Ebanghelio ni Lucas 19:1-48

  • Bisitaen ni Jesus ni Zakeo (1-10)

  • Ilustrasion maipapan iti 10 a mina (11-27)

  • Naballigi nga iseserrek ni Jesus (28-40)

  • Sangitan ni Jesus ti Jerusalem (41-44)

  • Dalusan ni Jesus ti templo (45-48)

19  Ket nakadanon idiay Jerico ken magmagna idi iti dalan.  Adda lalaki sadiay nga agnagan iti Zakeo. Isu ket baknang ken panguluen dagiti agsingsingir iti buis.  Kayatna a makita no asino dayta a Jesus, ngem dina makita gapu ta pandek ken nagadu ti tao.  Isu a nagtaray ket inun-unaanna dagiti tattao. Immuli iti kayo a sikomoro* tapno makitana ni Jesus a dandanin lumabas iti dayta a dalan.  Idi nakadanon ni Jesus iti batog ni Zakeo, timmangad ket kinunana: “Zakeo, darasem ti umulog ta umayak ita idiay balaymo.”  Dagus nga immulog ket maragragsakan a nangsangaili kenkuana.  Idi makita dagiti tattao, nagdaydayamudomda amin: “Napan nagdagus iti balay ti maysa a managbasol.”+  Ngem timmakder ni Zakeo ket kinunana: “Apo, itedko kadagiti napanglaw ti kagudua dagiti sanikuak, ket isublik iti mamimpat ti aniaman a kinikilko* iti asinoman.”+  Gapu iti daytoy, kinuna ni Jesus: “Ita nga aldaw, dimteng ti pannakaisalakan iti daytoy a balay, ta isu ket anak met ni Abraham. 10  Ta immay ti Anak ti tao tapno sapulen ken isalakanna ti napukaw.”+ 11  Bayat a dumdumngeg dagiti adalan, adda manen imbagana nga ilustrasion gapu ta ipagarup dagiti adalan nga apaman a makadanonda idiay Jerusalem, umay a dagus ti Pagarian ti Dios.+ 12  Kinunana: “Adda maysa a tao manipud iti natan-ok a pamilia a napan iti adayo a lugar+ tapno gun-odenna ti pannakabalin kas ari sa agsubli met laeng. 13  Inayabanna ti 10 kadagiti adipenna ket inikkanna ida iti 10 a mina,* sana imbaga, ‘Inegosioyo dagitoy agingga nga agsubliak.’+ 14  Ngem kinagura dagiti kailianna ken nangibaonda iti maysa a grupo dagiti embahador a mangibaga kenkuana, ‘Dimi kayat nga agarika kadakami.’ 15  “Idi nagsubli kalpasan a nagun-odanna ti pannakabalinna kas ari,* inayabanna dagiti adipen a nangtedanna iti kuarta,* tapno maammuanna no mano ti naganansiada iti pananginegosioda iti kuartana.+ 16  Immasideg ti umuna nga adipen ket kinunana, ‘Apo, ti intedmo a mina ket nakaganansia iti 10 a mina.’+ 17  Imbagana kenkuana, ‘Nagsayaat ti inaramidmo, naimbag nga adipen! Gapu ta mapagtalkanka uray iti nakabasbassit a banag, iturayam ti 10 a siudad.’+ 18  Immay met ti maikadua ket kinunana, ‘Apo, nakaganansia iti 5 a mina ti intedmo a mina.’+ 19  Kinunana met iti daytoy nga adipen, ‘Uray sika, iturayam ti 5 a siudad.’ 20  Ngem immay ti sabali pay nga adipen ket kinunana, ‘Apo, daytoy ti intedmo a mina. Binungonko iti lupot ken indulinko. 21  Mabutengak ngamin kenka ta nauyongka, ken alaem ti kuarta a saanmo nga indeposito ket aniem ti saanmo nga immula.’+ 22  Kinunana iti adipen, ‘Dakes nga adipen, ukomenka iti mismo nga imbagam. Ammom la ngaruden a nauyongak, ken alaek ti saanko nga indeposito ken aniek ti saanko nga immula,+ 23  apay ngarud a saanmo nga indeposito ti kuartak* iti banko? Tapno iti isasangpetko, alaek koma daytan agraman ti interesna’ 24  “Gapuna, imbilin ti ari kadagiti agtaktakder sadiay, ‘Alaenyo ti mina nga adda kenkuana ket itedyo iti addaan iti 10 a mina.’+ 25  Ngem insungbatda, ‘Apo, addaanen iti 10 a mina!’—​ 26  ‘Ibagak kadakayo a ti asinoman nga addaan, ad-adunto pay ti maited kenkuana, ngem daydiay awanan, maalanto uray ti adda kenkuana.+ 27  Iyegyo met ditoy dagiti kabusorko a dida kayat nga agbalinak nga ari ket patayenyo ida iti sanguanak.’” 28  Idi naibaga ni Jesus dagitoy, simmang-aten a napan idiay Jerusalem. 29  Idi asidegen iti Betfage ken Betania, iti Bantay Dagiti Olibo,+ imbaonna ti dua kadagiti adalanna.+ 30  Kinunana: “Mapankayo iti masungad a purok, ket inton makastrekkayo, makakitakayto iti naigalut nga urbon nga asno a di pay nasaksakayan. Warwaranyo ken iyegyo ditoy. 31  Ngem no adda agsaludsod kadakayo, ‘Apay a warwarwaranyo ti urbon nga asno?’ ibagayo, ‘Kasapulan daytoy ti Apo.’” 32  Isu a napan dagiti naibaon ket nakitada dayta kas iti imbagana.+ 33  Ngem bayat a warwarwaranda ti urbon nga asno, insaludsod dagiti makinkukua iti dayta: “Apay a warwarwaranyo ti urbon nga asno?” 34  Insungbatda: “Kasapulan daytoy ti Apo.” 35  Impanda dayta ken Jesus, sa imparabawda ti makinruar a badoda iti urbon nga asno ket impasakayda ni Jesus.+ 36  Bayat a mapmapan ni Jesus, inyaplagda ti makinruar a badoda iti dalan.+ 37  Idi asidegen iti dalan a sumalog iti Bantay Dagiti Olibo, naragsakan ti adu nga adalan ket indaydayawda ti Dios iti napigsa a timek gapu iti amin a milagro a nakitada, 38  nga ibagbagada: “Mabendisionan koma daydiay umay kas Ari iti nagan ni Jehova!* Talna iti langit, ken maidaydayaw ti Dios nga adda iti langit!”+ 39  Ngem kinuna ti sumagmamano a Fariseo nga adda iti bunggoy: “Mannursuro, tubngarem dagiti adalam.”+ 40  Ngem insungbatna: “Ibagak kadakayo, no agulimekda, agpukkaw dagiti bato.” 41  Idi asidegen, kinitana ti siudad ket sinangitanna,+ 42  nga ibagbagana: “No naawatam la koma ita nga aldaw dagiti bambanag maipapan iti talna—​ngem ita, saanmon a makita dagita.+ 43  Ta dumtengto dagiti aldaw a dagiti kabusormo ket mangbangonto iti aglawlawmo iti bakud a natirad a kaykayo ket aggapudanto iti amin a direksion a mangraut* kenka.+ 44  Dadaelendakanto a mamimpinsan, sika ken dagiti annakmo,+ ket awanto ti nagtinnuon a bato a mabati kenka,+ ta saanmo a nailasin ti tiempo ti pannakainspeksionmo.” 45  Kalpasanna, simrek iti templo ket pinapanawna dagiti aglaklako,+ 46  nga ibagbagana: “Kas naisurat, ‘Ti balayko ket maawaganto iti balay a pagkararagan,’+ ngem pinagbalinyo a kueba dagiti mannanakaw.”+ 47  Intultuloyna ti nangisuro idiay templo iti inaldaw. Ngem kayat a patayen dagiti panguluen a papadi, eskriba, ken dagiti panguluen dagiti tattao.+ 48  Nupay kasta, saanda a nakabirok iti pamay-an a maaramidda dayta ta sipapasnek a dumdumngeg kenkuana ti amin a tattao.+

Footnotes

Wenno “higos-amoras.”
Wenno “nga innalak babaen ti di umiso nga akusasion.”
Ti 1 mina iti Griego ket 340 g ken naibilang nga agbalor iti 100 drakma. Kitaem ti App. B14.
Wenno “ti pagarian.”
Lit., “pirak.”
Lit., “pirakko.”
Kitaem ti App. A5.
Wenno “mangpalikmut.”