Seken leta i go long Korin 13:1-14

  • Ol laswan woning mo ol advaes (1-14)

    • “Yufala i mas gohed blong jekem yufala blong luk sipos yufala i stap holem yet fasin blong bilif” (5)

    • Yufala i gohed blong stretem tingting blong yufala; yufala i gohed blong gat wan tingting nomo (11)

13  Naoia i namba 3 taem we bambae mi kam luk yufala. “Evri samting i mas stanap long ol toktok* blong tu o tri witnes.”+  Nating se mi no stap wetem yufala, be mi harem olsem se hemia namba 2 taem we mi stap wetem yufala. Taswe mi wantem givim woning long sam long yufala we bifo oli stap mekem sin mo long yufala evriwan se: Sipos mi kambak samtaem, bambae i no gat wan long olgeta we i save ronwe long mi,  from we yufala i stap traem blong faenemaot sipos i tru se Kraes i stap yusum mi blong talemaot tok blong hem, no nogat. Taem Kraes i mekem samting long yufala, hem i no save mekem long fasin we i no gat paoa, be bambae hem i soemaot paoa blong hem long yufala.  Yes i tru, oli kilim hem i ded long pos, from we hem i no gat paoa. Be paoa blong God i mekem se naoia hem i laef.+ Mo mifala tu we mifala i joen long hem, mifala i no gat paoa, be bambae mifala i laef wanples wetem hem+ from we paoa blong God i stap wok long laef blong yufala.+  Yufala i mas gohed blong jekem yufala blong luk sipos yufala i stap holem yet fasin blong bilif. Yufala i mas gohed blong faenemaot se yufala i wanem kaen man.+ ?Maet yufala i no luksave se Jisas Kraes i joen long yufala? Be Kraes i no save joen long yufala, sipos God i no glad long yufala.  Be mifala, God i glad long mifala, mo mi hop se yufala i luksave samting ya.  Mifala i prea long God from yufala, blong yufala i no mekem samting we i no stret. Mifala i no prea olsem blong bambae ol man oli luk se ol wok blong mifala oli gud. Be mifala i wantem se yufala i mekem samting we i stret nomata se ol man oli no glad long mifala.  Mifala i no save mekem eni samting we i agensem trutok, be mifala i mekem ol samting nomo we i sapotem trutok.  Mo mifala i glad tumas taem we mifala i no gat paoa be yufala i gat paoa, mo samting ya nao mifala i stap prea from, blong yufala i stretem tingting blong yufala. 10  Taswe mi raetem ol samting ya taem mi no stap wetem yufala. Mi mekem olsem from we mi no wantem yusum paoa we Masta i givim long mi blong panisim yufala taem mi kam.+ Hem i givim paoa ya long mi blong mi bildimap yufala, be i no blong pulumdaon yufala. 11  Ol brata, lastok blong mi i olsem: Yufala i gohed blong stap glad, mo yufala i gohed blong stretem tingting blong yufala, mo yufala i gohed blong leftemap tingting blong yufala,+ mo yufala i gohed blong gat wan tingting nomo,+ mo yufala i gohed blong stap long pis,+ nao God ya we i God blong lav mo pis,+ bambae i stap wetem yufala. 12  I gud yufala i talem halo long yufala wetem holi kis. 13  Olgeta tabu man oli talem halo long yufala. 14  Prea blong mi se Masta Jisas Kraes i gohed blong kaen long yufala, mo blong God i gohed blong lavem yufala, mo blong tabu spirit ya we i stap givhan long yumi evriwan i stap wetem yufala.

Ol futnot

PT: “long maot.”