Exodus 14:1-31
14 Jehovah nih Moses cu,
2 “Israel mi cu hnulei ah kir ṭhan u law Migdol le rili karlak ah a ummi Pihahiroth hmai, Baal-zefon hmai i rilikam ah riahhmun khuar u tiah chim hna.
3 Faraoh nih Israel mi cu ‘Lam an tlau i ramcar in an chuak kho ti lo’ tiah a ruah lai.
4 Faraoh cu a lungkhon awkah ka awnh lai i nan hnulei in aan dawi hna lai. Faraoh le a ralkap vialte cu ka sunghter hnanak thawng in ka min cu sunparnak ka pek lai; keimah cu Jehovah ka si ti kha Izipt mi nih an hngalh hrimhrim lai” tiah a ti. Cuticun Israel mi nih an tuah.
5 Mah hnuah Israel mi cu an kal cang tiah Izipt siangpahrang cu an rak chimh. Mahle cangka Faraoh le a bawile cu an lungput aa thleng i “Zeicah cutin kan rak tuah? Zeicah Israel mi cu sal sinak in kan luatter hna?” tiah an ti.
6 Faraoh nih raltuknak rangleng kha a timhtuah i a ralkap he an dawi hna.
7 Izipt ram i a ṭha bikmi rangleng 600 le a dang rangleng vialte zong aa kalpi hna i cu rangleng cung ah cun ralkap an um cio.
8 Jehovah nih Izipt siangpahrang Faraoh cu lungkhon awkah a awnh caah Israel mi cu a dawi hna, mah lioah Israel mi cu teinak he* an rak chuak cang.
9 Izipt mi nih an dawi hna i Faraoh rangleng le rang cung ralkap le a ralkap hna nih cun Baal-zefon hmai, Pihahiroth pawng rilikam i an riahnak ah cun an va phak hna.
10 Faraoh le Izipt mi nih an naih thluahmahmi hna kha Israel mi nih an hmuh tikah an ṭih tuk i Jehovah sinah bawmhnak hal in an au.
11 Moses kha “Izipt ram ah vuinak hmun a um lo caah maw hika ramcar ah hin thih ding in na kan ratpi? Zeicah kan cung ah hitin na tuah? Zeicah Izipt ram in na kan chuahpi?
12 Izipt ram kan um lio tein ‘Rak kan kaltak ko, Izipt mi hna sal si cang ko u sih’ kan in ti lo maw? Ramcar ah thihnak in cun Izipt mi hna sal si hmanh kan caah a ṭha deuh lai” tiah an ti.
13 Mah tikah Moses nih “Ṭih hlah u. Fek tein dir u law nihin ah nanmah khamh awkah Jehovah nih zeidah a tuah lai ti kha zoh tuah u. Nihin ah nan hmuhmi Izipt mi hna hi zeitik hmanh ah nan hmu ṭhan ti hna lai lo.
14 Jehovah theng te nih aan dohpiak hna lai i nannih cu dai tein nan um ko lai” tiah a ti.
15 Jehovah nih Moses cu “Zeicah na ka auh len ko? Israel mi kha an khuallam peh awkah chim hna.
16 Na ṭhiangṭhunh kha hler law rili cung ah na kut kha samh, rili cu ṭhen hnih ah aa ṭhen lai i Israel mi cu rili chung khan lei ro cung ah an kal kho lai.
17 Izipt mi hna cu an lungkhon awkah ka awnh lai i nan hnu in an in dawi hna lai. Faraoh le a ralkap vialte, raltuknak rangleng le rang cung ralkap hna cu ka sunghter hnanak thawng in sunparnak ka hmu lai.
18 Faraoh le raltuknak rangleng le rang cung ralkap hna cu ka sunghter hnanak thawng in sunparnak ka hmuh tikah keimah cu Jehovah ka si ti kha Izipt mi nih an hngalh hrimhrim lai” tiah a ti.
19 Israel mi hna hmaiah a kalmi, a hmaanmi Pathian vancungmi cu an hnulei ah aa ṭhial, an hmaiah a ummi minmei tung cu aa ṭhial i an hnulei ah a dir.
20 Cuticun minmei tung cu Izipt mi le Israel mi hna karlak ah a um. Minmei tung nih Izipt mi hna lei kha a muihter i Israel mi hna lei kha a ceuter. Cucaah Izipt mi hna nih Israel mi cu zan khuadei an naih kho hna lo.
21 Moses nih rili cung ah a kut a samh tikah Jehovah nih nichuahlei thli kha zan khuadei fakpi in a hranter i ti cu ṭhen hnih ah aa ṭhen. Rili tawne cu lei ro ah aa cang.
22 Israel mi cu rili chung khan lei ro cung ah an kal, ti cu orhlei le kehlei ah vanpang bantuk in aa chong.
23 Izipt mi nih cun an dawi hna. Faraoh rang le raltuknak rangleng le rang cung ralkap hna nih cun rili chung tiang an hnulei in an dawi hna.
24 Khuadei lai te* ah Jehovah nih mei tung le minmei tung in Izipt ralkap kha a zoh hna i a buaiter hna.
25 An rangleng mawngh a har nakhnga an leng kekual kha a thlonghpiak hna. Mah tikah Izipt mi nih “Israel mi hna sinin zam u sih, Jehovah nih Israel mi lei ah ṭang in a kan doh” tiah an ti.
26 Jehovah nih Moses cu “Izipt mi le raltuknak rangleng le rang cung ralkap kha ti nih a khuh dih hna nakhnga na kut kha rili cung ah samh tuah” tiah a ti.
27 Moses nih rili cung ah a kut a samh i khua a dei lai te ah rili cu amah ningkel in a siter. Izipt mi cu an zam len nain Jehovah nih rili chung ah a paih hna.
28 Ti cu a kir ṭhan i rili chung tiang Israel mi a dawimi raltuknak rangleng le rang cung ralkap le Faraoh ralkap vialte cu a khuh dih hna. A luatmi pakhat hmanh an um lo.
29 Asinain Israel mi cu rili chung khan lei ro cung ah an kal, ti cu an orhlei le an kehlei ah vanpang bantuk in aa chong.
30 Cu ni ah Jehovah nih Israel mi cu Izipt mi hna kut chung khan a khamh hna, Israel mi nih rilikam ah Izipt mi a thimi kha an hmuh hna.
31 Jehovah nih a liannganmi a ṭhawnnak* in Izipt mi a hrawh hna kha Israel mi nih an hmuh tikah Jehovah kha an hun ṭih, cun Jehovah le a sal Moses cung ah zumhnak an hun ngei.
