Ebanghelio ni Lucas 7:1-50
7 Idi nalpasnan nga imbaga dagitoy a bambanag kadagiti tattao, napan idiay Capernaum.
2 Adda idi maysa nga opisial ti armada. Masakit ti ipatpategna nga adipen ken dandanin matay.+
3 Idi nangngegna ti maipapan ken Jesus, nangibaon iti dadduma a panglakayen dagiti Judio a mapan ken Jesus tapno kiddawenda nga umayna paimbagen ti adipenna.
4 Dimtengda ken Jesus ket impakpakaasida: “Patgam koma ti kiddawna,
5 ta ay-ayatenna ti nasiontayo ken imbangonannatayo iti sinagoga.”
6 Kimmuyog ngarud ni Jesus kadakuada. Ngem idi asidegen iti balay, nangibaon ti opisial ti armada kadagiti gagayyemna tapno ibagada kenkuana: “Apo, saankan nga umay, ta saanak a maikari a mangpastrek kenka iti balayko.+
7 Panagriknak, saanak a maikari nga umay kenka. Ibagam laengen nga umimbag ti adipenko ket umimbagto.
8 Ta adda met pagtulnogak a nangatngato ngem siak ken adda dagiti soldado nga agtultulnog kaniak. No kunak iti maysa, ‘Mapanka!’ mapan, no kunak iti sabali, ‘Umayka!’ umay, ken no ibilinko iti adipenko, ‘Aramidem daytoy!’ aramidenna.”
9 Nasdaaw ni Jesus idi nangngegna dagitoy ket kinunana kadagiti sumursurot kenkuana: “Ibagak kadakayo, ita pay laeng a nakasarakak iti Israel iti kastoy kadakkel a pammati.”+
10 Idi nakaawiden dagiti naibaon, nasangpetanda nga immimbagen ti adipen.+
11 Di nagbayag, napan iti siudad a maawagan iti Nain, ket simmurot dagiti adalanna ken adu pay a tattao.
12 Idi asidegen iti ruangan ti siudad, adtoy! mairuruar ti maysa a natay a lalaki, ti kakaisuna* nga anak ti inana a maysa a balo.+ Adu met a taga-siudad ti kimmuyog kenkuana.
13 Naasian ti Apo idi makitana ti balo,+ ket kinunana: “Isardengmon ti agsangit.”+
14 Kalpasanna, inasitgan ken sinagidna ti pagiddaan ti natay ket simmardeng a nagna dagiti mangbagbagkat. Kinunana: “Barok, ibagak kenka, bumangonka!”+
15 Ket bimmangon ti natay ken nagsao, sa inyasideg ni Jesus iti inana.+
16 Nagbutengda amin ket indaydayawda ti Dios, nga ibagbagada: “Addaantayon iti maysa a mannakabalin a propeta,”+ ken, “Naasian ti Dios iti ilina.”+
17 Ket nagdinamag dayta a pasamak iti intero a Judea ken iti aglawlawna.
18 Impadamag dagiti adalan ni Juan kenkuana amin dagitoy a banag.+
19 Isu nga inayaban ni Juan ti dua kadagiti adalanna sana imbaon iti Apo tapno isaludsodda: “Sika kadi Daydiay Umay,+ wenno adda sabali?”
20 Kinunada kenkuana idi nakadanonda: “Imbaonnakami ni Juan a Mammautisar tapno isaludsodmi kenka, ‘Sika kadi Daydiay Umay, wenno adda pay sabali?’”
21 Iti dayta nga oras, pinaimbagna ti adu a masakit,+ dagiti grabe a sakit, dagiti naluganan kadagiti dakes nga espiritu, ken insublina ti panagkita ti adu a bulsek.
22 Insungbatna: “Agsublikayo ken Juan ket ipadamagyo dagiti nakita ken nangngegyo: Makakitan dagiti bulsek,+ makapagnan dagiti pilay, immimbagen dagiti agkukutel, makangngegen dagiti tuleng,+ napagungaren dagiti natay, ken maikaskasaban ti naimbag a damag kadagiti napanglaw.+
23 Naragsak daydiay saan a maitibkol gapu kaniak.”+
24 Idi nakapanawen dagiti adalan ni Juan, nagsao ni Jesus kadagiti tattao maipapan ken Juan: “Ania ti napanyo kinita idiay let-ang? Maysa a runo a mayang-angin?+
25 Ania ti nakitayo? Maysa a tao a nakabado iti nalamuyot* a lupot?+ Dagiti nakabado iti napintas ken nagarbo ti panagbiagna ket agnanaed kadagiti balay dagiti ari.
26 Ania ngarud ti napanyo kinita? Maysa a propeta? Wen, nakakitakayo iti propeta, ngem saan laeng a basta propeta.+
27 Isu daytoy daydiay tuktukoyen ti naisurat: ‘Adtoy! Ibaonko ti mensaherok nga umun-una ngem sika* a mangisagananto iti dalanmo.’+
28 Ibagak kadakayo, iti amin a nayanak, awan ti natantan-ok ngem ni Juan. Ngem daydiay kanunumuan iti Pagarian ti Dios ket natantan-ok ngem ni Juan.”+
29 (Idi nangngeg daytoy ti amin a tattao ken dagiti agsingsingir iti buis, binigbigda a nalinteg ti Dios ta binautisaran idan ni Juan.+
30 Ngem dagiti Fariseo ken dagiti eksperto iti Linteg saanda nga impangag ti balakad* ti Dios kadakuada,+ ket saanda a nagpabautisar ken Juan.)
31 “Siasino, ngarud, ti pangikomparaak kadagiti tattao iti daytoy a henerasion, ket siasino dagiti kapadada?+
32 Kasda la kadagiti ubbing nga agtugtugaw iti pagtagilakuan nga agpipinnukkaw: ‘Tinokarandakayo iti plauta ngem saankayo a nagsala, nagdung-awkami ngem saankayo a nagsangit.’
33 Immay met ni Juan a Mammautisar a saan a nangnangan iti tinapay wenno immin-inum iti arak,+ ngem kunayo: ‘Adda demoniona.’
34 Immay ti Anak ti tao a mangmangan ken umin-inum, ngem kunayo: ‘Narawet ken mangnginum iti arak daytoy a tao, gayyem dagiti agsingsingir iti buis ken dagiti managbasol!’+
35 Nupay kasta, ti sirib mapaneknekan a nalinteg babaen kadagiti resultana.”*+
36 Adda Fariseo a kanayon a mangaw-awis ken Jesus a makipangan kenkuana. Isu a napan iti balay ti Fariseo, ket nagsadag iti lamisaan.
37 Immay ti maysa a babai nga agdindinamag iti siudad a managbasol. Nadamagna a mangmangan* ni Jesus iti balay ti Fariseo isu a nangitugot iti alabastro a pagkargaan iti nabanglo a lana.+
38 Nagpuesto ti babai iti sakaanan ni Jesus ken nagsangit ket uray la nabasa iti lua dagiti saka ni Jesus, ngem pinunasanna dagita babaen ti buokna. Inagkanna pay a sidudungngo dagiti saka ni Jesus sana sinapsapuan iti nabanglo a lana.
39 Idi nakita daytoy ti Fariseo a nangawis ken Jesus, kinunana iti un-unegna: “No talaga a propeta daytoy a tao, ammona koma no ania a klase a babai ti mangsagsagid kadagiti sakana, nga isu ket managbasol.”+
40 Ngem kinuna ni Jesus, “Simon, adda ibagak.” Insungbatna: “Ania daydiay, Mannursuro?”
41 “Adda maysa a nagpautang iti dua a lallaki; 500 a denario* ti utang ti maysa ken 50 met ti sabali.
42 Gapu ta saanda a makabayad, sibubulos a pinakawan ida ti nagpautang. Asino ngarud kadakuada ti ad-addanto a mangayat iti nagpautang?”
43 Insungbat ni Simon: “Panagkunak, daydiay napakawan nga ad-adu ti utangna.” Kinuna ni Jesus: “Husto ti sungbatmo.”
44 Kinita ni Jesus ti babai sa kinunana ken Simon: “Makitam daytoy a babai? Simrekak iti balaymo ngem dinak inikkan iti danum a pangbuggok kadagiti sakak. Ngem binabasa daytoy a babai dagiti sakak kadagiti luana sana pinunasan babaen ti buokna.
45 Saannak nga inagkan, ngem manipud itay simrekak, sidudungngo nga ag-agkanen daytoy a babai dagiti sakak.
46 Saanmo a linanaan ti ulok, ngem binukbokan daytoy a babai dagiti sakak iti nabanglo a lana.
47 Isu nga uray adu* ti basolna, napakawanen,+ ta impakitana ti kasta unay a panagayat. Ngem ti mapakawan iti bassit, bassit met ti panagayatna.”
48 Kalpasanna, kinunana iti babai: “Napakawanen dagiti basolmo.”+
49 Dagiti kakaduana a nakasadag iti lamisaan kinunada iti maysa ken maysa: “Asino daytoy a tao a kabaelanna pay a pakawanen dagiti basol?”+
50 Ngem kinunana iti babai: “Insalakannaka ti pammatim;+ mapankan a sitatalna.”
