Ebanghelio ni Lucas 9:1-62

  • Nabilin a mangasaba ti Sangapulo ket Dua (1-6)

  • Nariribukan ni Herodes gapu ken Jesus (7-9)

  • Pakanen ni Jesus ti 5,000 (10-17)

  • Ibaga ni Pedro no asino ti Kristo (18-20)

  • Naipadto ti ipapatay ni Jesus (21, 22)

  • Ti aramiden dagiti pudno nga adalan (23-27)

  • Panagbalbaliw ti langa ni Jesus (28-36)

  • Pinaimbag ni Jesus ti ubing a linuganan ti demonio (37-43a)

  • Naibaga manen a nasaksakbay ti ipapatay ni Jesus (43b-45)

  • Pagsusupiatan dagiti adalan no asino ti katan-okan (46-48)

  • Kaduatayo ti asinoman a saan a bumusor kadatayo (49, 50)

  • Purok dagiti Samaritano a saan a nangpasangbay ken Jesus (51-56)

  • No kasano ti sumurot ken Jesus (57-62)

9  Inayabanna ti Sangapulo ket Dua ken inikkanna ida iti pannakabalin ken autoridad a mangpaksiat iti amin a demonio+ ken mangpaimbag kadagiti sakit.+  Imbaonna ida a mangikasaba iti Pagarian ti Dios ken mangpaimbag,  sana imbaga: “Dikay mangitugot iti uray ania iti panagdaliasatyo, sarukod man wenno pagkargaan iti taraon wenno tinapay wenno kuarta* wenno dua a bado.*+  Ngem sadinoman a balay a serkanyo, agyankayo sadiay agingga a pumanawkayo iti dayta a lugar.+  No saandakayo nga awaten, pumanawkayo iti dayta a siudad ket pampagenyo ti tapok kadagiti sakayo kas pangsaksi kadakuada.”+  Napanda iti amin a purok tapno ikasabada ti naimbag a damag ken paimbagenda dagiti masakit.+  Ni Herodes* nga agturay iti distrito* nangngegna dagitoy a mapaspasamak isu a nariribukan unay gapu ta adda dagiti mangibagbaga a nagungaren ni Juan,+  ngem kuna met ti dadduma nga adda manen ni Elias, sa adda pay dagiti agkunkuna a nagungaren ti maysa kadagiti propeta idi un-unana.+  Kinuna ni Herodes: “Pinapugotakon ni Juan.+ Asino ngarud daytoy madamdamagko?” Isu a kayatna a makita dayta a tao.+ 10  Idi nagsubli dagiti apostol, impadamagda ken Jesus ti amin nga inaramidda.+ Inkuyogna ida ket napanda nga is-isuda iti siudad ti Betsaida.+ 11  Ngem idi naammuan dayta dagiti tattao, simmurotda. Naasian kadakuada ket insurona ida maipapan iti Pagarian ti Dios ken pinaimbagna dagiti masakit.+ 12  Idi mumalemen, immasideg kenkuana ti Sangapulo ket Dua ken imbagada: “Ibagam kadagiti tattao a mapandan kadagiti away ken purok iti aglawlaw ket agbirokda iti pagdagusan ken kanenda ta awan matatao ditoy.”+ 13  Ngem kinunana kadakuada: “Pakanenyo ida.”+ Kinunada: “Lima la a tinapay ken dua nga ikan ti adda kadakami, malaksid no mapankami gumatang iti ipakan kadakuada amin.” 14  Kinaagpaysuanna, adda idi agarup 5,000 a lallaki. Ngem kinunana kadagiti adalanna: “Ibagayo nga aggugrupoda nga agtugaw iti saglilimapulo.” 15  Kasta ti inaramidda ket pinagtugawda amin ida. 16  Innalana ti lima a tinapay ken dua nga ikan, ket timmangad iti langit sa dimmawat iti pamendision. Kalpasanna, pinispisina dagita sana inted kadagiti adalan tapno iwarasda kadagiti tattao. 17  Nanganda amin ket nabsogda. Idi inurnongda dagiti natedda, napno ti 12 a basket.+ 18  Kalpasanna, bayat a maymaysana nga agkarkararag, inasitgan dagiti adalanna. Insaludsodna kadakuada: “Asinoak iti panagkuna dagiti tattao?”+ 19  Insungbatda: “Sika kano ni Juan a Mammautisar, ngem kuna met ti dadduma a sika ni Elias, ken adda pay dagiti agkuna a maysaka kadagiti nagkauna a propeta a napagungar.”+ 20  Kinunana kadakuada: “Dakayo ngay, asinoak iti panagkunayo?” Insungbat ni Pedro: “Sika ti Kristo ti Dios.”+ 21  Gapuna, imbilinna kadakuada a dida ibagbaga dayta iti asinoman,+ 22  ngem kinunana: “Adu a rigat ti masapul a mapasaran ti Anak ti tao ken ilaksid dagiti panglakayen, panguluen a papadi, ken dagiti eskriba sa mapapatay+ ngem mapagungar iti maikatlo nga aldaw.”+ 23  Idin kinunana iti isuamin: “Asinoman a mayat a sumurot kaniak, tallikudanna koma ti bagina+ ket inaldaw a bagkatenna ti kayona a pagtutuokan* ken agtultuloy a surotennak.+ 24  Ta ti mangikagumaan a mangisalakan iti biagna,* mapukawnanto dayta. Ngem ti makapukaw iti biagna* maigapu kaniak, maisalakannanto dayta.+ 25  Adda aya magunggona ti maysa a tao no matagikuana ti intero a lubong ngem mapukawna met ti biagna wenno agpeggad ti biagna?+ 26  Ta asinoman a mangibain kaniak ken iti ibagbagak, ibainto met ti Anak ti tao inton umay iti dayagna ken iti dayag ni Amana ken iti dayag dagiti nasantuan nga anghel.+ 27  Ngem ipasiguradok kadakayo nga adda sumagmamano kadagiti nakatakder ditoy a saanto a matay agingga a makitada nga umuna ti Pagarian ti Dios.”+ 28  Kinaagpaysuanna, agarup walo nga aldaw kalpasan nga imbagana dagita, inkuyogna da Pedro, Juan, ken Santiago a simmang-at iti bantay tapno agkararag.+ 29  Bayat nga agkarkararag, nagbaliw ti langa ti rupana ket nagbalin a sumilsilap a puraw ti badona. 30  Ket adda dua a lallaki a makisarsarita kenkuana; da Moises ken Elias. 31  Naraniag ti langada idi agparangda ket nagsasaritaanda ti ipapanawna a dandanin mapasamak idiay Jerusalem.+ 32  Nakaturog idi ni Pedro ken ti kakaduana, ngem idi makariingda, nakitada ti dayag ni Jesus+ ken ti dua a lallaki nga agtaktakder iti abayna. 33  Idi pumanawen dagiti kakadua ni Jesus, kinuna ni Pedro: “Mannursuro, maragsakankami unay ta addakami ditoy. Ibangonandakayo ngarud iti tallo a tolda, maysa para kenka, maysa para ken Moises, ken maysa para ken Elias.” Saan idi nga ammo ni Pedro ti ibagbagana. 34  Ngem bayat nga ibagbagana dagita, adda ulep a nanglinong kadakuada, ket nagbutengda iti kasta unay ta inabbongan ida ti ulep. 35  Idi kuan, adda timek+ a nagsao manipud iti ulep: “Daytoy ti Anakko, daydiay pinilik.+ Dumngegkayo kenkuana.”+ 36  Bayat a mangmangngegda ti timek, nakitada a maymaysan ni Jesus. Ngem dida nagtagtagari ken awan ti nangibagbagaanda kadagidi a tiempo kadagita a nakitada.+ 37  Kabigatanna, simmalogda iti bantay ket simmabat ken Jesus ti nagadu a tattao.+ 38  Pagammuan ta adda lalaki a nagpukkaw: “Mannursuro, kaasiannak. Kitaem koma daytoy barok, ti kakaisuna nga anakko.+ 39  Linuganan ti demonio ket no sumro, pagikkisen ken pagkuyegyegenna ti anakko, sa paglabutabenna ti ngiwatna. Dandani saan a pumanaw kenkuana kalpasan a dangranna. 40  Impakpakaasik kadagiti adalam a paruarenda ngem dida kabaelan.” 41  Kinuna ni Jesus: “Dakayo nga awanan pammati ken dakes a henerasion,+ kasano pay kabayag a masapul a makikaduaak kadakayo? Kasano pay kabayag nga an-anusankayo? Iyegmo kaniak ti anakmo.”+ 42  Ngem uray idi umas-asideg ti ubing, intumba ti demonio iti daga sana pinagkuyegyeg iti kasta unay. Ngem tinubngar ni Jesus ti dakes nga espiritu ken pinaimbagna ti ubing sana inyasideg ken amana. 43  Ket kasta unay ti siddaaw ti amin a tattao iti nakabilbileg a pannakabalin ti Dios. Bayat a masmasdaaw ti amin kadagiti amin nga ar-aramidenna, imbagana kadagiti adalanna: 44  “Dumngegkayo a naimbag ken tandaananyo dagitoy ibagak, ta matraidorto ti Anak ti tao iti ima dagiti bumusbusor kenkuana.”+ 45  Ngem dida naawatan ti ibagbagana. Kinapudnona, nailimed dayta kadakuada tapno saanda a matarusan, ket mabutengda nga agsaludsod maipapan iti dayta nga imbagana. 46  Kalpasanna, nagsusupiatanda no asino kadakuada ti katan-okan.+ 47  Ammo ni Jesus ti pampanunotenda isu a nangala iti maysa nga ubing, pinagtakderna iti abayna, 48  ket imbagana kadakuada: “Asinoman nga umawat iti daytoy nga ubing maigapu iti naganko, awatennak met; ket asinoman nga umawat kaniak, awatenna met Daydiay nangibaon kaniak.+ Ta ti agbalin a nanumnumo kadakayo, isu ti natan-ok.”+ 49  Kinuna ni Juan kenkuana: “Mannursuro, nakakitakami iti maysa a tao a mangus-usar iti naganmo a mangparparuar kadagiti demonio ket linapdanmi ta saantayo met a kadua.”+ 50  Ngem kinuna ni Jesus: “Bay-anyo latta, ta ti saan a bumusor kadakayo ket kaduayo.” 51  Bayat nga umas-asideg* dagiti aldaw nga iyuulina idiay langit,+ desidido unayen a mapan idiay Jerusalem. 52  Isu a pinaunana ti dadduma nga adalanna. Napanda iti maysa a purok dagiti Samaritano tapno agsaganada para kenkuana. 53  Ngem saanda nga inawat,+ gapu ta determinado* a mapan idiay Jerusalem. 54  Idi nakita dayta da Santiago ken Juan+ nga adalanna, kinunada: “Apo, kayatmo kadi nga agkiddawkami iti apuy a bumaba manipud langit tapno maibusda?”+ 55  Ngem sinango ken binabalawna ida. 56  Kalpasanna, napanda iti sabali a purok. 57  Bayat a magmagnada, adda nagkuna kenkuana: “Surotenkanto sadinoman ti papanam.” 58  Ngem insungbat ni Jesus: “Adda pagyanan dagiti sora ken adda umok dagiti billit, ngem ti Anak ti tao awan ti pangisadaganna iti ulona.”+ 59  Kinunana iti maysa pay a lalaki: “Agbalinka a pasurotko.” Kinuna ti lalaki: “Apo, itabonko pay koma nga umuna ni tatangko.”+ 60  Ngem kinunana kenkuana: “Bay-am a dagiti natay+ ti mangitabon iti minatayda. Inka ketdi ipakaammo ti Pagarian ti Dios iti amin a lugar.”+ 61  Imbaga met ti sabali pay: “Sumurotak kenka, Apo, ngem agpakadaak pay koma nga umuna iti pamiliak.” 62  Kinuna kenkuana ni Jesus: “Ti tao nga agar-arado a tumaltaliaw iti likudanna+ ket saan a maikari iti Pagarian ti Dios.”+

Footnotes

Lit., “pirak.”
Wenno “maysa pay a bado.”
Kayatna a sawen, ni Herodes Antipas. Kitaem ti Glosario.
Lit., “a tetrarka.”
Kitaem ti Glosario.
Wenno “kararuana.”
Wenno “kararuana.”
Lit., “a dumdumteng idin ti pannakaan-anay.”
Lit., “nakaturong ti rupana.”