Ebanghelio ni Lucas 23:1-56
23 Timmakder ti adu a tattao ket impanda ni Jesus ken Pilato.+
2 Kalpasanna, inakusaranda+ nga ibagbagada: “Natiliwanmi daytoy a tao nga al-allilawenna dagiti kailianmi, iparparitna ti panagbayad iti buis ken Cesar,+ ken ibagbagana nga isu kano ti Kristo a maysa nga ari.”+
3 Sinaludsod ni Pilato: “Sika kadi ti Ari dagiti Judio?” Insungbat ni Jesus: “Sika a mismo ti nangibaga iti dayta.”+
4 Ket kinuna ni Pilato kadagiti panguluen a papadi ken kadagiti tattao: “Awan makitak a nagbasolan daytoy a tao.”+
5 Ngem impapilitda: “Sugsugsoganna dagiti tattao babaen ti panangisurona iti intero a Judea manipud Galilea ken nakadanon payen ditoy.”
6 Idi mangngegna dayta, dinamag ni Pilato no taga-Galilea ni Jesus.
7 Idi naammuanna a naggapu ni Jesus iti lugar nga iturturayan ni Herodes,+ impaipanna ken Herodes, nga adda met idi idiay Jerusalem.
8 Naragsakan unay ni Herodes idi makitana ni Jesus. Nabayag ngaminen a kayatna a makita gapu iti adu a nadamdamagna maipapan kenkuana,+ ket namnamaenna nga adda milagro nga aramiden ni Jesus.
9 Isu nga adu ti insaludsod ni Herodes kenkuana, ngem saan a simmungsungbat ni Jesus.+
10 Nupay kasta, agkaratakder dagiti panguluen a papadi ken dagiti eskriba ket sipupungtot nga inak-akusarda.
11 Kalpasanna, pinabpabainan+ ni Herodes ken dagiti soldadona. Binaduanna iti narangrang a kawes ken kinatkatawaanna+ sa pinaisublina ken Pilato.
12 Iti dayta met la nga aldaw, nagbalin nga aggayyem da Herodes ken Pilato a dati nga agkabusor.
13 Kalpasanna, pinaayaban ni Pilato dagiti panguluen a papadi, agtuturay, ken dagiti tattao
14 ket kinunana kadakuada: “Inyegyo kaniak daytoy a tao ta kunayo a sugsugsoganna dagiti umili nga agrebelde. Kitaenyo! Pinalutpotko iti sangoyo ngem awan ti nasarakak a pangibatayak kadagiti darumyo kenkuana.+
15 Kinapudnona, uray ni Herodes, awan ti nasarakanna ta pinaisublina kadatayo. Kitaenyo! Awan ti inaramidna a maikari iti dusa nga ipapatay.
16 Dusaek+ lattan sa wayawayaakon.”
17 * ——
18 Ngem impukkaw ti amin a tattao: “Patayem daytoy a tao,* ket wayawayaam kadakami ni Barabas!”+
19 (Naibalud daytoy a tao gapu iti panagrebelde iti gobierno ken panangpapatay a napasamak iti siudad.)
20 Nagsao manen ni Pilato ta kayatna a wayawayaan ni Jesus.+
21 Ngem impukkawda: “Ibitaymo iti kayo! Ibitaymo iti kayo!”+
22 Kinunana kadakuada iti maikatlo a daras: “Apay? Ania ti dakes nga inaramid daytoy a tao? Awan ti nakitak nga inaramidna tapno maikari a matay; dusaek lattan sa wayawayaakon.”
23 Ngem inyad-adda dagiti tattao nga impukkaw a mapapatay* ni Jesus; isu a nasurot ti kayatda.+
24 Isu a nagdesision ni Pilato a matungpal ti kayatda.
25 Pinaruarna ti tao a kayatda a mawayawayaan, a naibalud gapu iti panagrebelde iti turay ken gapu iti panangpapatay, ngem insukona kadakuada ni Jesus tapno aramidenda ti kayatda.
26 Bayat nga ipampanawda, pinilitda ni Simon a taga-Cirene a naggapu iti away a mangibaklay iti kayo a pagtutuokan* tapno awitenna dayta bayat a sarsarunuenna ni Jesus.+
27 Adu ti sumursurot idi kenkuana, agraman dagiti babbai a mangdandanog iti bagida gapu iti ladingit ken mangdungdung-aw kenkuana.
28 Tinaliaw ni Jesus dagiti babbai ket kinunana: “Annak a babbai ti Jerusalem, saan a siak ti sangitanyo. Sangitanyo ketdi ti bagbagiyo ken dagiti annakyo;+
29 ta dumtengto ti tiempo nga ibaga dagiti tattao, ‘Naragsak dagiti lupes a babbai, dagiti aanakan a saan a nagipasngay ken dagiti barukong a saan a nagpasuso!’+
30 Ket ibagadanto kadagiti bantay, ‘Tupakandakami!’ ken kadagiti turod, ‘Gaburandakami!’+
31 Ta no kasta ti aramidenda iti sibibiag a kayo, anianto ti mapasamak no natayen dayta?”
32 Adda met dua a lallaki a kriminal a naikuyog kenkuana tapno mapapatay a kaduana.+
33 Ket idi nakadanonda iti lugar a maawagan iti Bangabanga,+ inlansada ni Jesus iti kayo agraman ti dua a kriminal, maysa iti kannawanna ken maysa iti kannigidna.+
34 Ngem kinuna ni Jesus: “Ama, pakawanem ida, ta saanda nga ammo ti ar-aramidenda.” Nagbibinnunotda met tapno pagbibingayanda dagiti badona.+
35 Ket sitatakder dagiti tattao a kumitkita kenkuana. Ngem nagang-angawan dagiti agtuturay ket kinunada: “Insalakanna ti dadduma; isalakanna koma met ti bagina no isu ti Kristo a pinili ti Dios.”+
36 Nagang-angawan met dagiti soldado. Inasitganda tapno ikkanda iti naalsem nga arak,+
37 ken ibagbagada: “No sika ti Ari dagiti Judio, isalakanmo ta bagim.”
38 Adda met naisurat iti ngatuenna: “Daytoy ti Ari Dagiti Judio.”+
39 Kalpasanna, linalais ti maysa kadagiti kriminal a nailansa,+ nga ibagbagana: “Sika ti Kristo, di ngamin? Isalakanmo ngarud ta bagim ken uray dakami!”
40 Ngem binabalaw ti kaduana a kriminal nga ibagbagana: “Awan kadi a talaga ti panagbutengmo iti Dios uray no madusdusaka la ngaruden a kas kenkuana?
41 Maiparbeng laeng a madusata gapu kadagiti inaramidta; ngem awan ti dakes nga inaramid daytoy a tao.”
42 Kalpasanna, kinunana: “Jesus, laglagipennak inton addakan iti Pagariam.”+
43 Insungbat ni Jesus: “Pudno kunak kenka ita nga aldaw, makikaduakanto kaniak idiay Paraiso.”+
44 Agarup alas dose idin ti aldaw* ngem simmipnget ti intero a lugar agingga iti agarup alas tres ti malem,*+
45 gapu ta awan ti lawag ti init. Kalpasanna, napisang ti tengnga ti kortina+ ti santuario.+
46 Impukkaw ni Jesus: “Ama, italekko kenka ti biagko.”*+ Idi naibagana dayta, nauyosen ti biagna.*+
47 Nakita ti opisial ti armada ti napasamak isu nga indaydayawna ti Dios, nga ibagbagana: “Talaga a nalinteg daytoy a tao.”+
48 Ti napasamak ket nakita ti amin a tattao a naguurnong sadiay, ket nagawidda a dandanogenda dagiti barukongda.
49 Nakatakder iti saan unay nga adayo ti amin a gagayyem ni Jesus agraman dagiti babbai a kimmuykuyog kenkuana manipud Galilea ket nakitada dagitoy a napasamak.+
50 Adda met maysa a lalaki nga agnagan iti Jose a miembro ti Konseho. Naimbag ken nalinteg daytoy a tao.+
51 (Saanna nga inanamongan ti plano ken inaramidda.) Taga-Arimatea a siudad dagiti taga-Judea. Ur-urayenna idi ti Pagarian ti Dios.
52 Napan ken Pilato ket kiniddawna ti bangkay ni Jesus.
53 Imbabana ti bangkay ni Jesus+ ken binalkutna iti dekalidad a lienso a lupot sana inkabil iti saan pay a naus-usar a tanem* a nakutkot iti uneg ti dakkel a bato.+
54 Aldaw idi ti Panagsagana,+ ken dandanin mangrugi ti Sabbath.+
55 Ngem dagiti babbai a nakikuykuyog idi ken Jesus manipud pay idiay Galilea simmurotda tapno kitaenda ti tanem* ket nakitada ti pannakaikabil ti bangkayna sadiay,+
56 ket nagawidda tapno mangisaganada kadagiti nabanglo a yerba ken nabanglo a lana. Ngem siempre, gapu ta Sabbath,+ naginanada kas naibilin.
Footnotes
^ Lit., “Ipanawmo daytoy a tao.”
^ Wenno “maibitay iti kayo.”
^ Lit., “agarup maikanem nga oras.”
^ Lit., “maikasiam nga oras.”
^ Wenno “nagsaten ti angesna.”
^ Lit., “espirituk.”
^ Wenno “pakalaglagipan a tanem.”
^ Wenno “pakalaglagipan a tanem.”
