Ester 7:1-10
7 Kanian say ari tan si Haman+ et linmad ponsia nen Reyna Ester.
2 Et inkuan lamet na ari ed si Ester diad mikaduan agew na ponsia legan iran oniinum na alak: “Antoy pirawat mo, Reyna Ester? Nagamoran mo itan. Tan antoy labay mon kerewen? Anggan* kapaldua na panarian ko et niiter ed sika!”+
3 Inmebat si Reyna Ester: “No walad siak so pabor mo, O ari, tan no onabobon so ari, say pirawat ko et isalbam so bilay ko* tan say kerew ko et iliktar mo iray kabaleyan ko.+
4 Ta siak tan saray kabaleyan ko et inlako+ pian upoten, pateyen, tan deralen.+ No inlako kami pian magmaliw ya ariripen a lalaki tan bibii, agak la komon onesel. Balet sayan pakakagonigon et agmanepeg, ta pakaderalan iya na ari.”
5 Et inkuan nen Arin Ahasuero ed si Reyna Ester: “Siopa ’tan, kawalaan to ’tan a toon makmakpel a manggaway ontan?”
6 Inkuan nen Ester: “Say kalaban tan kabusol et sayan mauge-uges a Haman.”
Ataktakot si Haman nisengeg ed ari tan reyna.
7 Inmalagey so ari lapud pasnok to tan manlapud paniinuman day alak et linmad hardin na palasyo, balet dinago nen Haman si Reyna Ester pian mikasi ya iliktar toy bilay* to, ta amta ton desididoy ari a manusad sikato.
8 Manlapud hardin na palasyo et pinmawil so ari diad abung a paniinuman day alak tan anengneng toy Haman ya akasubsob ed dukolan a kawalaan nen Ester. Et inkuan na ari: “Labay to met a puersaen so reyna a miakdol ed sikato diad mismon abung ko?” Kapangibaga na ari ed satan, sinakbongan day lupa* nen Haman.
9 Et inkuan nen Harbona,+ a sakey ed saray opisyal ed palasyo na ari: “Wala met so posten imparaan nen Haman parad si Mardokeo,+ samay angidalem na bengatlan angiliktar ed ari.+ Akaalagey itan ed abay na abung nen Haman, a 50 kasiko* so katagey to.” Diad saman et inkuan na ari: “Ibitay yod man.”
10 Kanian imbitay day Haman ed samay posten imparaan to parad si Mardokeo, tan kinmepay sanok na ari.
Paimanod leksab
^ Odino “Anggan parad.”
^ Odino “kamarerwak.”
^ Odino “kamarerwa.”
^ Sayan kustombre nensaman a panakbong ed lupa et nayarin mangipatnag na kababaingan tan posiblin kadederal.
^ Manga 22.3 metro (73 piye). Nengnengen so Apendise B14.
