Yel-bũnã sebre 16:1-33
16 Ninsaal segenda a sũurã tagsa,*la leoorã a sẽn leokdã* yita a Zeova nengẽ.+
2 Ninsaal soay fãa wõnda tɩrs* a nifẽ,+la a Zeova feesda tagsa wã.+
3 Ning f sẽn maand fãa a Zeova nugẽ,+tɩ rẽ la f magb toor-toorã na n yãk nenga.
4 A Zeova kɩtdame tɩ bũmb fãa pidsd a raabã.A maanda woto meng sẽn na yɩl n sãam nin-wẽnsã sãoongã daare.+
5 A Zeova kisa ned buud fãa sũur sẽn pid ne wuk-m-menga.+
Bas f yam t’a pa na n põs sɩbgr ye.
6 Maan-neer la kɩs-sɩd maasem yĩnga, kongr paamda sugri.+A Zeova zoees maasem yĩnga, ned zãagda a meng ne wẽnga.+
7 A Zeova sũur sã n noom ne ned manesem,a kɩtdame t’a bɛɛbã meng zĩ bãan ne-a.+
8 Fo sã n tar bilf la f yaa nin-tɩrga,+sãoo f sẽn na n tar paoong wʋsg n yaool n pa nin-tɩrg ye.+
9 Ned tõe n maga a sẽn na n kẽn to-to a sũur pʋgẽ,la yaa a Zeova n wilgd-a sore.+
10 Bũmb ning sẽn noom Wẽnnaamã segd n zĩnda rĩm no-bɩmsẽ.+A pa segd n maan sẽn pa tɩrg a bada.+
11 Makds sẽn zems yita a Zeova nengẽ.Kɩlo-rãmbã* fãa sẽn be korgẽ wã yaa yẽ nugã tʋʋmde.+
12 Rĩm-dãmbã kisa tʋʋm-wẽnse,+bala yaa tɩrlem maasem yĩng la naam geer lugund kãn-kãe.+
13 Tɩrlem goam nooma rĩm-dãmba.
B nonga ned sẽn gomd ne pʋ-peelem.+
14 Rĩm sũ-puugr yaa wa kũum koe-taasda,+la yam soab sigsd-a lame.*+
15 Rĩm sã n maan ned lohorem, a soab vɩɩm na n yɩɩ noogo.Rĩmã lohorem yaa wa sawadg sẽn wat ne saag a wakate.*+
16 Ad f sã n paam yam n são f sẽn paamd sãnem!+
F sã n paam bãngr n são f sẽn paamd wanzuri.+
17 Nin-tɩrsã so-kõodr ginda sẽn yaa wẽnga.
Ned ning fãa sẽn kogend a sor kogenda a vɩɩm.*+
18 Wuk-m-meng n lʋɩt taoor tɩ yel-beed yaool n pʋgle.Tɩtaam n lʋɩt taoor tɩ lʋɩɩs yaool n pʋgle.+
19 F sã n yaa sik-m-meng soab n be neb sẽn pa wuk-m-mens rãmb sʋka,+sãoo f sẽn na n naag tɩta-neb n pʋɩt te-zɛɛdem.
20 Ned sã n wilgdẽ t’a tara yam yell buud fãa pʋgẽ, a yɛlã na n yɩɩ sõma.*Sũ-noog soab la ned ning sẽn teegd a Zeova.
21 Ned sũur sã n pid ne yam, b na n bool-a lame tɩ bãngr soaba.+Sẽn gomd-a gom-nood* paasda a goam pãnga.+
22 Yam-vẽenem yaa vɩɩm ko-bundg zĩiga, ned ning sẽn tar-a wã yĩnga,la yalembã yalemd n wẽneg n kibind-ba.
23 Yam soab sũur kɩtdame t’a noorã gomd yam-vẽenem goama,+la paasd a goamã pãnga.
24 Gom-nood yaa wa sɩɩd sẽn tosde.*B yaa noogo, la kengd yĩnsi.*+
25 Sor n be n wõnd a yaa tɩrg ninsaal nifẽ,la a yaool n tar n dabda kũum zĩigẽ.+
26 Yaa sẽn tʋmd-a wʋsg pʋg* n kɩt t’a tʋmd wʋsgo,bala yaa a sẽn dat rɩɩbã* n kɩt t’a tʋmdẽ.+
27 Ned sẽn ka võor tuudame n bukd sẽn yaa wẽnga.+A goamã yaa wa bugum sẽn yõogde.+
28 Sẽn magd-a mag-wẽns* wata ne no-koɛɛma.+Munaafɩɩk welgda zo-rãmb hakɩɩk ne taaba.+
29 Nen-kɛglem soab belgda a to,n kɩt t’a rɩk so-wẽnga.
30 A sã n wa magd n na n maan wẽnga, a wẽgsda a nini.
A sã n wa pidsd mag-wẽnga, a vamda a noore.
31 Zoob-peend yaa neerem* maanfo,+sã n mik tɩ f paam-b-la tɩrlmã sor zugu.+
32 Ned sũur sẽn pa yikd tao-tao+ n são gãndaoogo.Ned sẽn tõogd a meng n são ned sẽn zab n deeg tẽnga.+
33 B maanda bãnd fuug pʋgẽ,+la bãndã sẽn na n wilg bũmb ningã fãa yita a Zeova nengẽ.+
Vẽnegr toor-toore
^ Bɩ, “leoor sẽn zemsã.” Ebre, “zɩlemdã leoore.”
^ Ebre, “Sũur manegr bee ne ninsaala.”
^ Ebre, “yɩlem.”
^ Yaa bũmb b sẽn dogend balãns zugu, b sã n wa rat n mak bũmb zɩslem.
^ Bɩ, “gind-a lame.”
^ Bilgda saag sẽn niid tʋʋl-nif kiuugã sẽnese. Sa-kãens yaa tɩlɛ sẽn na yɩl tɩ koodã sẽn wekã tõog n paam biisi. Ges-y vẽnegr ning sẽn yaa B15.
^ Bɩ, “sɩɩgã.”
^ Ebre, “a na n yãa sẽn sõmbe.”
^ Bɩ, “goam sẽn be yamleoog.” Ebre, “Ned no-bɩms noosem.”
^ Ebre, “sɩ-vaka.”
^ Ebre, “n kõt kõab laafɩ.”
^ Ebre, “a noorã.”
^ Bɩ, “sɩɩg.”
^ Ebre, “Sẽn wat-a ne zũnd-zãnd.”
^ Bɩ, “ziir.”
