Exodus 27:1-21
27 “Biakṭheng cu anri thing in nan ser lai; tungvang palh a si lai i a sau ah dong* nga, a kauh ah dong nga a si lai. Cun a san ah dong thum a si lai.
2 Biakṭheng a kil pali ah a ki nan ser hna lai; a ki cu biakṭheng he aa tlai lai i biakṭheng cu dar in nan hut lai.
3 Vutcam ruhnak caah balṭin, cawhlek, khengkuar, keuṭe le meiṭil ruhnak kheng hna kha nan ser lai. Biakṭheng caah hmanmi umkheng vialte kha dar in nan ser lai.
4 Biakṭheng caah dar fingrilh nan ser lai, dar in a kual pali nan ser lai i fingrilh a kil pali ah khan nan bunh lai.
5 Fingrilh cu biakṭheng a tlangkamh tang ah nan chiah lai, fingrilh cu biakṭheng a lai tiang a phan lai.
6 Biakṭheng zawnhnak laang cu anri thing in nan ser lai i dar in nan hut lai.
7 Laang kha a kual chung ah nan hrolh lai i biakṭheng nan i zawnh tikah laang cu biakṭheng a kap pahnih ah a um lai.
8 Biakṭheng cu thingphel in nan ser lai i a chung a kuami kuang bantuk a si lai. Tlang cung ah kaan hmuhsakmi bantuk in nan ser lai.
9 “Puan biakinn caah tual nan ser lai. Thlanglei kam tual caah dong 100 a saumi, la hmangṭhia thlurmi in tahmi puanzar kha nan zar lai.
10 Dar in sermi tung 20 le a kedanh 20 in nan ser lai. Tung ah a bahnak le a tlaihnak hna cu ngun in nan ser lai.
11 Chaklei kam ca zong ah dong 100 a saumi puanzar a um lai, cun dar in sermi tung 20 le a kedanh 20 a um lai. Tung ah a bahnak le a tlaihnak hna cu ngun in nan ser lai.
12 Puan biakinn tual hnulei caah dong 50 a saumi puanzar a um lai i tung pahra le a kedanh pahra a um lai.
13 Nichuahlei hoih in a ummi puan biakinn tual cu dong 50 a sau lai.
14 Puan biakinn luhnak orhlei ah dong 15 a saumi puanzar a um lai i tung pathum le a kedanh pathum a um lai.
15 Puan biakinn luhnak kehlei ah dong 15 a saumi puanzar a um lai i tung pathum le a kedanh pathum a um lai.
16 “Puan biakinn luhnak puanzar cu dong 20 a sau lai i la dum, maimaw tuuhmul, la sen le la hmangṭhia thlurmi in tahmi a si lai. A tung pali le a kedanh pali a um lai.
17 Puan biakinn kulhnak a tung vialte ah ngun in sermi a tlaihnak le a bahnak a um lai i a kedanh tu cu dar in sermi a si lai.
18 Puan biakinn a sau cu dong 100 a si lai, a kauh cu dong 50 a si lai, a san cu dong 5 a si lai. Puanzar cu la hmangṭhia thlurmi in tahmi a si lai i a kedanh cu dar in sermi a si lai.
19 Puan biakinn caah hmanmi umkheng le thilri vialte cu dar in ser an si lai, thlam khenhnak fung le tual khenhnak fung vialte zong dar in ser an si lai.
20 “Meiinn van peng awkah oliv chiti thiang kha rak put ding in Israel mi kha nawl pe hna.
21 Tonnak thlam chung, Tehte Khaannak kuang hmai i puanzar a lenglei ah Aaron le a fapale nih Jehovah hmaiah meiinn cu zanlei in zinglei tiang a alh peng nakhnga an timhtuah lai. Mah nawlbia cu Israel mi le an tefa hna nih an zulh zungzal dingmi a si.
Footnotes
^ Dong khat cu lehmah 17.5 he aa tluk. Thlaihhlei B14 ah zoh.
