Exodus 34:1-35
34 Jehovah nih Moses kha “A hmasa lungtlap bantuk in lungtlap pahnih in ser ṭhan. Na khuaimi a hmasa lungtlap cung i aa ṭialmi bia kha cu lungtlap cung ah cun ka ṭial ṭhan lai.
2 Thaizing caah timhcia tein um. Thaizing zingka tein Sinai Tlang ah na kai lai i tlangpar ah ka hmaiah na dir lai.
3 Ahohmanh na sinah ra hna hlah seh. Tlang cung i khuazei hmanh ah ahohmanh um hna hlah seh. Tlanghram ah tuurun siseh, saṭilrun siseh tlongleng hna hlah seh” tiah a ti.
4 Cucaah Jehovah nih a fial ning in Moses nih a hmasa ta bantuk khan lungtlap pahnih cu a ser. Cun zingka tein a tho i Sinai Tlang ah a kai i lungtlap pahnih cu aa put.
5 Jehovah cu minmei in a rung ṭum. Moses pawng ah a dir i Jehovah timi a min kong kha a chimh.
6 Jehovah cu Moses hmai in a lan i “Jehovah cu zaangfahnak le zawnruahnak in a khatmi Pathian, Jehovah cu fawi tein a thin a hung lomi Pathian, a fekmi dawtnak in a khat i zumhawk a tlakmi Pathian,
7 mi thong tampi cung ah a fekmi dawtnak a langhtermi Pathian, palhnak le nawl buarnak le sualnak a ngaithiammi Pathian a si. Asinain misual mi kha dantat loin a um lo. An pale palhnak ruang ah an fale le an tule kha chan thum, chan li tiang in dan a tattu Pathian a si” tiah a ti.
8 Moses cu khulrang in a khuk aa bil i vawlei ah a bawk.
9 Cun Moses nih “Maw Jehovah, Jehovah na mithmai ṭha ka hmuh ahcun zaangfahnak in kan sinah kal ve ko. Kannih cu a lung a khongmi* kan si ko nain kan palhnak le kan sualnak kha kan ngaithiam law nangmah ta in rak kan cohlang ko” tiah a ti.
10 Pathian nih cun “Nanmah he biakamnak ka ser lai. Vawleicung pumpi ah siseh, miphun vialte hna hmaiah siseh ka tuah bal lomi khuaruahhar thil kha nan hmaiah ka tuah lai. Nan sinah a ummi mi vialte nih Jehovah rianṭuannak kha an hmuh lai. Zeicahtiah nan caah ka tuahmi thil cu khuaruahhar thil taktak an si.
11 “Nihin ah kaan pekmi hna nawlbia hi ṭha tein ngai u. Nan hmai in Amor mi, Kanaan mi, Hit mi, Periz mi, Hiv mi le Jebus mi kha ka ṭhawl hna lai.
12 Nan va luhnak ram i a ummi hna he biakamnak ser kha i ralring u, zeicahtiah mah cu nan caah rap a si kho.
13 An biakṭheng kha nan hrawh hna lai. An biaknak lungphun* kha nan khuai dih hna lai i an biaknak tungphun* kha nan hau dih hna lai.
14 A dang pathian hmaiah nan kun lai lo. Keimah Jehovah cu keimah lawnglawng biak awkah a haltu Pathian ka si.* A si! Kei cu keimah lawnglawng biak awkah a haltu Pathian ka si.
15 Hi ram ah a ummi hna he biakamnak ser kha i ralring u, zeicahtiah an pathian an biak tikah le an pathian sin rai an thawi tikah an in sawm hna lai i an raithawimi kha nan ei sual lai.
16 Mah tikah nan fapale caah an fanule kha nan ṭhit sual hna lai i an fanule nih an pathian an biak tikah* nan fapale kha an biakter sual hna lai.
17 “Thletmi milem pathian kha nan ser lai lo.
18 “Thilnu Phulh Lo Changreu Puai kha nan tuah lai. Abib* thla i rikhiahmi caan ah ni sarih chung nawl kaan pek hna bantuk in thilnu phulh lo changreu kha nan ei lai. Zeicahtiah Abib thla ah Izipt ram in nan rak chuak.
19 “Nan fater pa paohpaoh cu keimah ta an si. Nan saṭil vialte, caw siseh, tuu siseh hrin hmasa bikmi paoh cu keimah ta an si.
20 Hrin hmasa bikmi laa kha tuu in nan tlanh lai. Asinain nan tlanh lo ahcun a hngawng nan khiah lai. Fater pa paohpaoh cu nan tlanh hna lai. Ka hmaiah ahohmanh kut ro in nan chuak lai lo.
21 “Ni ruk chung rian nan ṭuan lai i a ni sarihnak ni ah cun nan i din lai. Leithuan caan le rawl ṭuan caan a si hmanh ah nan i din lai.
22 “Changvut a vui hmasa bikmi nan zun tikah Zarh Puai* nan tuah lai i kum dongh ah Rawl Khawmh Puai* nan tuah lai.
23 “Kum khat ah voi thum pa vialte cu a hmaanmi Bawipa, Israel Pathian Jehovah hmaiah nan chuak lai.
24 Nan hmai in miphun hna cu ka ṭhawl hna lai i nan ram cu ka kauhter lai. Kum khat ah voi thum nan Pathian Jehovah hmai i nan chuah tikah nan ram cu ahohmanh nih an in chut hna lai lo.
25 “Raithawinak thisen cu thilnu phulhmi zei bantuk changreu he hmanh nan pechan lai lo. Lanhtak Puai raithawimi cu a thaizing zinglei tiang nan i chiah lai lo.
26 “Nan lo chung i a ṭha bikmi theitlai hmasa bik kha nan Pathian Jehovah inn ah nan rak put lai.
“Meheh fa kha a nu hnuk he nan chuangṭi lai lo.”
27 Jehovah nih Moses kha “Hi bia hi ṭial hna, zeicahtiah hi bia ning in nangmah le Israel mi he biakamnak ka ser lai” tiah a ti.
28 Moses cu Jehovah he cuka ah ni 40 le zan 40 a um. Zeihmanh a ei lo i ti zong a ding lo. Pathian nih lungtlap cung ah cun biakamnak bia, Nawlbia Pahra kha a ṭial.
29 Mah hnuah Moses cu Tehte Khaannak lungtlap pahnih kha aa put i Sinai Tlang in a rung ṭum. Moses cu Pathian he bia an i ruah caah a hmai a ceu, asinain Moses nih mah kha a hngal lo.
30 Moses hmai a ceumi kha Aaron le Israel mi vialte nih an hmuh tikah an naih ngam lo.
31 Moses nih cun a auh hna i Aaron le mibu hruaitu vialte cu a sinah an ra. Cun Moses nih bia a ruah hna.
32 Mah hnuah Israel mi vialte cu Moses pawng ah an ra i Sinai Tlang ah Jehovah nih a pekmi nawlbia vialte kha a chimh hna.
33 Moses nih bia a chim dih hnuah a hmai cu puan in aa khuh.
34 Asinain Moses cu Jehovah he bia i ruah awkah thlam chung i a luh tikah a puan kha aa phoih. Cun a chuah ṭhan tikah Pathian pekmi nawlbia vialte kha Israel mi cu a chimh ṭhan hna.
35 Israel mi nih Moses hmai a ceumi kha an hmuh. Cucaah Moses nih Pathian he bia i ruah awkah thlam chung i a luh ṭhan hlan tiang a hmai cu puan in aa khuh.
Footnotes
^ A hrampi, “a hngawng a fekmi.”
^ Biafang Fianternak ah zoh.
^ Biafang Fianternak ah zoh.
^ Asiloah “a dang pathian biak awkah a awnh lomi Pathian ka si.”
^ A hrampi, “an pathian sin hlawh an hlan tikah.”
^ Thlaihhlei B15 ah zoh.
^ Rawl Ṭuan Puai asiloah Pentikos Puai ti zong in auh a si.
^ Deu Puai ti zong in auh a si.
