Pẽg-y a Zeova a tʋʋm kãsemsã yĩnga!
Pẽg-y a Zeova a tʋʋm kãsemsã yĩnga!
“Mam pẽgda [a Zeova, NW ] ne m sũur fãa . . .Tɩ bõe, Wẽnnaam Sẽn-tõeyã fãa maana bõn-kãsems mam yĩnga.”—LUK 1:46-49.
1. Wa sẽn zemse, tʋʋm kãsems bʋs yĩng la d pẽgd a Zeova?
A ZEOVA zemsa ne pẽgr a tʋʋm kãsemsã yĩnga. No-rɛɛs a Moiiz sẽn togs Israɛll sẽn paam fãagr Ezipt nebã nusẽ wã, a yeelame: “Yaa yãmb nin n yã tʋʋm kãsems nins [a Zeova, NW ] sẽn maana.” (Tõodo 11:1-7) Woto me, malɛk a Gabriɛll sẽn togs tɩ pa-kul sẽn pa mi rao n da na n dog a Zezi wã, a Maari yeelame: “Mam pẽgda Zusoaba ne m sũur fãa . . . Tɩ bõe, Wẽnnaam Sẽn-tõeyã fãa maana bõn-kãsems mam yĩnga.” (Luk 1:46-49) D sẽn ya a Zeova Kaset rãmbã, d pẽgd-a-la tʋʋm kãsems kãensã yĩnga. Wala makre, a sẽn fãag Israɛll Ezipt nebã yembdẽ wã, la a sẽn kɩt tɩ pʋg-sad rɩk a Biribl nongrã pʋg ne yel-solemdã.
2. a) Wẽnnaam “raab sẽn ka tɛka” võor yaa bõe ne ãdem-biis sẽn ya-b sakdbã? b) Bõe la a Zã yã Patmos sẽn yaa ko-sʋk tẽngẽ wã?
2 A Zeova tʋʋm kãsems wʋsg tɩ loee ne a “raab sẽn ka tɛka,” sẽn yaa tũnug ne Mesi wã la a Rĩungã naamã n ning ãdem-biis sẽn ya-b sakdbã barkã. (Efɛɛz rãmba 3:8-13) Tʋm-tʋmd a Zã sẽn kʋʋlã, yãab pʋgẽ, saasã pakame t’a paam n yã raab kãng sẽn paamd pidsg bilf-bilfu. A wʋma koɛɛg sẽn wõnd baorg koɛɛg sẽn yete: “Wa yĩngr ka tɩ m wilg foom bũmb nins sẽn yaa tɩlae tɩ wa zĩndã.” (Wilgri 4:1) Yaa sasa ning Rom soolmã naab sẽn kɩt tɩ b yõk-a n kẽng Patmos sẽn yaa ko-sʋk tẽngẽ wã, “Wẽnnaam goama la a Zezi kaseta yĩnga,” la a Zã paam “a Zezi Kirist wilgri.” Tʋm-tʋmdã sẽn yã la a wʋm bũmb ningã wilga yɛl wʋsg Wẽnnaam daab sẽn pa satã wɛɛngẽ, tɩ rẽ kõt tẽeb vẽnegr la raood kengr sẽn zems a wakat n kõ kiris-neb hakɩkã fãa.—Wilgri 1:1, 9, 10.
3. Ãnd dãmb la kãsem dãmb 24 a Zã sẽn yã vẽnegr pʋgẽ wã makda?
3 Saasã sẽn pakã, a Zã yãa kãsem dãmb 24, sẽn zĩ naam gɛy zutu, n fõg maanf rãmb wa rĩm dãmba. B lʋɩɩ Wẽnnaam taoor n yeele: “Tõnd Zusoaba la tõnd Wẽnnaam, yãmb n zems tɩ reeg pẽgre la waoogre la pãnga, tɩ bõe, yãmb n naan bũmb fãa, la yaa yãmb daaba yĩng la yãmb naan bãmb tɩ b beẽ.” (Wilgri 4:11) Kãsem dãmb kãensã makda kiris-neb nins sẽn zae sẽn vʋʋgã fãa b sẽn kõ naam ne ziirã Wẽnnaam sẽn da kãab-bã. B pẽgda a Zeova, a tʋʋm kãsems nins sẽn tɩ loe ne naanegã yĩnga. Yaa bõn-kãseng tõnd me nifẽ, d sẽn ne kaset sẽn wilgd a Zeova “pãnga sẽn ka sɛta la bãmb [Wẽndlmã, NW ].” (Rom dãmba 1:20) La tõnd sã n zãmsd n paasd a Zeova wɛɛngẽ, d tara bʋʋm n paas n na n pẽg-a a tʋʋm kãsemsã yĩnga.
Moon-y a Zeova tʋʋma sẽn zems ne pẽgrã!
4, 5. Kõ-y makr sẽn wilgd a Davɩɩd sẽn pẽg a Zeova to-to.
4 Yɩɩl gʋlsd a Davɩɩd pẽga Wẽnnaam a tʋʋm kãsemsã yĩnga. Wala makre, a Davɩɩd yɩɩla woto: “Bɩ y yɩɩl n pẽg [a Zeova, NW ] sẽn be Sɩõ wã. Wilg-y bãmb tʋʋm sõamã wã neba sʋka. Zusoaba, zoe-y mam nimbãanega, ges-y mam bɛɛba sẽn namsd maam. Yaa yãmb n yiisd maam kũum dig-noyẽ, tɩ m wilg yãmb waoogra fãa Sɩõ tẽnga noyã la m maan sũ-noog ne yãmb fãagre.” (Yɩɩl Sõamyã 9:12, 14, 15) A Davɩɩd sẽn kõ a biribl a Salomo mamsg sẽn wilgd wẽn-doogã sẽn da segd n me to-to poore, a pʋʋsa Wẽnnaam bark la a pẽg-a woto: “Yãmb [a Zeova, NW] yaa kãseng n so pãng la ziiri la naam ne waoogre. . . . Yaa yãmb n yaa rĩm n so fãa. . . .Tõnd Wẽnnaam, tõnd pʋʋsda yãmb bark n pẽgd yãmb yʋʋre.”—1 Kɩbaya 29:10-13.
5 Gʋlsg Sõamyã yeta tõnd n yɩlemdẽ, n-ye a sagenda tõnd tɩ d pẽg Wẽnnaam wa a Davɩɩd sẽn maana. Yɩɩl Sõamyã sebr tara Wẽnnaam pẽgr goam wʋsgo, la b getame tɩ sẽn na ta pẽgr gom-kãens pʋɩ-sʋk ya a Davɩɩd n gʋlse. Wakat fãa a ra pẽgda a Zeova la a pʋʋsd-a barka. (Yɩɩl Sõamyã 69:31) Sẽn paase, hal pĩnd wẽndẽ wã, b tũnuga ne yɩɩl nins vʋʋsem sõng sẽn vẽneg t’a Davɩɩd la neb a taab gʋlsã n pẽg a Zeova.
6. Wãn to la Yɩɩl Sõamyã vʋʋsem sõng sẽn vẽneg tɩ b gʋlsã tar yõod ne tõndo?
6 Ad Yɩɩl Sõamyã sɩd tara yõod wʋsg ne a Zeova balemdbã! D sã n dat n pʋʋs Wẽnnaam bark a tʋʋm kãsemsã fãa a sẽn maan tõnd yĩngã yĩnga, d tõe n tũnuga ne goam sẽn be rasãnd nins sẽn be Yɩɩl Sõamyã pʋgẽ wã. Wala makre, d sã n wa yik d gãagẽ yibeoogo, d tõe n dat n yeela woto: “Yaa noogo tɩ waoog [a Zeova, NW] la b yɩɩl yãmb Sẽn-ka-to yʋʋra yĩnga. La wilg yãmb nonglem yibeoogo, la b wilg yãmb sɩda me ne yʋngo . . . Zusoaba, yãmb kõo maam sũ-noogo bũmb nins yãmb sẽn maana yĩnga. Mam kaasda ne sũ-noogo yãmb nus tʋʋma yĩnga.” (Yɩɩl Sõamyã 92:2-5) D sã n tõog bũmb sẽn dat n gɩdg tõnd tɩ d ra kẽng taoor tẽebã wɛɛngẽ, d tõe n datame n wilg d sũ-noog la d mi-beoog pʋʋsg pʋgẽ, wa yɩɩl gʋlsdã sẽn maane, a sẽn wa n yɩɩl woto wã: “Wa-y tɩ d kaas ne sũ-noog Zusoaba yĩnga. Tɩ d zẽk d koeese n pẽg sẽn yaa tõnd fãagr pĩig kugrã. Bɩ tõnd wa bãmb nengẽ ne bark pʋʋsgo n zẽk koees n pẽg bãmb ne yɩɩla.”—Yɩɩl Sõamyã 95:1, 2.
7. a) Bõe la d mi yɩɩl wʋsg kiris-nebã sẽn yɩɩndã wɛɛngẽ? b) Bõe n segd n kɩt tɩ tõnd wa pĩnd tigissẽ wã la d gũ tɩ ta b saabo?
7 Naoor wʋsgo, d zẽkda d koees n yɩɩl n pẽg a Zeova tigingã tigissẽ la tigis-kãsemsẽ wã. D bãng tɩ yɩɩn-kãens wʋsg tika goam vʋʋsem sõng sẽn vẽneg tɩ b gʋls zutu, sẽn yit Yɩɩl Sõamyã sebrã pʋgẽ. Ad d sũy sɩd yaa noog d sẽn tar yɩɩn-nood rũndã-rũndã sẽn pẽgd a Zeova wã! Yɩɩl n pẽg Wẽnnaamã segd n kɩtame tɩ d kẽng d tigissẽ wã pĩnda, la d gũ tɩ ta b saabo. Yaa woto la d na n naag d taabã n balem a Zeova ne yɩɩl la ne pʋʋsgo.
‘Nebã, pẽg-y a Za!’
8. Bõe n be gom-biig ning sẽn yaa “Alleluiya” wã pʋgẽ, la wãn to la b nong n lebg-a?
8 A Zeova pẽgrã bee gom-biig sẽn yaa “Alleluiya” wã pʋgẽ, sẽn yaa hebre gomd b sẽn gʋls tɩ zems ne moorã yeelgo, tɩ naoor wʋsg bɩ b lebgd-a tɩ “Nebã, pẽg-y a Za.” Wala makre, Yɩɩl Sõamyã 135:1-3 pʋgẽ, d yãta bool-kãngã sẽn tar pãngã: “Bɩ y pẽg [a Za, NW]. Zusoaba tʋm-tʋmdba, pẽg-y-yã. Bɩ y pẽg [a Zeova, NW ] yʋʋre. Yãmb dãmb sẽn yalsd Zusoaba roogẽ la tõnd Wẽnnaam samana pʋsẽ, pẽg-y Zusoabã. Tɩ bõe, Zusoaba yaa sõngo. Yɩɩl-y bãmb yʋʋra pẽgre yĩnga; tɩ bõe, a yaa noogo.”
9. Bõe n tusd tõnd tɩ d pẽg a Zeova?
9 D sã n ges Wẽnnaam naanegã tʋʋm kãsems ne tʋʋm nins a sẽn maan tõnd yĩngã neere, kɩtdame tɩ d rat n pẽg-a ne mi-beoogo. Tõnd sã n tags bõn-kãsems nins a Zeova sẽn maan a nin-buiidã yĩng pĩnd wẽndẽ wã yelle, tõnd sũyã tusda tõnd tɩ d pẽg-a. La tõnd sã n bʋgsd kãab-kãsems nins a Zeova sẽn na n ye maana zugu, d baooda soay n pẽg-a la d wilg mi-beoogo.
10, 11. Wãn to la tõnd belmã meng yaa bũmb sẽn kɩt tɩ d segd n pẽg Wẽnnaam?
10 Tõnd belmã meng segd n kɩtame tɩ d pẽg a Za. A Davɩɩd yɩɩla woto: “Mam pʋʋsda yãmb [a Zeova] bark bõn-kãsems a woto yĩnga. Mam wẽnda bõn-bãnde [“yel-solemde,” NW ], yãmb tʋʋma yaa bõn-bãna.” (Yɩɩl Sõamyã 139:14) N-ye, b maana tõnd tɩ d yaa “yel-solemde,” tɩ d tõe n yã, n wʋm la d tagse. Woto yĩnga, d pa segd n dɩk d vɩɩmã n pẽg d Naandã sɩda? A Poll togsa bũmb sẽn wõnd woto, a sẽn gʋls tɩ: “Yãmb sẽn dɩta walla yãmb sẽn yũuda walla yãmb sẽn maand bũmb a taaba, bɩ y maan fãa Wẽnnaam waoogr yĩnga.”—1 Korẽnt dãmba 10:31.
11 D sã n sɩd nong a Zeova, d na n maana bũmba fãa sẽn na yɩl n kõ-a ziiri. A Zezi yeelame tɩ pipi noorã yaa: “Bɩ f nong Zusoaba [a Zeova, NW ] fo Wẽnnaam ne f sũur fãa, la ne f ratem fãa, la ne f yam fãa, la ne fo pãnga fãa.” (Mark 12:30; Tõodo 6:5) Sɩd-sɩda d segd n nonga a Zeova la d pẽg-a t’a yaa d Naand la “bark sõama fãa la kũun sõama fãa” Kõta. (Zak 1:17; Ezai 51:13; Tʋʋma 17:28) Zemsame tɩ d maan woto, bala tõnd sẽn tõe n tagsã, d tẽebã fãa la d yĩngã pãng fãa, n-ye, tõnd sẽn tõe n maan bũmb ninsã fãa yita a Zeova nengẽ. A sẽn yaa tõnd Naandã yĩnga, d segdame n nong-a la d pẽg-a.
12. Wãn to la y tagsd ne a Zeova tʋʋm kãsemsã la goam nins sẽn be Yɩɩl Sõamyã 40:6 pʋgẽ wã yelle?
12 A Zeova tʋʋm kãsemsã kõta tõnd bʋʋm ka tɛk tɩ d nong-a la d pẽg-a! A Davɩɩd yɩɩla woto: “Zusoaba, mam Wẽnnaam, yãmb bõn-bãna yãmb sẽn maanã ne y tagsga tõnd yĩnga yaa wʋsgo. A to ka sẽn zem yãmb ye. Mam nong n wilga bãmba n gom b yelle, la bãmb sõor yaa wʋsgo n yɩɩd tɩ ned ka tõe n togs n sɛ ye.” (Yɩɩl Sõamyã 40:6) A Davɩɩd ra pa tõe n sõd a Zeova tʋʋm kãsemsã fãa n sa ye. Tõnd me pa tõe ye. Bɩ d pẽg Wẽnnaam wakat buud fãa b sẽn wilg tõnd a tʋʋm kãsemsã.
Tʋʋm sẽn tɩ loe ne Wẽnnaam daab sẽn pa satã
13. Wãn to la tõnd saagrã tɩ loe ne Wẽnnaam tʋʋm kãsemsã?
13 Tõnd beoog-daar saagrã tɩ loee sõma-sõma ne tʋʋm kãsems sẽn zems ne pẽgrã sẽn tɩ loe ne Wẽnnaam daab sẽn pa satã. Kɩɩsgã sẽn zĩnd Edɛnã poore, a Zeova kõo bãngr-gomd sẽn pid ne saagre. Wẽnnaam kaoa waafã bʋʋd n yeel woto: “Mam na n ninga beem foo ne paga sʋka, la fo yagenga ne yẽ yageng sʋka. Yẽ yageng na n pogla fo zugu, la fo na n pogla yẽ nao-kãsengkãare.” (Sɩngre 3:15) Kɩs-sɩd dãmbã kell n talla saagr ne Yagengã b sẽn kãabã, ba a Zeova sẽn maan tʋʋm kãseng n kogl a Nowe ne a zakã rãmb dũni gill Sa-kãsengã sẽn sãam dũni wẽngã poore. (2 Pɩɛɛr 2:5) Kãabs sẽn yaa bãngr-goam b sẽn maan a Abraham la a Davɩɩd kɩtame n paas tɩ b bãng a Zeova sẽn da na n tũnug ne Yageng kãngã n maan bũmb ninsi.—Sɩngre 22:15-18; 2 Sãmwɛll 7:12.
14. A Zeova tʋʋm kãsems nins a sẽn maan ãdem-biis sẽn ya-b sakdbã yĩngã sʋka, sẽn yaa kãseng n yɩɩdã yaa bʋgo?
14 Tʋʋm kãsems nins a Zeova sẽn maan n sõng ãdem-biisã sʋka, sẽn yaa kãseng n yɩɩdã ya a sẽn wa n kõ a Biribl yend a sẽn naana. Yaa Yagengã b sẽn kãabã, a Zezi Kirist sẽn kõ maoong sẽn yaa rondã. (Zã 3:16; Tʋʋma 2:29-36) Rondã b sẽn kõ wã yɩɩ sabab tɩ zems-n-taar ne Wẽnnaam tõe n yɩ. (Matɩe 20:28; Rom dãmba 5:11) A Zeova kɩtame tɩ pipi neb nins sẽn paam zems-n-taar ne-a wã tigim kiris-neb tigingã b sẽn lugl yʋʋmd 33 T.W. Pãntekotã sasa. Ne vʋʋsem sõngã sõngre, b moona koe-noogã tɩ zãag zĩiga, n wilgd a Zezi kũumã la a vʋʋgrã sẽn pak sor n kõ ãdem-biis sẽn ya-b sakdbã tɩ b tõe n paam bark sẽn pa sat Wẽnnaam yĩngr Rĩungã naam dɩɩb sasa to-to.
15. Wãn to la a Zeova maan tʋʋm kãseng tõnd wakatã?
15 Tõnd wakatã, a Zeova maana tʋʋm-kãseng a sẽn tigim kiris-neb nins sẽn zaeyã yaoolem dãmbã. B gãda sãoongã sebd sẽn na yɩl n kõ neb 144 000 sẽn na n dɩ naam ne Kirist saasẽ wã kell sor tɩ b paam bãnde. (Wilgri 7:1-4; 20:6) Wẽnnaam kɩtame tɩ kiris-neb nins sẽn zaeyã paam b mens n yi tẽebã yembdẽ “Babilon kãsenga” sẽn yaa dũni gill ziri tũudmã pʋgẽ. (Wilgri 17:1-5) Fãagr kãng sẽn zĩnd yʋʋmd 1919 la Wẽnnaam koglgã b sẽn paam rẽ tɛkã kɩtame tɩ kiris-neb nins sẽn zaeyã kell maan bõe? A kɩtame tɩ b pɩl n kõ baasg kaset t’a Zeova na n yaool n wa sãam a Sʋɩtãan zãmaan-wẽngã, “to-kãsenga” sẽn kolgd tao-tao wã pʋgẽ.—Matɩe 24:21; Daniɛll 12:3; Wilgri 7:14.
16. Bõe n maande, b sẽn moond Rĩungã dũniyã gill zug rũndã-rũndã wã?
16 A Zeova Kaset rãmb nins sẽn zae ne vʋʋsem sõngã lʋɩɩ Rĩungã koɛɛg mooneg taoor ne yẽesem dũniyã gill zugu. Rẽ kɩtame tɩ “piis a taab[ã]” sẽn tar paasgã lebgd a Zeova balemdb masã. (Zã 10:16) D kɩdemdame, sor sẽn ket n pak n kõ tẽngã sũ-bʋgsem dãmb tɩ b tõe n wa lagem tõnd n pẽg a Zeova wã. Neb nins sẽn sak boollã n “wa” wã na n paama fãagr to-kãsengã pʋgẽ, ne saagr n na n pẽg a Zeova wakat sẽn pa sate.—Wilgri 22:17.
Neb tusa n kaoogd n wat baleng hakɩkẽ wã
17. a) Wãn to la a Zeova maand tʋʋm kãsems tõnd moonegã tʋʋmd wɛɛngẽ? b) Wãn to la Zakari 8:23 paamd pidsgu?
17 A Zeova maanda tʋʋm kãsems sẽn zems ne pẽgr tõnd moonegã tʋʋmd wɛɛngẽ. (Mark 13:10) Yʋʋm sẽn pa kaoosã pʋgẽ, a ‘paka kʋɩleng kãseng tɩ b tõe n maan tʋʋmde.’ (1 Korẽnt dãmba 16:9) Rẽ kɩtame tɩ b tõog n moon koe-noogã tẽns sẽn yalem pʋsẽ sɩdã bɛɛb sẽn da wat ne gɩdgrã. Neb wʋsg sẽn da be tẽebã likẽ sakda boollã masã sẽn yet tɩ b wa balem a Zeova wã. B pidsda bãngr-gom-kãngã: “Saasẽ pãng soaba [a Zeova] yeelame tɩ baraare, bu-zẽms [neb] piig sẽn yaa buud toor-toor na n gãda Zʋɩf ned fuug n yeele: ‘Bas-y tɩ d tũ yãmb n kẽnge; bala, tõnd wʋmame tɩ Wẽnnaam bee ne yãmba.’” (Zakari 8:23) “Yãmba” yaa Zʋɩf rãmb tẽebã wɛɛngẽ, rũndã-rũndã kiris-neb nins sẽn zaeyã kelle. Sẽn mik tɩ piig tõe n maka tẽng zug bũmb sẽn pid zãngã, ‘neb piigã’ makda ‘kʋʋng kãsengã’ b sẽn naag “Israɛll sẽn yaa Wẽnnaam dẽnda,” tɩ b fãa lagem n yaa “yãgr a yembre.” (Wilgri 7:9, 10; Galat dãmba 6:16) Ad sɩd yaa sũ-noog bũmb tɩ d ges tɩ masã neb wʋsg n lagem taab n balemd Wẽnnaam a Zeova!
18, 19. Bõe n wilgd t’a Zeova ningda koe-moonegã barka?
18 D sũy sɩd yaa noogo, neb tusa pi-gĩna, sɩd-sɩda neb tusa kobs sẽn sakd baleng hakɩkã tẽns nins ziri tũudmã sẽn da pid tɩ ra yaa wala nebã ra pa na n tol n sak koe-noogã be wã pʋsẽ wã. Ges-y Annuaire des Témoins de Jéhovah sẽn yi paalma, n ges tẽns nins masã sẽn tar Rĩungã koe-moondb 100 000 n digd sẽn pẽneg 1 000 000 wã. Woto yaa kaset sẽn tar pãng sẽn wilgd t’a Zeova ningda Rĩungã mooneg tʋʋmd barka.—Yelbũna 10:22.
19 D sẽn ya a Zeova nin-buiidã, d pẽgdame la d pʋʋsd d saasẽ Ba wã barka, a sẽn kɩt tɩ tõnd vɩɩmã tar bõn-datl sɩd-sɩdã, n kõ d tʋʋmd sẽn be bark a sõgenegã pʋgẽ wã, la saagr sẽn be rasãnd beoog-daarã yĩnga. D vɩɩmã pʋgẽ d gẽegda Wẽnnaam kãabsa fãa pidsg ne yãgbo, la d rɩka sard sẽn pa vigsd n na n ‘tall d mens Wẽnnaam nonglem pʋgẽ, n gũud vɩɩm sẽn ka sɛtã.’ (Ziid 20, 21) Ad d sũy sɩd yaa noog d sẽn ne tɩ kʋʋng kãsengã sẽn pẽgd Wẽnnaamã taa neb 6 000 000! A Zeova barkã yaa vẽenega, bala kellã sẽn zaeyã ne b tũud-n-taasã sẽn yaa “piis a taab[ã]” sigla tigims 91 000 tẽns 235 pʋsẽ. Tõnd fãa paamda rɩlgr tẽebã wɛɛngẽ, “tʋm-tʋmd sẽn tũud sɩda la sẽn tar yamã” sẽn maood wakat fãa wã yĩnga. (Matɩe 24:45) Siglg sẽn kẽngd taoor tɩ zems ne Wẽnnaam sor-wilgrã geta Rĩungã koe-mooneg a Zeova Kaset rãmbã tʋʋm wil 110 pʋsẽ ne nonglem. D tara mi-beoogo, a Zeova sẽn tus a nin-buiidã sũy tɩ b ‘waoog-a ne b paoonga’ yĩnga. (Yelbũna 3:9, 10) Rẽ kɩtame tɩ moonegã tʋʋmd d sẽn maand dũniyã gill zugã kẽngd taoore, ne sɛb yiisg rot meebo, Betɛll dot la misioneer dãmbã roto, Rĩungã Rot la tigis-kãsemsã rot b sẽn me tɩ zems ne ratmã.
20. Wãn to la a Zeova tʋʋm kãsemsã sẽn zems ne pẽgrã yell tagsg segd n tall pãng tõnd zugu?
20 Tõnd pa tõe n gom d yĩngr Ba wã tʋʋm-kãsemsã sẽn zems ne pẽgrã yell fãa n sa ye. La ned sẽn tar sũ-tɩrg tõeeme n pa lagem ne neb kʋʋngã n pẽg a Zeova sɩda? Vẽenega yaa ayo! Woto yĩnga, bɩ neb nins fãa sẽn nong Wẽnnaamã kaas ne sũ-noog woto: “Pẽg-y [a Za, NW]! Bɩ yãmb pẽg Zusoaba hal-hal saasẽ, zĩnd-y yĩngr n pẽg bãmba. Bɩ bãmb malɛk rãmba fãa pẽg bãmba, . . . la kom-bɩɩs ne kom-pugli me la nin-kẽemba ne b kamba, bɩ bãmb pẽg Zusoaba yʋʋre. Tɩ bõe, bãmb yʋʋra bal n zẽke. Bãmb naama yɩɩda dũniyã ne saasã.” (Yɩɩl Sõamyã 148:1, 2, 12, 13) N-ye, masã la wakat sẽn pa sate, bɩ d pẽg a Zeova a tʋʋm kãsemsã yĩnga!
Wãn to la y na n leokẽ?
• A Zeova tʋʋm kẽer sẽn zems ne pẽgr la bʋse?
• Bõe yĩng tɩ y rat n pẽg a Zeova?
• Wãn to la d saagrã tɩ loe ne Wẽnnaam tʋʋm kãsemsã?
• Wãn to la a Zeova maand tʋʋm sẽn zems ne pẽgr sẽn tɩ loe ne Rĩungã koe-moonego?
[Zãmsgã sogsgã]
[Foto, seb-neng a 8]
Yãmb naagda ne y sũur fãa n yɩɩnd n pẽgd a Zeova bɩ?
[Foto rãmba, seb-neng 11]
Tõnd kɩdemdame, sor sẽn ket n pak tɩ sũ-bʋgsem dãmbã tõe n wa naag tõnd n pẽg a Zeova wã