Exodus 16:1-36
16 Israel mi vialte cu Elim in an i thawh i Izipt ram in an rak chuahnak thla hnihnak thla, ni 15 ni ah Sin ramcar ah an phan. Sin cu Elim le Sinai karah a ummi a si.
2 Cu ramcar ah cun Israel mi nih Moses le Aaron kha an zai hnawh hna.
3 Israel mi nih cun “Izipt ram ah khan Jehovah kut in rak thi u sih law a ṭha deuh hnga, cu lioah cun sa-um hram ah kan ṭhu i sa le changreu kha kan duh zat in kan ei khawh. Atu cu hi ramcar ah hin kan dihlak in nan kan ratpi i mangṭam in kan thi dih cang lai” tiah an phunzai lengmang.
4 Mah tikah Jehovah nih Moses cu “Vancung in nan caah ruah bantuk in changreu ka surter lai. Mikip nih ni khat ca, nan ei khawh zat cio in nan char lai. Cuticun ka nawlbia an zul maw, zul lo ti kha ka hneksak khawh hna lai.
5 Asinain ni ruknak ni ah cun nidang i nan charmi nakin a let hnih in nan char lai i nan timhtuah lai” tiah a ti.
6 Cucaah Moses le Aaron nih Israel mi vialte kha “Izipt ram in aan chuahpitu hna cu Jehovah a si ti kha tu zanlei ah nan hngalh hrimhrim lai.
7 Zinglei zong ah Jehovah sunparnak kha nan hmuh lai. Zeicahtiah Jehovah nih amah ralchanh in nan phunzainak kha a theih cang. Zeicah kanmah cu nan kan phunzai hnawh? Kannih cu zeihmanh kan si ṭung lo” tiah an ti hna.
8 Moses nih cun “Jehovah nih zanlei ah sa aan pek hna lai i zinglei ah changreu khim tein aan pek hna lai. Zeicahtiah nan phunzainak kha Jehovah nih a theih cang. Kanmah cu ahodah kan si? Nan phunzaimi cu kanmah nan kan zai hnawhmi a si lo, Jehovah nan zai hnawhmi a si” tiah a ti.
9 Cun Moses nih Aaron kha “Israel mi cu ‘Jehovah hmaiah rak chuak u. Zeicahtiah nan phunzainak kha a theih cang’ tiah chim hna” tiah a ti.
10 Aaron nih Israel mi vialte cu a chimh hnale cangka ramcar lei ah an hoih i Jehovah sunparnak cu minmei lakah a langhmi kha an hmuh.
11 Jehovah nih Moses cu,
12 “Israel mi an phunzainak cu ka theih cang. Cucaah annih cu hitin chim hna, ‘Ni a tlak tikah sa cu nan ei lai i zinglei ah changreu kha khim tein nan ei lai. Keimah cu nan Pathian Jehovah ka si kha nan hngalh hrimhrim lai’” tiah a ti.
13 Cu zanlei ah cun nimte an ra ciamman i an riahhmun ah an khat dih. Cun zinglei ah an riahnak velchum ah dap a tla.
14 Dap a ṭian dih tikah hawhra bantuk a simi a ci hme tete nih vawlei cu a khuh dih.
15 Israel mi nih mah kha an hmuh tikah zei a si ti awk an hngal lo i “Zeidah a si?” tiah pakhat le pakhat an i hal. Moses nih “Jehovah nih rawl caah aan pekmi hna changreu a si.
16 Hihi Jehovah nawlbia cu a si, ‘Mikip nih nan ei khawh zat cio in nan char lai. Nan thlam chung ah a ummi milu ning in mi pakhat caah omer pakhat* cio in nan char lai’” tiah a ti.
17 Israel mi nih cuticun an tuah. A cheu nih tam deuh in an char i a cheu nih tlawm deuh in an char.
18 Omer in an tah tikah tam deuh in a charmi zong tam deuh an ngei hlei lo i tlawm deuh a charmi zong an chambau hlei lo. Mikip nih an ei khawh zat cio in an char.
19 Moses nih cun “Ahohmanh nih zinglei tiang in i chiah hlah u” tiah a ti hna.
20 Asinain a cheu nih Moses bia kha an ngai lo i zinglei tiang an i chiah tikah changreu cu tholung in a khat i a thu dih. Cucaah Moses cu an cung ah a thin a hung tuk.
21 Zing fatin te mikip nih an ei khawh zat cio kha an char. Ni a hun linh tikah changreu cu an ti dih.
22 Ni ruknak ni ah changreu kha a let hnih in an char. Mi pakhat caah omer pahnih cio in an char. Cucaah Israel mi hruaitu vialte cu Moses sinah an kal i cu kong cu an va chimh.
23 Mah tikah Moses nih “Mah cu Jehovah nih a chimmi a si. Thaizing cu Jehovah caah dinh ni, a thiangmi sabbath ni a si. Cucaah changreu cu rawh nan duhmi kha raw u law chumh nan duhmi kha chum u. Cun a taangmi kha zingka tiang i chiah u” tiah a ti hna.
24 Moses nih nawl a pek hna bantuk in zingka tiang an i chiah tikah changreu cu a thu lo i tholung zong a um lo.
25 Moses nih cun “Nihin cu hihi ei u, zeicahtiah nihin cu Jehovah caah sabbath ni a si. Nihin ah cun vawlei ah changreu nan hmu lai lo.
26 Changreu kha ni ruk chung nan char lai, asinain ni sarihnak ni, Sabbath ni ah cun zeihmanh a um lai lo” tiah a ti hna.
27 Ni sarihnak ni ah mi cheukhat cu changreu char awkah an va kal nain zeihmanh an hmu lo.
28 Cucaah Jehovah nih Moses cu “Zei can tiang dah ka nawlbia le ka phunglam hi zulh loin nan um lai?
29 Jehovah nih Sabbath ni aan pekmi hna kha philh hlah u. Cucaah ni ruknak ni ah ni hnih ca in changreu aan pekmi hna a si. Ni sarihnak ni ah mikip cu nan umnak hmun cio ah nan um awk a si i ahohmanh nan chuak lai lo” tiah a ti.
30 Cucaah Israel mi cu ni sarihnak ni, Sabbath ni ah an i din.
31 Israel mi nih cu changreu cu “manna”* tiah an auh. Manna cu nannan ci bantuk a si, a raang i a thawtnam cu khuaihliti cawhmi changper bantuk a si.
32 Moses nih cun “Jehovah nih hitin nawl aan pek hna, ‘Izipt ram in kaan chuahpi hna lioah ramcar ah ei awk kaan pekmi hna changreu kha hmailei nan tefa hna nih an hmuh khawh nakhnga omer pakhat in i chiah u’” tiah a ti.
33 Cun Moses nih Aaron cu “Um pakhat in hei la law a chung ah manna changreu kha omer pakhat in hei chia. Mah cu techin fapar hna hmuh awkah Jehovah hmaiah chia” tiah a ti.
34 Jehovah nih Moses nawl a pek bang in Aaron nih cu um cu a him nakhnga Tehte Khaannak Kuang* hmaiah a chiah.
35 Israel mi nih mi an umnak ram an phanh hlan tiang, kum 40 chung manna changreu cu an ei. Kanaan ramri an phanh hlan tiang manna changreu cu an ei.
36 Omer pakhat cu ephah pakhat* i cheuhra cheukhat a si.
Footnotes
^ 2.2 L hrawng. Thlaihhlei B14 ah zoh.
^ Biafang Fianternak ah zoh.
^ A biapimi ca hna fimnak kuang a si kho.
^ Ephah pakhat cu 22 L he aa tluk. Thlaihhlei B14 ah zoh.
