Exodus 20:1-26
20 Mah hnuah Pathian nih hi bia vialte hi a chim:
2 “Keimah cu sal nan sinak Izipt ram in aan chuahpitu hna nan Pathian Jehovah ka si.
3 Keimah hleiin Pathian dang zeihmanh nan bia lai lo.
4 “Cunglei van ah a ummi siseh, tanglei vawlei ah a ummi siseh, vawlei tang ti chung ah a ummi siseh, cu hna mui he aa lo in siasal zeihmanh nan i ser lai lo.
5 Cu hna hmaiah cun nan kun lai lo i nan bia hna lai lo. Zeicahtiah keimah nan Pathian Jehovah cu keimah lawnglawng biak awkah aan haltu hna Pathian ka si. Keimah a ka huatu cu an pale palhnak ruang ah an fale chan thum, chan li tiang in dan a tattu Pathian ka si.
6 Asinain keimah a ka daw i ka nawlbia a zulmi cung ah cun chan thong khat tiang in a fekmi dawtnak a langhtertu Pathian ka si.
7 “Nan Pathian Jehovah min kha ningcang loin hmang hlah u, ningcang loin a min a hmangmi cu Jehovah nih dantat loin a um hna lai lo.
8 “Sabbath ni cu a thiangmi ni a si ti kha philh hlah u.
9 Nan rian vialte kha ni ruk chung nan ṭuan lai,
10 ni sarihnak ni cu nan Pathian Jehovah caah sabbath ni a si. Nanmah siseh, nan fale siseh, nan salle siseh, innzuat saṭil siseh, nan sinah a rak ummi ramdang mi siseh ahohmanh rian nan ṭuan lai lo.
11 Ni ruk chung ah Jehovah nih van le vawlei le rili le a chung ah a ummi thil vialte kha a ser hna i ni sarihnak ni ah aa din. Cucaah Jehovah nih Sabbath ni kha thluachuah a pek i a thianter.
12 “Nan nu le nan pa kha upat hna u, cuticun Jehovah Pathian nih aan pekmi hna ram ah saupi nan nung kho lai.
13 “Lai nawng hlah u.
14 “Nupa sualnak tuah hlah u.
15 “Fir hlah u.
16 “Midang caah a hmaan lomi tehte si hlah u.
17 “Midang inn kha nan mit va thi hlah u. Midang nupi siseh, a salle siseh, a cawtum siseh, a laa siseh, a ngeihmi thil paohpaoh siseh nan mit va thi hlah u.”
18 Mizapi nih khuari thawng le muko thawng kha an theih i nimtlau a lekmi le tlang cung meikhu kha an hmuh tikah a ther in an ther i lamhlatpi ah an dir.
19 Cucaah Moses kha “Nangmah nih bia cu kan chim law kan ngaih ko lai. Pathian nih cun kan chim hlah seh, cu lo ahcun kan thi sual lai” tiah an ti.
20 Moses nih cun “Ṭih hlah u. A hmaanmi Pathian a ratnak cu nanmah hneksak awkah le sualnak nan tuah nakhnga lo amah nan ṭih zungzal nakhnga caah a si” tiah a ti hna.
21 Mizapi cu lamhlatpi ah an dir peng, asinain Moses tu cu a hmaanmi Pathian a umnak minmei chahpi pawng ah a va kal.
22 Jehovah nih Moses cu hitin a ti: “Hihi Israel mi kha chim hna, ‘Vancung in nan sinah bia ka chimmi kha nanmah theng nih nan hmuh cang.
23 Sui pathian siseh, ngun pathian siseh ser hlah u, keimah dah ti lo cu a dang zei pathian hmanh bia hlah u.
24 Ka caah vawlei in biakṭheng pakhat nan ser lai, cu biakṭheng cung ah cun khangh tawinak, hawikomhnak thawinak le tuu le caw kha raithawinak nan pek lai. Biaknak caah ka thimmi hmun paoh ah* nan sinah ka ra lai i thluachuah kaan pek hna lai.
25 Ka caah lung in biakṭheng nan ser ahcun hriamnam in remhmi lung kha nan hmang lai lo. Cop in remhmi lung kha nan hman ahcun biakṭheng cu ka caah a thiang lomi a si lai.
26 Biakṭheng cung nan kai tikah hleihlak in nan kai lai lo, hleihlak in nan kai ahcun nan chiaṭha a lang sual lai.’
Footnotes
^ A hrampi, “Ka min cinkennak caah ka thimmi hmun poah ah.”
