Exodus 37:1-29
37 Bezalel nih anri thing in kuang pakhat a ser. A tung dong* hnih le a cheu, a vang dong khat le a cheu, a san dong khat le a cheu in a ser.
2 Biakamnak kuang cu a chung he, a leng he sui thiang in a hut i a tlang velchum kha sui in a kamh.
3 Sui kual pali in a ser i kuang a ke pali cung ah a bunh. Kap khat ah pahnih, khatlei kap khat ah pahnih in a bunh.
4 Cun anri thing in laang a ser i sui in a hut.
5 Kuang zawnhnak caah kuang a sirlei ah a ummi a kual chung ah laang cu a hrolh.
6 Kuang a chin cu sui thiang in a ser i a tung dong hnih le a cheu, a vang dong khat le a cheu in a ser.
7 Kuang a chin a ki veve ah sui in cherubim pahnih kha a den.
8 Cherubim cu khatlei a ki ah pakhat, khatlei a ki ah pakhat in a ser hna. Cuticun kuang a chin a ki veve ah cherubim cu a ser hna.
9 Cherubim nih an thla pahnih kha cunglei ah an samh i an thla nih kuang a chin cu a khuh. Cun pakhat le pakhat hmaitonh in an um i kuang a chin kha an zoh.
10 Anri thing in cabuai pakhat zong a ser i a tung dong hnih, a vang dong khat, a san dong khat le a cheu a si.
11 Cabuai cu sui thiang in a hut i a tlang velchum kha sui in a kamh.
12 Cabuai velchum cu zapar ngaw* in a tlang a ser i a tlang cu sui in a kamh ṭhan.
13 Cun sui kual pali in a ser i a ke pali aa bunhnak a kil pali ah khan a bunh hna.
14 Cabuai caah laang hrolhnak a kual cu a tlangkamh pawng te ah khan an um.
15 Cun cabuai zawnhnak laang cu anri thing in a ser i sui in a hut.
16 Mah hnuah cabuai cung umkheng hna kha sui thiang in a ser hna, kheng, hrai, khengkuar le thlet thawinak caah ti-thawl hna kha sui thiang in a ser hna.
17 Mei vannak tung cu sui thiang in a ser. Mei vannak tung a ke, a tungpi, a cawng, a mom tete le a par tete kha sui tlang pakhat in a ser hna.
18 Mei vannak tung in a ṭe paruk a um i khatlei ah pathum, khatlei ah pathum in a um.
19 A ṭe pakhat cio ah almond pangpar he aa lomi a cawng pathum a um i a mom tete le a par tete zong aa changchang in an um. Cu bantuk in a ṭe khatlei zong ah an um ve. Mei vannak tung in a chuakmi a ṭe paruk cu cuticun an um.
20 Mei vannak a tungpi ah almond pangpar he aa lomi a cawng pali a um i a mom tete le a par tete zong aa changchang in an um.
21 A tungpi in a chuakmi a ṭe khuah thum tang cio ah a mom pakhat cio an um.
22 A mom tete le a ṭe le mei vannak tung a ningpi cu sui thiang tlang khat chung in den a si.
23 Cun meiinn pasarih le cengceh le meiṭil ruhnak cu sui thiang in a ser.
24 Mei vannak tung le a thilri vialte cu sui thiang talent* pakhat in a ser.
25 Anri thing in rimhmui khanghnak biakṭheng cu a ser. Tungvang palh a si i a sau dong khat, a kauh dong khat le a san dong hnih a si. A ki cu biakṭheng he an i tlai.
26 Biakṭheng cu a cunglei, a sirlei velchum le a ki hna kha sui thiang in a hut i a cunglei a tlang velchum kha sui in a kamh.
27 Biakṭheng a tlangkam tang veve ah sui kual pahnih cio in a ser i a kap hnih in a bunh. Mah cu biakṭheng i zawnhnak laang hrolhnak caah a si.
28 Laang cu anri thing in a ser i sui in a hut.
29 Rimhmui kha ṭha tein a cawh hna i a thiangmi thuhmi chiti le a thiangmi rimhmui kha a ser hna.
Footnotes
^ Dong khat cu lehmah 17.5 he aa tluk. Thlaihhlei B14 ah zoh.
^ Lehmah 2.9 hrawng. Thlaihhlei B14 ah zoh.
^ Talent pakhat cu 34.2 kg he aa tluk. Thlaihhlei B14 ah zoh.
