Ebanghelio ni Lucas 8:1-56
-
Dagiti babbai a nakikuykuyog ken Jesus (1-3)
-
Ti nagmula (4-8)
-
No apay a nagusar ni Jesus kadagiti ilustrasion (9, 10)
-
Nailawlawag ti ilustrasion maipapan iti tao a nagmula (11-15)
-
Saan a rumbeng a makaluban ti lampara (16-18)
-
Ti ina ken kakabsat ni Jesus (19-21)
-
Pagtalnaen ni Jesus ti bagyo (22-25)
-
Ibaon ni Jesus dagiti demonio kadagiti baboy (26-39)
-
Anak ni Jairo; sagiden ti maysa a babai ti makinruar a bado ni Jesus (40-56)
8 Di nagbayag kalpasanna, napan nangaskasaba ni Jesus kadagiti siudad ken purpurok, nga inwarwaragawagna ti naimbag a damag ti Pagarian ti Dios,+ a kaduana ti Sangapulo ket Dua,
2 agraman ti dadduma a babbai nga immimbagen ken rimmuaran dagiti dakes nga espiritu: Ni Maria a maawagan iti Magdalena a rimmuaran ti pito a demonio;
3 ni Juana+ nga asawa ni Cuza, a maysa a katalek ni Herodes; ni Susana; ken adu pay a babbai, nga inus-usarda dagiti sanikuada iti panagserbida kadakuada.+
4 Idi nakapaguummongen ti adu a tattao agraman dagiti sumursurot kenkuana iti tunggal siudad, adda imbagana nga ilustrasion:+
5 “Maysa a tao ti napan nagmula iti bin-ina. Bayat nga agiwarwaris, nagdisso ti dadduma iti igid ti dalan, isu a napayatpayatan ken tinuktok dagiti billit.+
6 Nagdisso met ti dadduma iti dakkel a bato. Nagtubo ngem nalaylayda met laeng ta awan dam-egna.+
7 Adda met dagiti nagdisso kadagiti siitan a mula, a nakigiddan a dimmakkel ken nanglapped iti panagdakkel dagiti bin-i.+
8 Ngem nagdisso ti dadduma iti nasayaat a daga. Idi dimmakkeldan, nagbungada iti mamin-100.”+ Kalpasanna, impigsana nga imbaga: “Asinoman nga adda lapayagna a dumngeg, dumngeg koma.”+
9 Ngem dinamag dagiti adalanna ti kaipapanan daytoy nga ilustrasion.+
10 Kinunana: “Naited kadakayo ti gundaway a mangtarus kadagiti sagrado a palimed maipapan iti Pagarian ti Dios. Ngem iti dadduma, agtalinaed nga ilustrasion+ ti amin a banag, ta nupay kumitkitada, saanda latta a makita, ken nupay dumdumngegda, saanda latta a maawatan.+
11 Daytoy ti kaipapanan ti ilustrasion: Ti bin-i ket ti sao ti Dios.+
12 Dagiti nagdisso iti igid ti dalan ket dagidiay dimngeg. Ngem umay ti Diablo ket ikkatenna ti sao a naimula iti pusoda tapno saanda a mamati ken maisalakan.+
13 Dagiti nagdisso iti dakkel a bato ket dagidiay dimngeg iti sao ken siraragsak nga immawat iti dayta, ngem saanda a nakaramut. Namatida iti apagbiit ngem idi dimteng ti pannubok, nagsardengda.+
14 Dagiti met nagdisso iti nagbabaetan dagiti siitan a mula ket dagidiay dimngeg, ngem gapu kadagiti pakaringgoran, kinabaknang,+ ken ragragsak iti daytoy a tiempo,+ interamente a nalapdanda ken saanda a pulos a dimmakkel.+
15 Ngem dagiti nagdisso iti nasayaat a daga ket dagidiay nakangngeg iti sao ken addaan iti napasnek ken nasayaat a puso. Impapusoda dayta+ ken nagbungada bayat nga agib-ibturda.+
16 “Awan ti asinoman a mangsindi iti lampara sana kaluban wenno ikabil iti sirok ti katre, no di ket ikabilna iti pagiparabawan iti silaw tapno dagidiay sumrek makitada ti lawag.+
17 Ta awan ti sekreto a dinto maibutaktak, ken awan met ti aniaman a nailemmeng a dinto maammuan ken matakuatan.+
18 Gapuna, dumngegkayo a naimbag, ta asinoman nga addaan, ad-adunto pay ti maited kenkuana,+ ngem ti asinoman nga awanan, maalanto uray ti pagarupenna nga adda kenkuana.”+
19 Immay ti ina ni Jesus ken dagiti kakabsatna,+ ngem nagadu ti tattao isu a dida makaasideg.+
20 Ket adda nangibaga kenkuana: “Nakatakder iti ruar ni nanangmo ken dagiti kakabsatmo. Kayatdaka a makita.”
21 Insungbatna: “Ti inak ken dagiti kakabsatko ket isu dagitoy dumdumngeg iti sao ti Dios ken mangtungtungpal iti dayta.”+
22 Maysa nga aldaw, naglugan a kaduana dagiti adalanna iti bangka, ket kinunana: “Bumallasiwtayo iti danaw.” Isu a kasta ti inaramidda.+
23 Ngem nakaturog bayat nga aglaylayagda. Idi kuan, nagangin iti nakapigpigsa iti danaw, ket mapmapnon iti danum ti bangkada, ken delikadon ti kasasaadda.+
24 Napanda riniing ket kinunada: “Mannursuro, Mannursuro, mataytayon!” Isu a bimmangon ken pinagtalnana ti angin ken ti dadakkel a dalluyon. Kasta ti napasamak ket limminak.+
25 Kalpasanna, kinuna ni Jesus: “Ayanna ti pammatiyo?” Ngem mabutbuteng ken masmasdaawda, isu a kinunada iti maysa ken maysa: “Asino a talaga daytoy? Ta bilinenna uray ti angin ken ti danum, ket agtulnogda kenkuana.”+
26 Ket simmangladda iti rehion dagiti Geraseno,+ iti bangir ti Galilea.
27 Idi nakadissaagen ni Jesus, sinabat ti maysa a taga-siudad a lalaki a linuganan ti demonio. Nabayagen a saan nga agbadbado, ken aggigian iti sementerio,* saan nga iti maysa a balay.+
28 Idi makitana ni Jesus, nagikkis ken nagparintumeng iti sangona, ken impukkawna: “Apay nga immayka ditoy, Jesus, nga Anak ti Kangatuan a Dios? Pangngaasim ta dinak dusaen.”+
29 (Ta bilbilinen ni Jesus ti dakes nga espiritu a rummuar iti daytoy a lalaki. Namin-adun a parparigatenna*+ ken kanayon a mabantayan ken makawaran dagiti ima ken sakana, ngem pugsapugsatenna dagita ken ipan ti demonio iti awan matataona a lugar.)
30 Insaludsod ni Jesus: “Ania ti naganmo?” Insungbat ti lalaki: “Lehion,” ta adu a demonio ti limmugan kenkuana.
31 Ket impakpakaasida a saanna nga ibaon ida iti nakaun-uneg nga abut.+
32 Iti bantay, adda idi adu a baboy+ a mangmangan, isu nga impakaasi kenkuana dagiti demonio a lumuganda laengen kadagiti baboy, ket pinalubosanna ida.+
33 Rimmuar dagiti demonio iti lalaki ken simrekda kadagiti baboy, ket nagtataray dagiti baboy a timpuak iti teppang ket nalmesda iti danaw.
34 Ngem idi nakita dagiti agtartaraken ti napasamak, nagtatarayda ken impadamagda dayta iti siudad ken iti aw-away.
35 Napan kinita dagiti tattao ti napasamak. Nadanonda ni Jesus ken ti lalaki a dati a linuganan dagiti demonio. Agtugtugawen iti abay ni Jesus, nakabadon, ken nasayaaten ti panunotna. Ket nagbuteng dagiti tattao.
36 Dagiti nakakita iti dayta inestoriada kadagiti tattao no kasano a napaimbag ti lalaki a naluganan iti demonio.
37 Gapu ta nakaad-adu ti napabutngan unay iti lugar dagiti Geraseno, kiniddawda ken Jesus a pumanaw. Isu a naglugan iti bangka sa pimmanaw.
38 Ngem ti lalaki a rimmuaran dagiti demonio impakpakaasina a kumuyog kenkuana ngem dina pinalubosan ket imbagana:+
39 “Agawidkan ken itultuloymo nga ipadamag dagiti inaramid kenka ti Dios.” Ket napanna impakaammo iti intero a siudad dagiti inaramid kenkuana ni Jesus.
40 Idi nagsubli ni Jesus, naragsakan dagiti tattao ta pinadpadaananda amin ti isasangpetna.+
41 Ket immay ti lalaki nga agnagan Jairo a maysa kadagiti opisial iti sinagoga. Nagparintumeng iti sakaanan ni Jesus ken impakpakaasina a kumuyog idiay balayna,+
42 ta matmatayen ti kakaisuna* nga anakna a babai nga agtawen iti agarup 12.
Idi magmagna ni Jesus, sinurot ti nagadu nga aglilinnetlet a tattao.
43 Adda met idi maysa a babai a 12 a tawenen nga agpadpadara,+ ken awan ti nakapaimbag kenkuana.+
44 Immasideg iti likudan ni Jesus ket sinagidna ti gayadan ti makinruar a badona,+ ket nagsardeng a dagus ti panagpadarana.
45 Dinamag ni Jesus: “Asino ti nangsagid kaniak?” Idi awan ti sumungsungbat, nagsao ni Pedro: “Mannursuro, agdidinnuron ti adu a tattao iti likudam.”+
46 Ngem kinuna ni Jesus: “Adda nangsagid kaniak, ta nariknak nga adda pannakabalin+ a rimmuar kaniak.”
47 Idi madlaw ti babai a dinan mailimed ti inaramidna, agpigpigerger nga immasideg ken nagparintumeng ken Jesus sa imbagana iti amin no apay a sinagidna ni Jesus ken no kasano nga immimbag a dagus.
48 Ngem kinuna ni Jesus: “Anakko, pinaimbagnaka ti pammatim. Mapankan a sitatalna.”+
49 Agsasao pay laeng ni Jesus idi simmabat ti maysa a lalaki a naggapu idiay balay ni Jairo ket kinunana: “Natayen ti anakmo; saanmon nga istorbuen pay ti Mannursuro.”+
50 Idi nangngeg daytoy ni Jesus, kinunana kenkuana: “Dika agbuteng, mamatika laeng ket agbiagto ti anakmo.”+
51 Idi nakadanon iti balay, awan ti pinalubosanna a sumrek malaksid kada Pedro, Juan, Santiago, ken dagiti nagannak ti ubing.
52 Ngem agsangsangitda amin ken dandanogenda ti barukongda gapu iti ladingit. Isu a kinunana: “Isardengyon ti agsangit,+ ta saan a natay no di ket matmaturog laeng.”+
53 Kinatkatawaanda ta ammoda a natayen ti ubing.
54 Ngem iniggamanna ti ima ti ubing sana kinuna: “Anakko, bumangonka!”+
55 Ket nagbiag manen*+ ken bimmangon a dagus,+ sa imbilin ni Jesus nga ikkanda iti makan.
56 Naragsakan ken nasdaaw unay dagiti nagannakna, ngem imbilin ni Jesus nga awan ti pangibagbagaanda iti napasamak.+
Footnotes
^ Wenno “pakalaglagipan a tanem.”
^ Wenno mabalin a, “Nabayagen a tiempo a tinengngelna a siiirut.”
^ Lit., “bugbugtong.”
^ Wenno “nagsubli ti puersa ti biagna.”
