Ebanghelio ni Lucas 5:1-39

  • Milagro a pannakakalap dagiti ikan; umuna nga ad-adalan (1-11)

  • Napaimbag ti agkukutel (12-16)

  • Paimbagen ni Jesus ti paralitiko (17-26)

  • Awisen ni Jesus ni Levi (27-32)

  • Saludsod maipapan iti panagayunar (33-39)

5  Naminsan, idi immaribungbong dagiti tattao tapno denggenda ti sao ti Dios, agtaktakder ni Jesus iti igid ti danaw ti Genesaret.*+  Ket nakitana ti dua a bangka iti igid ti danaw, ngem awan dagiti mangngalap ta daldalusanda dagiti iketda.+  Naglugan iti maysa kadagiti bangka a kukua ni Simon, ket kiniddawna kenkuana a mayadayo bassit ti bangka manipud iti igid. Kalpasanna, nagtugaw iti bangka ken nangisuro kadagiti tattao.  Idi nalpasen a nagsao, imbagana ken Simon: “Ipanmo iti adalem, ket iwayatyo dagiti iketyo ta agkalapkayo.”  Ngem insungbat ni Simon: “Mannursuro, nagpatpatnagkami a nagkalap ket awan a pulos naalami.+ Ngem gapu ta imbagam, iwayatko dagiti iket.”  Idi inaramidda dayta, nakaad-adu ti nakalapda,* nga uray la mapigpigisen dagiti iketda.+  Pinayapayanda ti kakaduada iti sabali a bangka tapno umayda tumulong. Napanda ket napno ti dua a bangka nga uray la lumlumneden.  Idi makita daytoy ni Simon Pedro, nagparintumeng iti sango ni Jesus, nga ibagbagana: “Adaywannak, Apo, ta maysaak a managbasol.”  Ta kasta unay ti siddaawna ken dagiti kakaduana iti kaadu ti nakalapda. 10  Nasdaaw met dagiti kasosio ni Simon a da Santiago ken Juan nga annak ni Zebedeo.+ Ngem kinuna ni Jesus ken Simon: “Dikan agbuteng. Manipud ita, agkalapkan kadagiti tattao a sibibiag.”+ 11  Isu nga insang-atda dagiti bangka ket pinanawanda ti amin sada simmurot ken Jesus.+ 12  Naminsan, bayat nga adda iti maysa kadagiti siudad, adda lalaki a nakaro ti kukutelna! Idi nakitana ni Jesus, nagrukob sana impakpakaasi: “Apo, no kayatmo laeng koma, mapaimbagnak.”+ 13  Iti kasta, sinagid ni Jesus ti lalaki sa kinunana: “Kayatko! Umimbagka.” Dagus a napukaw ti kukutelna.+ 14  Binilinna ti lalaki a dina ibagbaga daytoy iti asinoman: “Mapanka agpakita iti padi, ket agdatonka para iti pannakadalusmo, sigun iti imbilin ni Moises,+ kas pammaneknek kadakuada nga immimbagkan.”+ 15  Ngem nagwaras latta ti damag maipapan kenkuana, isu nga adu ti um-umay tapno dumngeg ken tapno mapaimbag dagiti sakitda.+ 16  Ngem masansan a mapan kadagiti lugar nga awan matataona tapno agkararag. 17  Maysa nga aldaw, bayat a mangisursuro, agtugtugaw met sadiay dagiti Fariseo ken mannursuro iti Linteg a naggapu iti tunggal purok ti Galilea, Judea, ken Jerusalem. Ket adda kenkuana ti pannakabalin ni Jehova* a mangpaimbag.+ 18  Ket adtoy! Simmangpet dagiti lallaki a mangbagbagkat iti paralitiko a naikabil iti pagiddaan. Kayatda nga iserrek ken ipan iti sango ni Jesus.+ 19  Ngem saanda a maiserrek gapu iti kaadu ti tao, isu nga immulida iti atep, inikkatda ti dadduma a baldosa ti atep, sada imbaba ti nakaidda a lalaki iti batog dagiti adda iti sango ni Jesus. 20  Idi nakitana ti pammatida, imbagana iti paralitiko: “Napakawanen dagiti basolmo.”+ 21  Kinuna dagiti eskriba ken Fariseo iti maysa ken maysa: “Asino daytoy a mangin-insulto? Saan kadi a ti Dios laeng ti makapakawan iti basol?”+ 22  Ngem naawatan ni Jesus ti panagrasrasonda isu a kinunana: “Apay a kasta ti pampanunotenyo? 23  Ania ti nalaklaka nga ibaga, ‘Napakawanen dagiti basolmo,’ wenno, ‘Bumangonka ket magnaka’? 24  Ngem tapno maammuanyo nga adda autoridad ti Anak ti tao a mangpakawan kadagiti basol ditoy daga—​” imbagana iti paralitiko: “Bumangonka, bagkatem ta pagiddaam, ket agawidkan.”+ 25  Bimmangon ti lalaki iti sanguananda, binagkatna ti iddana, sa nagawiden, ket indaydayawna ti Dios. 26  Kasta unay ti siddaaw ti amin ket indaydayawda ti Dios nga ibagbagada: “Nakaskasdaaw dagiti nakitatayo ita nga aldaw!” 27  Kalpasanna, rimmuar ni Jesus ket nakitana ti agsingsingir iti buis nga agnagan Levi a nakatugaw iti opisina a pagbayadan iti buis. Kinunana kenkuana: “Agbalinka a pasurotko.”+ 28  Pinanawanna ti amin a banag, timmakder ken simmurot kenkuana. 29  Nangisagana ni Levi idiay balayna iti dakkel a padaya para ken Jesus, ket nangan* a kadua ti nagadu nga agsingsingir iti buis ken dadduma pay.+ 30  Gapu iti daytoy, intanabutob dagiti Fariseo ken eskriba kadagiti adalanna: “Apay a makipangpangan ken makiin-inumkayo kadagiti managbasol ken agsingsingir iti buis?”+ 31  Insungbat ni Jesus: “Dagiti masakit ti agkasapulan iti doktor, saan a dagiti nasalun-at.+ 32  Immayak tapno ayabak dagiti managbasol tapno agbabawida, saan a dagiti nalinteg.”+ 33  Imbagada ken Jesus: “Masansan nga agayunar ken agpakpakaasi dagiti adalan ni Juan, ken uray dagiti Fariseo, ngem mangmangan ken umin-inum dagiti adalam.”+ 34  Imbaga ni Jesus: “Agayunar kadi dagiti gagayyem ti nobio bayat a kaduada ti nobio? 35  Ngem dumtengto ti tiempo a maipanaw kadakuada ti nobio;+ ket agayunardanto kadagita nga aldaw.”+ 36  Imbagana pay kadakuada daytoy nga ilustrasion: “Awan ti asinoman a mangkartib iti baro a lupot sana itakup iti daan a lupot. Ta no kasta ti aramidenna, masatsat ti baro a lupot a naitakup iti daan a lupot ta saan a maibagay ti baro a takup iti daan a lupot.+ 37  Awan met ti mangikabil iti baro nga arak iti daan a lalat a pagkargaan. Ta no aramidenna dayta, bettaken ti baro nga arak ti daan a lalat ket maibelleng ti arak ken madadael ti lalat. 38  Isu a masapul a maikarga ti baro nga arak iti baro a lalat a pagkargaan. 39  Awan ti mayat nga uminum iti baro nga arak no naramanannan ti daan nga arak ta kunana, ‘Naimas ti daan.’”

Footnotes

Kayatna a sawen, ti Baybay ti Galilea.
Lit., “nasakawda.”
Kitaem ti App. A5.
Wenno “nagsadag iti lamisaan.”