Ebanghelio ni Lucas 22:1-71
-
Plano dagiti papadi a mangpapatay ken Jesus (1-6)
-
Dagiti panagsagana iti maudi a Paskua (7-13)
-
Pannakairugi ti Pangrabii ti Apo (14-20)
-
“Kaduak ita iti panganan ti mangtraidor kaniak” (21-23)
-
Nabara a panagsusupiat no asino ti katan-okan (24-27)
-
Tulag ni Jesus para iti pagarian (28-30)
-
Naipadto ti panaglibak ni Pedro (31-34)
-
Kasapulan ti panagsagana; ti dua nga espada (35-38)
-
Kararag ni Jesus iti Bantay Dagiti Olibo (39-46)
-
Naaresto ni Jesus (47-53)
-
Ilibak ni Pedro ni Jesus (54-62)
-
Nagang-angawanda ni Jesus (63-65)
-
Mabista iti Sanhedrin (66-71)
22 Dandani idin ti Piesta ti Tinapay nga Awan Lebadurana, a maawagan iti Paskua.+
2 Mangbirbirok dagiti panguluen a papadi ken dagiti eskriba iti nasayaat a pamay-an a mapatayda ni Jesus,+ ta mabutengda kadagiti tattao.+
3 Simrek ni Satanas ken Judas, a maawagan Iscariote ken karaman kadagiti Sangapulo ket Dua,+
4 ket napan nakitulag kadagiti panguluen a papadi ken kadagiti kapitan ti templo tapno traidoren ken iyawatna ni Jesus kadakuada.+
5 Naragsakanda iti dayta ket nagaanamonganda nga ikkanda ni Judas iti pirak a kuarta.+
6 Immanamong ni Judas ket nangbirok iti nasayaat a gundaway a mangtraidor ken Jesus tapno mayawatna kadakuada a saan a maammuan dagiti tattao.
7 Dimteng ti aldaw ti Piesta ti Tinapay nga Awan Lebadurana, a pannakaidatag ti daton para iti Paskua;+
8 isu nga imbaon ni Jesus da Pedro ken Juan, nga ibagbagana: “Inkayo ket isaganayo ti pangrabiitayo iti Paskua.”+
9 Kinunada kenkuana: “Sadino ti kayatmo a pangisaganaanmi iti dayta?”
10 Kinunana kadakuada: “Inton sumrekkayo iti siudad, sabtennakayto ti lalaki a nakaawit iti karamba ti danum. Surotenyo iti balay a serkanna.+
11 Ibagayo iti makimbalay, ‘Ipaspasaludsod ti Mannursuro: “Ayan ti kuarto para kadagiti bisita a mabalin a panganak iti pangrabii ti Paskua a kadua dagiti adalak?”’
12 Ipakitananto ti nalawa a makinngato a kuarto a kompleton kadagiti kasapulan. Agsaganakayo sadiay.”
13 Isu a napanda ken nasarakanda dayta a kas iti imbagana, ket nagsaganada para iti Paskua.
14 Idi dimteng ti oras, nagsadag iti lamisaan a kaduana dagiti apostolna.+
15 Kinunana kadakuada: “Inur-urayko a dumteng daytoy a Paskua tapno makipanganak kadakayo sakbay nga agsagabaak;
16 ta ibagak kadakayo, saanakto a mangan manen iti dayta agingga nga amin a banag ket matungpal iti Pagarian ti Dios.”
17 Inawat ni Jesus ti maysa a kopa sa nagkararag tapno agyaman. Kinunana: “Alaenyo daytoy ken ipasayo iti tunggal maysa,
18 ta ibagak kadakayo a diakto uminumen iti nagtaud iti ubas agingga nga umay ti Pagarian ti Dios.”
19 Nangala met iti tinapay,+ nagkararag tapno agyaman, pinispisina, sa intedna kadakuada, ket kinunana: “Daytoy ti mangisimbolo iti bagik+ a maidaton para kadakayo.+ Itultuloyyo nga aramiden daytoy kas panglaglagip kaniak.”+
20 Innalana met ti kopa idi nalpasdan a nangrabii ket kinunana: “Daytoy a kopa ti mangisimbolo iti baro a tulag+ a patalgedan ti darak,+ a maibukbok para kadakayo.+
21 “Ngem kitaenyo! kaduak ita iti panganan ti mangtraidor kaniak.+
22 Ta kinapudnona, pumanawto ti Anak ti tao kas iti naisurat maipapan kenkuana;+ ngem kaasi pay ti mangtraidor kenkuana!”+
23 Isu a nagsisinnaludsodda no asino kadakuada ti makaitured a mangaramid iti dayta.+
24 Ngem napasamak ti nabara a panagsusupiat dagiti adalan no asino kadakuada ti maibilang a katan-okan.+
25 Ngem kinunana kadakuada: “Ti ar-ari dagiti nasion dominaranda dagiti iturayanda ken dagiti adda autoridadna ti maibilbilang a Managparabur.+
26 Ngem saankayo koma a kasta.+ Ti katan-okan kadakayo ti agbalin koma a kas iti kaubingan,+ ken ti mangidadaulo ti agbalin koma kas ti agserserbi.
27 Ta siasino ti natantan-ok, daydiay mangmangan* wenno daydiay agserserbi? Saan aya a daydiay mangmangan?* Ngem addaak iti tengngayo a kas daydiay agserserbi.+
28 “Ngem nagtalinaedkayo a matalek kaniak+ bayat a maipaspasangoak kadagiti pannubok;+
29 isu a makitulagak kadakayo a kas iti pannakitulag kaniak ni Amak para iti maysa a pagarian,+
30 tapno mangan ken uminumkayo iti lamisaanko idiay Pagariak,+ ken agtugawkayo kadagiti trono+ a mangukom iti 12 a tribu ti Israel.+
31 “Simon, Simon, kitaem! kayat ni Satanas a maalanakayo amin tapno mayakayaknakayo a kas iti trigo.+
32 Ngem nagpakpakaasiakon a saan koma a kumapuy ti pammatim;+ ket apaman a makasublikan, pabilgem ti pammati dagiti kakabsatmo.”+
33 Insungbatna: “Apo, nakasaganaak a maibalud ken matay a maikuyog kenka.”+
34 Ngem kinunana: “Ibagak kenka, Pedro, sakbay nga agtaraok ita ti kawitan, namitlonton nga imbagam a dinak am-ammo.”+
35 Kinunana pay kadakuada: “Idi imbaonkayo ket imbagak a dikay mangitugot iti pagikabilan iti kuarta ken pagkargaan iti taraon ken sandalias,+ adda aya nagkurang a kasapulanyo?” Insungbatda: “Awan!”
36 Kinunana kadakuada: “Ngem ita, mangitugotkayon iti pagikabilan iti kuarta ken pagkargaan iti taraon, ket daydiay awan espadana ilakona koma ti makinruar a badona tapno adda igatangna iti espada.
37 Ta ibagak kadakayo a masapul a matungpal kaniak daytoy a naisurat, ‘Isu ket naibilang a maysa kadagiti managdakdakes.’+ Ket mapaspasamaken dayta kaniak.”+
38 Kinunada: “Apo, kitaem! adtoy ti dua nga espada.” Kinunana kadakuada: “Umdas daytan.”
39 Rimmuar iti siudad ken napan iti Bantay Dagiti Olibo kas nakaugalianna ket simmurot met dagiti adalan.+
40 Idi nakadanon iti dayta a lugar, kinunana kadakuada: “Agtultuloykayo nga agkararag tapno saankayo a masulisog.”+
41 Ket immadayo bassit kadakuada sa nagparintumeng ken nagkararag,
42 nga ibagbagana: “Ama, no kayatmo, ikkatem kaniak daytoy a kopa. Ngem saan koma a ti pagayatak ti matungpal, no di ket ti pagayatam.”+
43 Kalpasan dayta, nagparang ti maysa nga anghel manipud langit ket pinabilegna ni Jesus.+
44 Ngem gapu ta mariribukan unay, ad-adda pay nga impasnekna ti nagkararag;+ ket ti ling-etna nagbalin a kas iti dara a nagtedted iti daga.
45 Idi nalpasen a nagkararag, napan kadagiti adalanna ket nakitana ida a matmaturog ta nabannog ken maladladingitanda.+
46 Kinunana kadakuada: “Apay a matmaturogkayo? Bumangonkayo ken itultuloyyo ti agkararag, tapno saankayo a masulisog.”+
47 Agsasao pay laeng ni Jesus idi dimteng ti adu a tattao a simmurot ken Judas, a maysa kadagiti Sangapulo ket Dua. Inasitganna ni Jesus ket inagepanna.+
48 Ngem kinuna ni Jesus kenkuana: “Judas, traidorem kadi ti Anak ti tao babaen ti maysa nga agep?”
49 Idi makita dagiti adalan ti mapaspasamak, kinunada: “Apo, usarenmi kadi dagiti espada?”
50 Maysa pay ketdi kadakuada ti nangpingas iti kannawan a lapayag ti adipen ti nangato a padi.+
51 Ngem kinuna ni Jesus: “Huston.” Sinagidna ti lapayag ti adipen ket pinaimbagna.
52 Kinuna ni Jesus kadagiti panguluen a papadi ken kadagiti kapitan ti templo ken kadagiti panglakayen nga immay sadiay: “Umaydak kadi tiliwen a kas iti mannanakaw ta nangitugotkayo pay kadagiti espada ken pang-or?+
53 Inaldaw a makadkaduadak idi idiay templo,+ ngem saandak a tiniliw.+ Ngem daytoyen ti orasyo ken ti autoridad ti kinasipnget.”+
54 Kalpasanna, inarestoda ni Jesus+ ken impanda iti balay ti nangato a padi; ngem sumursurot ni Pedro iti saan unay nga adayo.+
55 Idi nangpasgedda iti paginuduan iti tengnga ti paraangan sa nagtugawda amin, nakikatugaw ni Pedro kadakuada.+
56 Ngem maysa nga adipen a babai ti nakakita kenkuana nga agtugtugaw iti asideg ti narangrang nga apuy. Miningminganna sana kinuna: “Kaduana met daytoy a lalaki.”
57 Ngem inlibak ni Pedro ket kinunana: “Diak am-ammo.”
58 Iti saan unay a nabayag, adda manen nakakita kenkuana ket kinunana: “Maysaka met kadakuada.” Ngem kinuna ni Pedro: “Saan.”+
59 Kalpasan ti dandani maysa nga oras, adda manen sabali a nangipapilit: “Sigurado a kaduana met daytoy a lalaki ta isu ket taga-Galilea!”
60 Ngem kinuna ni Pedro: “Diak ammo ta ibagbagam.” Bayat nga agsasao pay laeng, dagus a nagtaraok ti kawitan.
61 Kinita ken pinerreng ti Apo ni Pedro isu a nalagipna ti imbaga kenkuana ti Apo: “Sakbay nga agtaraok ti kawitan ita nga aldaw, namitlonton nga inlibaknak.”+
62 Rimmuar ket nagsangit gapu iti napalalo a ladingitna.
63 Kabayatanna, ni Jesus ket nagang-angawan+ ken kinabkabil dagiti lallaki a mangguarguardia kenkuana;+
64 ket kalpasan nga inabbonganda ti rupana, sinaludsodanda: “No propetaka, ibagam man no asino ti nangkabil kenka?”
65 Adu pay ti imbagbagada a panginsulto kenkuana.
66 Idi bumigaten, naguummong ti konseho dagiti panglakayen dagiti umili, agraman dagiti panguluen a papadi ken eskriba,+ ket insaklangda ni Jesus iti uneg ti Sanhedrinda, nga ibagbagada:
67 “No sika ti Kristo, ibagam kadakami.”+ Ngem kinunana: “Uray no ibagak kadakayo, diyonto met la patien.
68 No agsaludsodak, dikayto met la sumungbat.
69 Ngem manipud ita, agtugawto ti Anak ti tao+ iti mannakabalin a makannawan ti Dios.”+
70 Gapuna, kinunada amin: “No kasta, sika ti Anak ti Dios?” Kinunana: “Dakayo a mismo ti mangibagbaga iti dayta.”
71 Kinunada: “Ania pay la ti pakasapulantayo kadagiti testigo? Ta nangngegtayon dayta iti mismo a ngiwatna.”+
