Ebanghelio ni Lucas 4:1-44
-
Ti Diablo sulisogenna ni Jesus (1-13)
-
Irugi ni Jesus ti mangasaba idiay Galilea (14, 15)
-
Saan a napadayawan ni Jesus idiay Nazaret (16-30)
-
Iti sinagoga idiay Capernaum (31-37)
-
Napaimbag ti babai a katugangan ni Simon ken ti dadduma pay (38-41)
-
Dagiti tattao mabirokanda ni Jesus iti awan matataona a lugar (42-44)
4 Napno ni Jesus iti nasantuan nga espiritu idi pimmanaw idiay Jordan, ket inturong ti espiritu idiay let-ang+
2 iti 40 nga aldaw, ket sinulisog sadiay ti Diablo.+ Iti dayta a tiempo, saan a nangnangan isu a mabisinen.
3 Kinuna ti Diablo: “No sika ket anak ti Dios, ibagam iti daytoy a bato nga agbalin a tinapay.”
4 Ngem simmungbat ni Jesus: “Kuna ti Kasuratan, ‘Saan laeng a tinapay ti pagbiag ti tao.’”+
5 Isu nga impanna iti bantay ket impakitana iti apagbiit ti amin a pagarian iti mapagnaedan a daga.+
6 Ket kinuna ti Diablo: “Itedko kenka ti amin nga autoridad ken ti kinadayagda, ta nayawaten dayta kaniak,+ ket itedko iti asinoman a kayatko a pangtedan.
7 Kukuam amin dagitoy no agdayawka kaniak uray maminsan laeng.”
8 Simmungbat ni Jesus: “Kuna ti Kasuratan, ‘Ni laeng Jehova* a Diosmo ti masapul a pagdayawam, ket isu laeng ti masapul a pangipaayam iti sagrado a panagserbi.’”+
9 Kalpasanna, impan ti Diablo ni Jesus idiay Jerusalem. Inturongna iti kangatuan a paset ti templo sa kinunana: “No sika ket anak ti Dios, tumapuakka,+
10 ta kuna ti Kasuratan, ‘Bilinenna dagiti anghelna a mangsalaknib kenka,’
11 ken, ‘Sarapaendakanto tapno saan a maidungpar ta sakam iti bato.’”+
12 Insungbat ni Jesus: “Kuna ti Kasuratan: ‘Dimo suboken ni Jehova* a Diosmo.’”+
13 Kalpasan a sinulisogna ni Jesus, pimmanaw ti Diablo, agingga iti sabali manen a maitutop a gundaway.+
14 Nagsubli ni Jesus idiay Galilea a napno iti nasantuan nga espiritu.+ Ket nagwaras dagiti nasayaat a damag maipapan kenkuana iti amin a purok iti aglawlaw.
15 Nangisursuro met kadagiti sinagogada, ket pinadpadayawan ti amin a tattao.
16 Kalpasanna, napan idiay Nazaret,+ ti ili a dimmakkelanna, ket kas iti nakairuamanna iti aldaw ti Sabbath, simrek iti sinagoga,+ ket timmakder tapno agbasa.
17 Isu a nayawat kenkuana ti lukot ni propeta Isaias. Inukradna ket nasarakanna ti paset a nakaisuratan daytoy:
18 “Adda kaniak ti espiritu ni Jehova,* ta dinutokannak* a mangipakaammo iti naimbag a damag kadagiti napanglaw. Imbaonnak a mangiwaragawag iti pannakawayawaya dagiti naipanaw ken iti pannakaisubli ti panagkita dagiti bulsek. Imbaonnak a mangwayawaya kadagiti maparparigat,+
19 ken mangikasaba iti naparaburan a tawen ni Jehova.”*+
20 Kalpasanna, linukotna ti pagbasaan, insublina iti katulongan sa nagtugaw; ket kitkitaen ti amin nga adda iti sinagoga.
21 Kinunana kadakuada: “Daytoy a paset ti kasuratan a kangkangngegyo ket natungpalen.”+
22 Nagsayaat ti imbagbaga ti amin maipapan ken Jesus ken nagsiddaawda kadagiti agkakapintas nga ibagbagana,+ ket kinunada: “Saan kadi nga anak daytoy ni Jose?”+
23 Isu a kinunana kadakuada: “Sigurado nga ibagayonto kaniak daytoy a pagsasao, ‘Doktor, agasam ta bagim. Aramidem met ditoy mismo nga ilim dagiti nadamagmi nga inaramidmo idiay Capernaum.’”+
24 Ngem kinunana: “Ibagak kadakayo, awan ti propeta a maawat iti mismo nga ilina.+
25 Kas pagarigan, kinaagpaysuanna, adu ti balo idiay Israel idi panawen ni Elias, idi saan a nagtudo iti tallo a tawen ken innem a bulan, ken adda nakaro unay a bisin iti intero a daga.+
26 Ngem awan kadagita a babbai ti nakaibaonan ni Elias, no di laeng iti maysa a balo idiay Sarefat, iti daga ti Sidon.+
27 Adu met ti agkukutel idiay Israel idi tiempo ni Eliseo a propeta; ngem awan uray maysa kadakuada ti nadalusan,* no di laeng ni Naaman a Siriano.”+
28 Napalalo ti pungtot ti amin nga adda iti sinagoga idi nangngegda dagita nga imbagana,+
29 isu a timmakderda ken pinagtalawda ni Jesus iti siudad. Ginuyodguyodda nga inruar, sada impan iti tapaw ti bantay a nakaibangonan ti siudadda tapno itapuakda a ti ulona ti umuna.
30 Ngem diretso a nagna iti nagtetengngaanda sa nagtultuloy iti dalanna.+
31 Simmalog ni Jesus idiay Capernaum a maysa a siudad ti Galilea. Bayat ti Sabbath, insursurona dagiti tattao,+
32 ket nasdaawda iti pamay-anna a mangisuro,+ ta adda autoridad ti panagsaona.
33 Iti sinagoga, adda lalaki a linuganan ti dakes nga espiritu, maysa a demonio a mangipukpukkaw:+
34 “Ah! Apay nga immayka ditoy, Jesus a Nazareno?+ Umaynakami kadi dadaelen? Ammok no asinoka a talaga, sika ti Nasantuan nga Adipen ti Dios.”+
35 Ngem tinubngar ni Jesus ti demonio: “Agulimekka! Rummuarka kenkuana.” Tinumba ti demonio ti lalaki iti sanguanan dagiti tattao, sa rimmuar a dina inan-ano ti lalaki.
36 Nagsiddaaw unay ti amin a tattao ket kinunada: “Ania dayta nga ibagbagana? Adda autoridad ken pannakabalinna a mangbilin kadagiti dakes nga espiritu ket rummuarda!”
37 Isu a nagdindinamag ti maipapan kenkuana iti amin a paset dayta a lugar.
38 Idi nakapanawen ni Jesus iti sinagoga, napan idiay balay ni Simon. Nangato idi ti gurigor ti babai a katugangan ni Simon isu a nagpatulongda ken Jesus.+
39 Timmakder ngarud ni Jesus iti abay ti babai ket pinasardengna ti gurigor isu a nagpukawen dayta. Bimmangon a dagus ket nagserbi kadakuada.
40 Ngem idi lumlumneken ti init, impanda kenkuana dagiti tattao a nagduduma ti sakitna. Imparabawna dagiti imana iti tunggal maysa ket pinaimbagna ida.+
41 Rimmuar met dagiti demonio iti adu a tattao, ket ipukpukkawda: “Sika ti Anak ti Dios.”+ Ngem tinubngar ida ni Jesus, ken linapdanna ida nga agsao,+ ta ammoda nga isu ti Kristo.+
42 Iti apaglawag, napan ni Jesus iti awan matataona a lugar.+ Ngem binirbirok dagiti tattao ket idi masarakanda, impakaasida a di pay la pumampanaw.
43 Ngem kinunana kadakuada: “Masapul nga ipakaammok met ti naimbag a damag ti Pagarian ti Dios iti dadduma pay a siudad, ta daytoy ti nakaibaonak.”+
44 Isu a napan nangaskasaba kadagiti sinagoga iti Judea.
