Exodus 39:1-43
39 Hmunthiang i rianṭuannak caah thilthuam kha la dum, maimaw tuuhmul le la sen in dawh tein an tah. Jehovah nih Moses nawl a pekmi ning tein Aaron caah a thiangmi thilthuam kha an tah.
2 Bezalel nih tlangbawi angki kha sui hri, la dum, maimaw tuuhmul, la sen le la hmangṭhia thlurmi in a tah.
3 Sui tlap kha pan tein an den i an riam, cu sui hri cu la dum, maimaw tuuhmul, la sen le la hmangṭhia la hna he an thlur chih i tlangbawi angki cu an tah.
4 Tlangbawi angki a hnulei le a hmailei aa tonnak ah a liang hnam pahnih an ser.
5 Tlangbawi angki cu dawh te le rem tein a um nakhnga tlangbawi angki he aa pehmi taisawm kha an tah. Cu taisawm cu angki tahnak ah hmanmi sui hri, la dum, maimaw tuuhmul, la sen le la hmangṭhia thlurmi in an tah. Mah cu Jehovah nih Moses nawl a pekmi ning tein a si.
6 Cun oniks lungvar kha sui in a tlang an kamh, minkhenhnak ah ṭial bantuk in cu lung cung ah cun Israel miphun hna min kha an ṭial.
7 Bezalel nih Israel miphun hna min kha philhlonak caah tlangbawi angki i a liang hnam ah cu lungvar cu a chiah, mah cu Jehovah nih Moses nawl a pekmi ning tein a si.
8 Tlangbawi angki an tah bantuk in ṭangbenh kha sui hri, la dum, maimaw tuuhmul, la sen le la hmangṭhia thlurmi in a tah.
9 Ṭangbenh cu bil tikah tungvang palh a si i a sau khap khat,* a kauh khap khat a si.
10 Ṭangbenh cung ah cun lungvar tlar li in an benh. A pakhatnak tlar ah rubi lungvar, topaz lungvar le emeral lungvar an si.
11 A pahnihnak tlar ah hring dum lungvar, safaiar lungvar le jasper lungvar an si.
12 A pathumnak tlar ah leshem* lungvar, agate lungvar le ametist lungvar an si.
13 A palinak tlar ah krisolite lungvar, oniks lungvar le lungvar hring an si. Mah lungvar hna kha sui in a tlang an kamh.
14 Lungvar nih Israel phun 12 min kha a aiawh, lungvar pakhat cio cung ah phun khat cio i an min kha minkhenhnak cung ah ṭial bantuk in an ṭial.
15 Ṭangbenh kulhnak caah sui thiang hri kha an hrual.
16 Sui tlangkamh pahnih le sui kual pahnih kha an ser i ṭangbenh a ki pahnih ah cu sui kual pahnih cu an bunh.
17 Sui hrihrual pahnih kha ṭangbenh a ki i a kual pahnih ah an khih.
18 Sui hrihrual pahnih i a par cu a tlangkamh pahnih ah khan an khih i tlangbawi angki a hmailei a liang hnam ah an thlaih.
19 Cun sui kual pahnih kha an ser i tlangbawi angki he aa tawngmi, ṭangbenh a tanglei i a chunglei ki pahnih ah an khih.
20 Sui kual pahnih in an ser chap i tlangbawi angki a hmailei ah an khih. A liang hnam pahnih a tang i tlangbawi angki le taisawm aa pehnak a cung te ah khan a si.
21 Ṭangbenh a kual le tlangbawi angki a kual cu la dum in an ṭem chih, cuticun ṭangbenh cu taisawm a cung ah ningcang tein a um. Mah cu Jehovah nih Moses nawl a pekmi ning tein a si.
22 Cun Bezalel nih ban ngei lo angki cu a ningpi in la dum in a tah.
23 Ban ngei lo angki cu thir angki bantuk in a laifang ah a hngawng caah a awng a ser. A hngawng cu a tleh nakhnga lo a tlang a kamh.
24 Ban ngei lo angki a tanglei tlang velchum ah la dum, maimaw tuuhmul le la sen in sermi taleti kha an thlaih.
25 Sui thiang in darkhing an ser i ban ngei lo angki a tanglei tlang velchum ah taleti karlak ah an thlaih hna.
26 Tlangbawi rian an ṭuan tikah an i hrukmi, ban ngei lo angki a tanglei tlang velchum ah taleti le sui darkhing kha aa changchang in an thlai. Mah cu Jehovah nih Moses nawl a pekmi ning tein a si.
27 Aaron le a fapale caah angki fual kha la hmangṭhia in an tah,
28 cun lupawng le luchin le tawhrolh tawi zong la hmangṭhia in an tahpiak hna.
29 Cun taisawm kha la hmangṭhia thlurmi, la dum, maimaw tuuhmul le la sen in an tahpiak hna. Mah cu Jehovah nih Moses nawl a pekmi ning tein a si.
30 Sui thiang in a tleumi a per pakhat kha an ser, mah cu a thiangmi hmelchunhnak* caah a si. Cu cung ah cun “Jehovah cu a thiang” tiah an ṭial.
31 Mah sui per kha lupawng i a hmailei ah la dum in an ṭem chih, mah cu Jehovah nih Moses nawl a pekmi ning tein a si.
32 Tonnak thlam, puan biakinn he aa tlaimi rian vialte cu an liim dih, Jehovah nih Moses nawl a pekmi ning tein Israel mi nih an tuah dih. A fialmi hna ning in an tuah dih.
33 Cun annih nih Moses sinah puan biakinn le a thilri vialte kha an rak put: a hrenh, a tungtlang, a thingthluan, a tung le a kedanh;
34 puan biakinn a khuh caah sii sen buhmi tuukawng phaw, rili saihrem phaw le puanzar;
35 Tehte Khaannak kuang le a laang le a chin;
36 cabuai le cabuai cung thilri vialte le Pathian hmai hunhmi changreu;
37 sui thiang in sermi mei vannak tung, meiinn le a tlar in a ummi meiinn le a thilri vialte le mei vannak chiti;
38 sui in sermi biakṭheng, thuhmi chiti, rimhmui, puan thlam luhnak puanzar;
39 dar in sermi biakṭheng, dar fingrilh, a laang, biakṭheng thilri vialte, hmaihum le a tohnak;
40 tual puanzar, a tung, a kedanh, tual luhnak puanzar, thlam hri, thlam khenhnak fung le tonnak thlam, puan biakinn rianṭuannak he aa tlaimi thilri vialte;
41 hmunthiang i rianṭuannak caah dawh tein tahmi thilthuam, tlangbawi Aaron caah a thiangmi thilthuam le tlangbawi rian a ṭuan dingmi a fapale caah thilthuam kha an rak put.
42 Jehovah nih Moses nawl a pekmi ning tein Israel mi nih cu rian vialte cu an tuah dih.
43 Moses nih an ṭuanmi rian vialte cu ṭha tein a zoh tikah Jehovah nih nawl a pekmi ning tein an tuah dih ti kha a hmuh; cucaah Moses nih thluachuah a pek hna.
Footnotes
^ Lehmah 8.75 hrawng. Thlaihhlei B14 ah zoh.
^ Amber, hyacinth, opal le tourmaline ti bantuk lungvar phun khatkhat a si kho men.
^ Asiloah “[Aaron nih] Pathian sin aa pekchanhnak a langhtermi a thiangmi hmelchunhnak; a thiangmi bawiluchin.”
