Exodus 5:1-23
5 Mah hnuah Moses le Aaron cu Faraoh sinah an va kal i “Israel mi hna Pathian Jehovah nih ‘Ka mi hna nih ka caah ramlak ah puai an tuah khawh nakhnga kalter hna seh’ aan ti” tiah an ti.
2 Asinain Faraoh nih “Jehovah cu ahodah a si? Zeicah a bia cu ka ngaih lai i Israel mi cu ka kalter hna lai? Jehovah cu ka hngal hrimhrim lo i Israel mi zong ka kalter kho hna lai lo” tiah a ti.
3 Asinain annih nih “Hebru mi hna Pathian cu kan sinah a lang. Cucaah zaangfahnak in kan Pathian Jehovah sin raithawi awkah nithum lamkal aa hlatnak ramlak ah rak kan kalter ko; mah lo ahcun pulrai asiloah vainam in dan a kan tat sual lai” tiah an ti.
4 Izipt siangpahrang nih cun “Moses le Aaron, zeicah hi mi hna hi an rian nan ṭhulh hna? Nan rian kha va ṭuan ṭhan ko u!
5 Hi mi hna cu ram chung ah zeitluk in dah an tam ti kha zoh tuah u. An rian dinhter in nan sinah kalter ding cu zeitindah a si khawh lai?” tiah a ti.
6 Cu ni hrimhrim ah cun Faraoh nih rian bawi hna le Israel mi kuli khawng hna kha hitin nawl a pek hna:
7 “Hi mi hna hi tlakrawh sernak caah capawl pe ti hna hlah u. Anmah tein va i kawl hna seh.
8 Asinain a hmasa an sermi zat ṭhiamṭhiam in tlakrawh cu nan serter hna lai. An rian kha ṭhumhpiak hna hlah u. An tha a thut caah ‘Kan Pathian sin raithawi awkah kal kan duh’ tiah an timi a si.
9 Lihbia ah lungthin an pek nakhnga lo rian kha fak chinchin in ṭuanter hna u law dinhter hna hlah u.”
10 Cucaah rian bawi le Israel mi kuli khawng hna cu mizapi sinah an va kal i “Faraoh nih ‘Capawl kaan pe ti hna lai lo.
11 Nanmah tein nan hmuh khawhnak hmun paoh ah capawl cu va i kawl u. Asinain nan sermi tlakrawh cu a hmasa zat ṭhiamṭhiam in a si lai’ a ti” tiah an ti hna.
12 Cucaah mi pawl cu capawl* kawl awkah Izipt ram pumpi ah an i ṭhenṭhek dih.
13 “Capawl pek nan si lio bantuk in nifate nan rian cu nan liim lai” tiah rian bawi pawl nih an hnawh chih hna.
14 Faraoh rian bawi pawl nih Israel mi kuli khawng pawl kha an tuk hna i “A hmasa nan sermi tlakrawh zat in nizan he, nihin he zeicah nan liim lo?” tiah an ti hna.
15 Cucaah Israel mi kuli khawng hna cu Faraoh sinah an va kal i “Zeicah na salle hi hitin na kan tuah?
16 Capawl an kan pe ti lo nain ‘Tlakrawh ser u!’ tiah an kan ti. Cun an kan tuk, mah cu na mi pawl palh a si” tiah an phunzai.
17 Asinain Faraoh nih “Nan tha a thu, nan tha thut bia a si! Cucaah ‘Jehovah sin raithawi awkah kal kan duh’ tiah nan timi a si.
18 Atu va kal u, nan rian kha va ṭuan u! Capawl cu pek nan si lai lo, asinain rikhiahmi zat in tlakrawh cu nan ser hrimhrim lai” tiah a ti hna.
19 “Nifate rikhiahmi zat in tlakrawh nan ser lai” timi nawlbia ruang ah Israel mi kuli khawng hna nih kan dirhmun cu a chia taktak ti kha an hun hngalh.
20 Faraoh sinin an rak chuah tikah anmah ton awkah a rak dir komi Moses le Aaron kha an hmuh hna.
21 Mah tikah “Jehovah nih nan tuahsernak hi hmu seh law bia in ceih ko hna seh. Zeicahtiah Faraoh le a bawile huat ding in nan kan tuah i kanmah thah awkah an kut chung ah vainam nan chiah” tiah an ti hna.
22 Mah tikah Moses nih Jehovah cu “Jehovah, zeicah hi mi hna cung ah hin harnak na tlunter? Zeicah keimah hi na ka thlah?
23 Na min in Faraoh hmaiah bia ka chim ni thawk in hi mi hna hi fakpi in a hrem chinchin hna. Nangmah nih le na mi pawl cu na khamh fawn hna lo” tiah a ti.
Footnotes
^ A hrampi, “capawl caah capawl kung.”
