “Aaron kha ‘Na ṭhiangṭhunh cu i lak law Izipt ram i a ummi ti vialte cung ah hler tuah. Tiva, kahcham, cerh le tidil hna cung ah hler tuah. Ti vialte cu thi ah an cang lai’ tiah hei chim. Izipt ram chung i ti vialte cu thi ah aa cang lai, thing le lung in sermi umkheng chung i ti hmanh thi ah an i cang lai” tiah a ti.
20 Jehovah nih a fial hna ning in Moses le Aaron nih an tuah colh. Faraoh le a bawile hmaiah a ṭhiangṭhunh cu a hler i Nile Tiva ti cu a tuk tikah thi ah aa cang dih.
21 Tiva ah a ummi nga vialte cu an thi dih i tiva ti cu a thu. Cucaah Izipt mi nih Nile Tiva ti cu an ding kho ti lo, Izipt ram pumpi cu thi in a khat.
22 Asinain Izipt ram i camhthiam hna zong nih an camhthiamnak kha hmang in cutin an tuah khawh ve caah Faraoh cu a lung a khong ṭhiamṭhiam. Jehovah nih a chim bantuk te khan an bia cu a ngai duh lo.
23 Cun Faraoh cu inn ah a ṭin i cu thil hna cu zeihmanh ah a rel lo.
24 Izipt mi nih Nile Tiva ti cu an din khawh ti lo caah din awk ti an hmuh nakhnga Nile Tiva pawngkam ah khor an cawh.
25 Cuticun Jehovah nih Nile Tiva a tuknak cu ni sarih a si cang.
Footnotes
^ A hrampi, “Pathian ah kaan ser cang.”
