Exodus 23:1-33
23 “A hmaan lomi thawngpang kha karhter hlah u. Miṭhalo lei ah ṭang in a hmaan lomi tehte va si hlah u.
2 Ṭhatlonak tuah awkah mi tam deuh hnu kha va zul hlah u. Cun mi tam deuh lei ah ṭang in biatak a merhmi tehte va si hlah u.
3 Misifak an bia nan ceihpiak hna tikah a si a fah caah tiin thleidannak ngei hlah u.
4 “Nan ral i a cawtum siseh, a laa siseh lam a tlaumi nan hmuh ahcun a sinah hruai ṭhan u.
5 Aan huatu i a laa cu a thil nih a nenh nan hmuh ahcun zeirel loin nan kaltak lai lo. A thilrit kha nan cawipiak lai i nan bawmh lai.
6 “Misifak kha bia nan ceih hna tikah ding tein bia va ceih u.
7 “A hmaan loin sualphaw hna hlah u. Sualnak a ngei lomi le a dingmi kha that hna hlah u. Zeicahtiah miṭhalo kha miding tiah ka ti lai lo.
8 “Ziknawh nan la lai lo. Zeicahtiah ziknawh nih mifim kha an mit a cawtter hna i miding hmanh kha an bia a merh khawh.
9 “Ramdang mi kha hrem hna hlah u. Nannih zong Izipt ram ah ramdang mi nan si bal ve caah ramdang mi si cu zeidah a lawh ti kha nan hngalh ko.
10 “Kum ruk chung nan lo kha nan thlawh lai i a chuakmi theitlai kha nan khawmh lai.
11 Asinain kum sarihnak ah cun nan lo kha nan thlo lai lo i nan dinhter lai. Nan lo in a vuimi theitlai kha misifak nih an ei lai i an nganhtakmi kha ramsa nih an ei lai. Nan mitsur dum le nan oliv dum zong cuticun nan tuah lai.
12 “Ni ruk chung rian nan ṭuan lai i ni sarihnak ni ah cun nan rian in nan i din lai. Cuticun nan cawtum le nan laa zong an i din kho lai i nan salle le ramdang mi zong an i hrim kho lai.
13 “Kaan chimhmi hna vialte hi ṭha tein nan zulh lai i pathian dang min kha nan au lai lo. Nan kaa zong in nan chim lai lo.
14 “Kum khat ah voi thum ka caah puai nan tuah lai.
15 Thilnu Phulh Lo Changreu Puai kha nan tuah lai. Abib* thla i rikhiahmi caan ah nawl kaan pek hna bantuk in ni sarih chung thilnu phulh lo changreu kha nan ei lai. Zeicahtiah cu thla ah cun Izipt ram in nan rak chuak. Ahohmanh kut ro in ka hmaiah nan chuak lai lo.
16 Nan lo in theitlai hmasa bik nan zun tikah Rawl Ṭuan Puai* nan tuah lai. Cun kum dongh tikah nan lo theitlai nan khawmh dih hnuah Rawl Khawmh Puai* nan tuah lai.
17 Kum khat ah voi thum pa vialte cu a hmaanmi Bawipa Jehovah hmaiah an chuak lai.
18 “Ka sin i rai nan thawi tikah a thi kha thilnu phulhmi changreu he nan ka pe lai lo. Ka puai ah nan ka pekmi a thau cu a thaizing tiang nan taanter lai lo.
19 “Nan lo chung chuak a ṭha bikmi theitlai hmasa bik kha nan Pathian Jehovah inn ah nan rak put lai.
“Meheh fa kha a nu hnuk he nan chuangṭi lai lo.
20 “Lampi ah nanmah huhphenh awk le kaan timhpiakmi hna hmun i luhpi awkah nan hmaiah vancungmi pakhat kha ka thlah.
21 A bia kha ṭha tein ngai u law zul u. Amah cu ralchan hlah u. Zeicahtiah amah cu ka min putu a si caah nan nawl buarnak kha aan ngaithiam hna lai lo.
22 A bia kha a dikthliar in nan zulh i ka chimmi vialte kha nan tuah ahcun nan ral kha kaan dohpiak hna lai i aan ralchanhtu hna kha ka ralchanh ve hna lai.
23 Ka vancungmi cu nan hmaiah a kal lai i Amor mi, Hit mi, Periz mi, Kanaan mi, Hiv mi le Jebus mi hna ram ah aan kalpi hna lai. Annih cu ka hrawh dih cikcek hna lai.
24 An pathian hna kha nan kunpiak hna lai lo i nan bia hna lai lo. An tuah bantuk zong in nan tuah ve lai lo. Mah canah an pathian hna kha nan hrawh dih hna lai i an biaknak lungphun hna zong nan khuai dih cikcek hna lai.
25 Nan Pathian Jehovah lawng kha nan ka biak lai i nan ti le nan rawl kha thluachuah kaan pek hna lai. Nan sinin zawtnak ka hloh lai.
26 Nan ram chung ah nau aa rawkmi le a cingmi nu an um lai lo i nunkhua saunak kaan pek hna lai.
27 “Nan phanh hlan in keimah kha an ka ṭih cang lai. Nanmah aan dotu miphun vialte cu ka tuaiter dih hna lai. Nan ral vialte cu an sung lai i nan sinin ka zamter hna lai.
28 Nan phanh hlan in nan ral kha an lung ka donghter hna lai* i Hiv mi, Kanaan mi le Hit mi cu nan hmai in ka dawi dih hna lai.
29 Asinain kum khat chung ah cun ka dawi dih hna lai lo. Zeicahtiah ram cu a king sual lai i sahrang zong an karh lai i harnak an in pek sual hna lai.
30 Tefa tampi nan ngeih i hi ram cu nanmah ta a si hlan tiang nan hmai in tlawmtete in ka ṭhawl hna lai.
31 “Nan ramri cu Rili Sen in Filistin rili tiang, ramcar in Zufrates Tiva tiang a si lai. Cuka ram ah a ummi hna kha nan kut chung ah kaan pek hna lai i annih cu nan dawi dih hna lai.
32 Anmah he siseh, an pathian hna he siseh biakamnak nan ser lai lo.
33 Keimah ralchanh in sualnak an in tuahter sual hna nakhnga lo nan ram chung ah nan umter hna lai lo. An pathian kha nan biak ahcun nan caah rap an si hrimhrim ko lai.”
Footnotes
^ Thlaihhlei B15 ah zoh.
^ Zarh Puai asiloah Pentikos Puai ti zong in auh a si.
^ Deu Puai ti zong in auh a si.
^ Asiloah “thinphang thlalau in ka umter hna lai” ti zong a si kho.
