Ziid sebre 1:1-25
1 Maam a Ziid sẽn yaa a Zeezi Kirist yamba, n yaa a Zak+ ba-biigã n gʋls seb-kãngã n tool neb nins tõnd Ba a Wẽnnaam sẽn bool+ la a nongẽ wã, b rãmb nins a sẽn kogl a Zeezi Kirist yĩngã:+
2 Bɩ Wẽnnaam nimbãan-zoeerã, a laafɩ wã la a nonglmã zĩnd yãmb zut wʋsgo.
3 M nin-nongdse, baa mam sẽn da maand m sẽn tõe fãa n na n gʋls yãmb fãagr ning d sẽn naag taab n tarẽ wã wɛɛngẽ wã,+ mam mikame tɩ yaa tɩlɛ tɩ m gʋls n sagl yãmb tɩ y wɩsg y mens n zab tẽebã yĩnga,+ tẽeb ning b sẽn sõng Wẽnnaam nebã tɩ b paam vugr wakat fãa yĩngã.
4 Bũmb ning sẽn kɩt tɩ m gʋlsd yãmbã yaa tɩ rap kẽer n soos n kẽ yãmb sʋka, la Gʋls-sõamyã wilga sɩbgr ning b sẽn na n paamã hal daar zãra. Bãmb yaa wẽn-kɩɩsdb sẽn tũnugd ne tõnd Wẽnnaamã barkã* n pademd n tʋmd nin-yoolem*+ tʋʋma, la sẽn pa maand sɩd ne a Zeezi Kirist sẽn yaa tõnd soaal-yɛng la d Zu-soabã ye.+
5 Baa yãmb sẽn mi bõn-kãensã fãa sõma wã, m dat n tẽeg-y lame t’a Zeova* sẽn fãag nin-buiid n yiis Ezɩpt soolmẽ wã,+ a wa n sãama sẽn pa tall-b tẽebã.+
6 La malɛgs nins sẽn ka pa zĩig ning b sẽn da be wã, n yi n bas zĩig ning sẽn zems ne-bã,+ Wẽnnaam balg-b-la wakat fãa yĩng lik bida pʋgẽ, n gũud bʋʋdã kaoob daar sẽn yaa ra-kãsengã.+
7 Sodom la Gomoor n paas b tẽn-kɩremsã neb me sẽn yo* tɩ loog nugu, la b sak b yĩnsã tʋls-wẽns n maan wɩɩbdã,+ b sãama bãmb ne bugum sẽn pa kiidi, tɩ b yaa keoogr tõnd yĩnga.+
8 Baa ne rẽ, nin-kãensã me tara mag-bɛda. B rẽgemda b taabã yĩnsi,* n paoogd sẽn tar-b zu-sobendã, la b gomd sẽn tar-b ziirã wẽnga.+
9 La baa malɛgsã naab+ a Mikayɛll+ sẽn wa n zabd ne Sʋɩtãanã,* n wẽed no-koeemd ne-a a Moyiiz kũumã+ poorẽ wã, a pa saag n gom n paoog-a ye.+ A yeelame bal yaa: “M bas-f-la ne a Zeova.”*+
10 La nin-kãensã gomd n paoogda bũmb nins fãa b sẽn pa wʋmd b võor sõma wã.+ La bũmb nins fãa b sẽn wʋmd b võor wa rũms sẽn pa tõe n tagsã wɛɛngẽ,+ b ket n dẽgemda b mense.
11 Rat bɩ tall-ba. Bala b rɩka a Kayẽ sorã,+ la b fõr n kẽ a Balaam+ tudgrã pʋgẽ yaood yĩnga. Bãmb gomda a Koore+ kɩɩsg goamã+ buudu. Yaa rẽ yĩng la b sẽn na n sãam wa yẽ wã.
12 Yãmb nonglem tigã+ sasa, nin-kãens yaa wa kug-bɛd sẽn be koom tẽngre,* n naagd yãmb n dɩt n tɩgda. B yaa pe-kɩɩmb sẽn dɩlgd b mens n pa zoet yãnde,+ n yaa wa sawat sẽn pa tar koom tɩ sobg rɩkd-b n kẽnd ka la ka.+ B yaa wa tɩɩs sẽn pa womd biis b womb wakate, sẽn ki zãnga,* la sẽn vigs n lʋɩ.
13 Bãmb wõnda wa mogrã ko-wiis sẽn zẽkd ne pãnga, tɩ b yãndã+ pukd wa ko-puudu. B yaa wa ãds sẽn gõod yaare, tɩ b na n lob-b lik bida pʋgẽ wakat sẽn kõn sa yĩnga.+
14 A Enok+ sẽn yaa d yaab a yopoe-n-soab sẽn sɩng ne a Ãdmã togsa bãngr-gomd bãmb yĩng me n yeele: “Ges-y-yã! A Zeova* waa ne a malɛg-sõamyã ka tɛkã,+
15 n na n kao nebã fãa bʋʋdo,+ la a ning wẽn-kɩɩsdbã fãa taale, tʋʋm-wẽns nins b sẽn kɩɩs Wẽnnaam n tʋmã yĩnga, la gom-yood nins yel-wẽn-maandbã sẽn gom n paoog Wẽnnaamã yĩnga.”+
16 Nin-kãensã yaa neb sẽn nong yẽgengo,+ n yaa neb sũy sẽn pa noom ne b yɛlã sẽn yaa to-to wã, la sẽn sakd b yĩnsã ratem.+ B noyã gomda gom-bɛda, la b belgd b taabã ne no-noom goam bãmb mensã nafr yĩnga.+
17 La sã n yaa ne yãmba, m nin-nongdse, tẽeg-y bũmb nins tõnd Zu-soab a Zeezi Kirist tẽn-tʋmdbã sẽn pĩnd n togsã.
18 B ra wae n yeta yãmb yaa: “Yaoolem wakatã, nin-yaandb n na n zĩndi, n sakd b mensã tʋls-wẽnsã.”+
19 Bãmb la sẽn wat ne welsgã.+ B yaa wa rũmsi, n pa tar Wẽnnaam vʋʋsem sõngã ye.
20 La m nin-nongdse, bɩɩsd-y y tẽebã sẽn yaa sõng wʋsgã, la y pʋʋsd ne vʋʋsem sõngã pãnga,+
21 n tõog n kell n pa Wẽnnaam nonglmã pʋgẽ,+ la y gũ tõnd Zu-soab a Zeezi Kirist nimbãan-zoeerã sẽn na n kɩt tɩ y paam vɩɩm sẽn ka sɛtã.+
22 Sẽn paase, kell-y n zoe-y neb kẽer yam sẽn yuusdã nimbãanega.+
23 Bɩ y yɩ tao-tao n sõng-b+ tɩ b põs sãoongã.* Kell-y n zoe-y neb a taabã nimbãanega, la y maan dẽ ne gũusgu, sẽn na yɩl tɩ b yel-wẽnã ra wa mad-y ye. Kisg-y b yel-wẽnã.+
24 Bɩ Wẽnnaam ning sẽn tõe n kogl yãmb tɩ y ra wa lak n lʋɩ wã, soab ning sẽn tõe n kɩt tɩ y kell n yɩ neb sẽn pa tar zang+ yẽ sẽn tar ziirã taoor ne sũ-no-kãsengã,
25 Wẽnnaam-yɛngã sẽn fãag tõnd d Zu-soab a Zeezi Kirist maasem yĩngã paam ziiri, naam, pãng la tõog wakat sẽn looge, masã, la wakat sẽn kõn sa. Ãmiina.
Vẽnegr toor-toore
^ Bɩ, “lohorem d sẽn pa segd ne wã.”
^ Ges-y gom-biis võor bilgrã zĩigẽ.
^ Ges-y vẽnegr ning sẽn yaa A5.
^ Ges-y gom-biis võor bilgrã zĩigẽ.
^ Gɛrk, “yĩn-nemse.”
^ Gɛrk, “diabolos” sẽn dat n yeel tɩ “munaafɩɩka.”
^ Ges-y vẽnegr ning sẽn yaa A5.
^ Kug-bɛd sẽn be koom tẽngr tõe n sãama koom-koglgo, wall pogl ned sẽn deemd koomã, pa rẽ bɩ n kʋ-a menga.
^ Gɛrk, “sẽn ki naoor a yiibu.”
^ Ges-y vẽnegr ning sẽn yaa A5.
^ Gɛrk, “n yiis-b bugmẽ wã.”
