Exodus 4:1-31
4 Asinain Moses nih “An ka zum lo i ka bia ngaih loin ‘Jehovah cu na sinah a lang bal lai lo’ tiah an ka ti ah tah, zeitin?” tiah a ti.
2 Jehovah nih “Na kut ah a ummi kha zeidah a si?” tiah a hal tikah “Ṭhiangṭhunh” tiah a leh.
3 Pathian nih cun “Vawlei ah hlonh” tiah a ti i a hlonh tikah rul ah aa cang. Cucaah Moses cu a zam.
4 Jehovah nih Moses cu “A mei in khan hei tlai” tiah a ti i a tlaih tikah a kut chung ah cun ṭhiangṭhunh ah aa cang ṭhan.
5 Pathian nih “Pupa hna Pathian, Abraham Pathian, Isak Pathian le Jakob Pathian Jehovah cu na sinah a lang ti kha mah nih hin a zumhter hna lai” tiah a ti.
6 Cun Jehovah nih cun “Na kut kha na angki chung ah hei pur” tiah a ti. Cucaah a purh i a hun chuah ṭhan tikah a kut cu thinghmui nih a tlunh i hawhra bantuk in a raang dih!
7 Pathian nih cun “Na angki chung ah na kut cu hei pur ṭhan” tiah a ti. Cucaah a kut cu a angki chung ah a purh i a chuah ṭhan tikah a kut cu a hmasa a taksa ning tein a si ṭhan!
8 Pathian nih cun “An in zumh lo i a pakhatnak hmelchunhnak kha zei ah an rel lo ahcun a pahnihnak tal nih cun an lung a pemh te ko hna lai.
9 Hmelchunhnak a pahnih ning in an zumh lo i na bia an ngaih rih lo ahcun Nile Tiva ti kha tlawmpal in than law lei ro ah hei thle. Mah ti cu thisen ah aa cang lai” tiah a ti.
10 Moses nih Jehovah cu “Jehovah, rak ka ngaithiam ko. Kei cu a hlan tein siseh, nangmah nih na ka chawnh hnu zong ah siseh, biachim holhrel ka thiam bal lo. Mi holhhak le leichum kaa-aa ka si” tiah a ti.
11 Jehovah nih cun “Minung hmurkaa hi aho nih dah a ser? A holh kho lomi, a hna a chetmi, khua a hmumi, khua a hmu lomi hna hi aho nih dah a ser hna? Keimah Jehovah ka si lo maw?
12 Cucaah atu va kal. Bia na chim tikah kaan umpi lai i na chim dingmi kha kaan cawnpiak lai” tiah a ti.
13 Asinain Moses nih “Jehovah, rak ka ngaithiam ko. Zaangfahnak in midang tu thlah ko hna” tiah a ti.
14 Mah tikah Jehovah cu Moses cung ah a thin a hung i “Levi mi na u Aaron pei a um ko kha. Anih cu biachim a thiam ngaimi a si ti ka hngalh. Atu hi nangmah ton awkah a ra lio. Aan hmuh tikah aa lawm tuk ko lai.
15 Kaan chimhmi bia hi amah cu na chimh lai. Bia nan chim tikah nan pahnih in kaan umpi hna lai i nan tuah dingmi kha kaan cawnpiak hna lai.
16 Aaron cu nangmah aiawh in zapi hmaiah biachimtu a si lai i nang cu a caah Pathian aiawhtu na si lai.
17 Hi ṭhiangṭhunh hi i put law hi ṭhiangṭhunh in hin khuaruahhar thil hna na tuah lai” tiah a ti.
18 Moses cu a nupi pa Jethro sinah a kir i “Izipt ram ah a ummi ka unau pawl an nung rih maw ti hngalh awkah rak ka kalter ko” tiah a nawl. Jethro nih cun “Him tein va kal ko” tiah a ti.
19 Mah hnuah Jehovah nih Midian ram ah Moses cu “Izipt ram ah va kir cang. Zeicahtiah nangmah thah aan timtu vialte cu an thi dih cang” tiah a ti.
20 Cucaah Moses nih a nupi le a fapale cu laa cung ah a chuan hna i Izipt ram ah a kir. Cun Moses nih a hmaanmi Pathian ṭhiangṭhunh kha aa put.
21 Jehovah nih Moses cu hitin a ti: “Izipt ram i na kir tikah kaan pekmi ṭhawnnak in Faraoh hmaiah khuaruahhar thil vialte kha na tuah lai. Asinain a lungkhon awkah ka awnh lai i ka mi kha a thlah duh hna lai lo.
22 Mah tikah Faraoh kha ‘Jehovah nih “Israel cu ka fater a si.
23 Kaan chimh lai, ka fapa nih a ka biak khawh nakhnga kalter ko. Asinain na kalter duh lo ahcun na fater kha ka thah lai” a ti’ tiah na ti lai.”
24 Cuticun lampi i riahnak hmun an phanh tikah Jehovah cu a sinah cun a lang i amah kha thah a timh.
25 Mah tikah Zipporah nih lung haar pakhat kha a lak i a fapa cuarpar cu a tan. Mah a tanmi cuarpar in khan a ke ah a tawngh i “Nang cu hi thisen thawng in ka va na si” tiah a ti.
26 Cucaah Pathian nih cun a thlah. Zipporah nih cun “Cuarpar tan ruang ah nang cu hi thisen thawng in ka va na si” tiah a ti.
27 Mah hnuah Jehovah nih Aaron kha “Moses ton awkah ramcar ah va kal” tiah a ti. Cucaah a kal i a hmaanmi Pathian tlang ah Moses cu a hmuh tikah a hnamh.
28 Moses nih Aaron cu amah a thlahtu Jehovah bia vialte le a tuahtermi khuaruahhar thil kong vialte kha a chimh.
29 Mah hnuah Moses le Aaron cu an va kal i Israel upa vialte kha an pumh hna.
30 Jehovah nih Moses sinah a chimmi bia vialte kha Aaron nih cun a chimh hna i zapi hmaiah Moses nih khuaruahhar thil hna a tuah.
31 Mah tikah mizapi nih an zumh. Jehovah nih Israel mi kha a philh hna lo i an harnak kha a hmuh ti an theih tikah an kun i an bawk.
