Exodus 22:1-31
22 “Mi pakhat nih cawtum a si ah, tuu a si ah a fir i a thah asiloah a zuar ahcun cawtum pakhat caah cawtum panga le tuu pakhat caah tuu pali a liam lai.
2 (“Mifir nih zan ah inn a baoh lioah an hmuh i an velhnak ah a thih ahcun a thisen ruang ah sualphawtnak a um lai lo.
3 Asinain nichuah hnuah a cangmi a si ahcun a thisen ruang ah sualphawtnak a um lai.)
“Mifir nih a liam lai. Zeihmanh a ngeih lo ahcun a firmi thil caah amah cu zuar a si lai.
4 A firmi cu cawtum siseh, laa siseh, tuu siseh a nung in hmuh a si ahcun a let hnih in a liam lai.
5 “Pakhatkhat nih a saṭil kha a lo ah maw, a mitsur dum ah maw a tlonter i midang lo kha a ei ahcun a lo chung in a chuakmi asiloah a mitsur dum chung in a chuakmi a ṭha bikmi theitlai in a liam lai.
6 “Mi pakhat nih mei a duah i hlingkung cu a kang. Cu mei nih cun midang lo kha a va tlaih i a faphal tom le a rawlkung le a lo kha a kangh dih ahcun mei a thawhtertu nih a kangmi man cu a liam lai.
7 “Mi pakhat nih midang sinah tangka asiloah a thilri kha aa chiah. Cu pa inn cu mifir nih a fir i a firtu cu hmuh a si ahcun a firtu nih a let hnih in a liam lai.
8 Mifir cu hmuh a si lo ahcun inn-ngeitu nih a la maw, la lo ti hngalh awkah inn ngeitu cu a hmaanmi Pathian hmaiah chuahpi a si lai.
9 Mi pahnih cu cawtum siseh, laa siseh, tuu siseh, hnipuan siseh, a tlaumi thilri siseh ‘Mah hi keimah ta a si!’ tiah bia alnak a chuah ahcun an bia cu a hmaanmi Pathian hmaiah chuahpi a si lai. Pathian nih sual a phawtmi nih khan a let hnih in a liam lai.
10 “Mi pakhatkhat nih midang kha laa siseh, cawtum siseh, tuu siseh, inn zuat saṭil siseh zohkhenh awkah a fial i mah saṭil cu a thi asiloah hliamhma a pu asiloah ahohmanh nih an hmuh lo karah midang nih an tlaih ahcun,
11 a zohkhenhtu nih amah ruang ah a si lo ti kha Jehovah hmaiah chiatserh in bia aa kam lai. Mah kha a ngeitu nih a cohlan lai i a zohkhenhtu nih a liam a hau lai lo.
12 Asinain a zohkhenhtu kut in fir a si ahcun a ngeitu kha a liamh lai.
13 Sahrang nih a sehmi a si ahcun tehte caah a ruak kha a rak chuahpi lai. Sahrang sehmi a si caah liam a hau lai lo.
14 “Mi pakhat nih midang saṭil kha aa hlan i mah saṭil cu a ngeitu um lo karah hliamhma a pu asiloah a thih ahcun a hlangtu nih a liam lai.
15 A ngeitu a um ve ahcun a liam a hau lai lo. A man in hlanmi a si caah hlan man cu liammi man a si cang.
16 “Mipa pakhat nih ham rih lomi ngaknu thiang pakhat kha a lem i a ihpi ahcun man a manh lai i nupi ah a ṭhit lai.
17 Ngaknu a pa nih a vatter duh lo ahcun ngaknu man rikhiahmi cu a pek lai.
18 “Hnam ngeimi nu kha nan nunter hna lai lo.
19 “Saram he nupa sinak a hmangmi cu thihdan pek a si lai.
20 “Jehovah sinah si loin a dang pathian sinah rai a thawimi cu thihdan pek a si lai.
21 “Ramdang mi kha a ding loin nan pehtlai hna lai lo i nan hrem hna lai lo. Zeicahtiah nannih zong Izipt ram ah ramdang mi nan rak si bal ve.
22 “Nuhmei le ngakṭah kha nan zawmhtaih hna lai lo.
23 Nan zawmhtaih hna i ka sinah bawmhnak hal in an au ahcun an aunak kha theihpiak loin ka um lai lo.
24 Ka thinhunnak cu a alh lai i vainam in kaan thah hna lai. Nan nupile cu nuhmei ah an cang lai i nan fale zong ngakṭah ah an cang lai.
25 “Ka miphun chung in misifak kha tangka nan cawih hna tikah tangka cawihtu nih an tuah tawn bantuk in a karh nan la lai lo.
26 “Mi pakhat i a thilpuan kha biakamnak caah nan lakpiak ahcun ni a tlak hlanah nan pek ṭhan lai.
27 Cu thilpuan cu khualumnak caah a ngeihchunte a si. Mah a um lo ahcun zeitindah aa hngilh khawh lai. Ka sinah bawmhnak hal in a au tikah ka theihpiak hrimhrim lai. Zeicahtiah kei cu zaangfah a hmangmi Pathian ka si.
28 “Pathian kha chiat nan serh lai lo. Nan hruaitu zong chiat nan serh lai lo.
29 “Nan theitlai hmasa bik le nan mitsur zu le nan chiti hna kha keimah sin pekchanh awkah i cungcang hlah u. Nan fater pa paohpaoh kha keimah nan ka pek lai.
30 Cu bantuk in nan caw le nan tuu zong fater a pa a simi kha nan ka pek lai; a nu he ni sarih chung nan chiah lai i ni riatnak ni ah keimah nan ka pek lai.
31 “Nannih cu keimah caah a thiangmi miphun nan si lai. Ramlak ah sahrang nih a sehmi sa kha nan ei lai lo. Uico nan pek lai.
