Ebanghelio ni Lucas 2:1-52

  • Pannakayanak ni Jesus (1-7)

  • Agparang dagiti anghel kadagiti agpaspastor (8-20)

  • Pannakakugit ken pannakadalus (21-24)

  • Makita ni Simeon ti Kristo (25-35)

  • Agsao ni Ana maipapan iti ubing (36-38)

  • Panagsubli idiay Nazaret (39, 40)

  • Ti 12 ti tawenna a ni Jesus idiay templo (41-52)

2  Kadagidi nga aldaw, imbilin ni Cesar Augusto a mairehistro ti intero a mapagnaedan a daga.  (Naaramid daytoy umuna a panagparehistro idi a ni Quirinio ti gobernador ti Siria.)  Iti kasta, napan nagparehistro ti tunggal maysa iti bukodna a siudad.  Gapu ta nagtaud ni Jose+ iti pamilia ni David, nagrubbuat iti siudad ti Nazaret idiay Galilea ket napan idiay Judea, iti siudad ti Betlehem+ a nakayanakan ni David.  Napan nagparehistro ni Jose a kaduana ni Maria, a naikari a mayasawa kenkuana+ ken dandani idin aganak.+  Idi addadan sadiay, dimteng ti tiempo a panaganak ni Maria.  Nangyanak iti lalaki, ti inauna,+ ket binungonna iti lupot sana impaidda iti maysa a kulluong,+ ta awan pagyananda kadagiti pagdagusan.  Iti dayta met la a lugar, adda dagiti agpaspastor nga um-umyan iti away nga agbambantay kadagiti karneroda iti rabii.  Pagammuan ta nagparang kadakuada ti maysa nga anghel ni Jehova,* ket nagsilnag ti dayag ni Jehova* iti aglawlawda, isu a kasta unay ti butengda. 10  Ngem nagsao ti anghel: “Dikay agbuteng! Immayak tapno ipakaammok ti naimbag a damag a pakaragsakan unay ti amin a tattao. 11  Ta ita, nayanak kadakayo iti siudad ni David+ ti maysa a mangisalakan,+ ti Kristo nga Apo.+ 12  Ket daytoy ti pagilasinanyo: Makakitakayto iti kayyanak nga ubing a nabungon iti lupot a naipaidda iti kulluong.” 13  Pagammuan ta nagparang ti nakaad-adu nga anghel*+ ket indaydayawda ti Dios a kadua ti anghel nga ibagbagada: 14  “Madaydayaw koma ti Dios idiay langit, ket ditoy daga, maadda koma ti talna kadagiti tattao a parparaburanna.” 15  Idi nagsublin dagiti anghel idiay langit, kinuna dagiti agpaspastor iti maysa ken maysa: “Masapul nga intayon idiay Betlehem tapno makitatayo ti impakaammo kadatayo ni Jehova.”* 16  Nagdardarasda a napan ket nasangpetanda da Maria ken Jose, agraman ti kayyanak nga ubing a nakaidda iti kulluong. 17  Idi nakitada ida, imbagada ti impakaammo ti anghel maipapan iti ubing. 18  Ket nasdaaw amin a nakangngeg iti impakaammo dagiti agpaspastor. 19  Ngem tinandaanan ken pinampanunot ni Maria ti kaipapanan dagitoy a bambanag.+ 20  Kalpasanna, nagawiden dagiti agpaspastor ket intantan-ok ken idaydayawda ti Dios gapu iti amin a nangngeg ken nakitada, kas iti naibaga kadakuada. 21  Idi maikawalo nga aldawnan, kinugitda+ ken pinanagananda iti Jesus, ti nagan nga imbaga ti anghel sakbay pay a mayinaw.+ 22  Idi met tiempon ti panangtungpalda iti Linteg ni Moises+ maipapan iti panagdalus, impanda ti ubing idiay Jerusalem tapno iparangda ken Jehova,* 23  kas naisurat iti Linteg ni Jehova:* “Tunggal inauna a lalaki* ket nasantuan ken Jehova.”*+ 24  Ket nagdatonda kas mayannurot iti Linteg ni Jehova:* “Dua a pagaw wenno dua a sibong ti atap a kalapati.”+ 25  Adda met idi maysa a lalaki iti Jerusalem nga agnagan Simeon. Isu ket nalinteg, agbuteng iti Dios, ur-urayenna ti pannakaliwliwa ti Israel,+ ken adda kenkuana ti nasantuan nga espiritu. 26  Impakaammo met kenkuana ti Dios babaen ti nasantuan nga espiritu a makitana pay nga umuna ti Kristo nga imbaon ni Jehova* sakbay a matay. 27  Iti panangidalan ti nasantuan nga espiritu, napan ni Simeon iti templo ket idi ipan da Jose ken Maria ti ubing a ni Jesus tapno aramidenda kenkuana ti kaugalian sigun iti Linteg,+ 28  inubbana ti ubing sa indaydayawna ti Dios nga ibagbagana: 29  “Kangatuan* nga Apo, naragsakakon a matay ta pimmudnon ti imbagam+ 30  ken nakitakon ti usarem a mangisalakan,+ 31  nga intedmo tapno makita ti amin a tattao,+ 32  ken agserbi kas lawag+ a mangikkat iti abbong dagiti nasion+ ken kas dayag ti ilim nga Israel.” 33  Masmasdaaw dagiti nagannak ti ubing kadagiti maibagbaga maipapan kenkuana. 34  Binendisionan met ida ni Simeon ken kinunana ken Maria nga ina ti ubing: “Daytoy nga ubing ket nadutokan para iti pannakaituang+ ken pannakaibangon manen ti adu iti Israel+ ken para iti pagilasinan a maumsi,+ 35  (wen, maduyokkanto iti atiddog nga espada),+ tapno maammuan ti agpayso a linaon ti adu a puso.” 36  Adda maysa a propeta nga agnagan iti Ana, nga anak ni Fanuel iti tribu ni Aser. Baketen ken pito a tawen idi a nagdennada ken lakayna kalpasan a nagasawada.* 37  Maysan a balo ken agtawenen iti 84. Saan a pulos a limmanglangan idiay templo iti panangipaayna iti sagrado a panagserbi iti aldaw ken rabii, a nagay-ayunar ken nagpakpakaasi iti Dios. 38  Iti dayta met la nga oras, immasideg kadakuada ket nagyaman iti Dios ken nagsao maipapan iti ubing iti amin nga agur-uray iti pannakaisalakan ti Jerusalem.+ 39  Idi naaramiddan dagiti ipapaannurot ti Linteg ni Jehova,*+ nagsublida idiay Galilea, iti siudadda a Nazaret.+ 40  Ket nagtultuloy a dimmakkel ken pimmigsa ti ubing. Nagbalin a masirib ken nagtultuloy kenkuana ti pabor ti Dios.+ 41  Nakairuaman idi dagiti nagannakna ti tinawen a mapan idiay Jerusalem para iti piesta ti Paskua.+ 42  Ket idi agtawenen iti 12, napanda sadiay kas nakaugalianda iti piesta.+ 43  Idi nalpasen ti piesta ken agaw-awiddan, nagbati ni Jesus idiay Jerusalem a saan nga ammo dagiti nagannakna. 44  Impagarupda a kaduada a nagawid. Maysa nga aldawdan a magmagna idi madlawda nga awan ni Jesus isu a binirokda kadagiti kakabagian ken am-ammoda. 45  Ngem idi saanda a makita, nagsublida idiay Jerusalem tapno ikagumaanda a biroken. 46  Kalpasan ti tallo nga aldaw, nasarakanda idiay templo nga agtugtugaw iti tengnga dagiti mannursuro, nga agdengdengngeg ken agsalsaludsod kadakuada. 47  Ngem amin nga agdengdengngeg kenkuana ket masmasdaaw kadagiti sungbatna ken iti kaadu ti ammona.+ 48  Idi makita dagiti nagannakna, nasdaawda ket kinuna ti inana: “Anakko, apay nga inaramidmo daytoy kadakami? Madandanagankamin ken amam a mangsapsapul kenka.” 49  Ngem imbagana kadakuada: “Apay a sapsapulendak? Diyo kadi ammo a masapul nga addaak iti balay ni Amak?”+ 50  Ngem saanda a naawatan ti ibagbagana. 51  Kimmuyog kadakuada a nagawid idiay Nazaret ken intultuloyna ti nagpasakup* kadakuada.+ Tinantandaanan ni Maria amin dagitoy a mapaspasamak iti anakna.+ 52  Ket dimmakkel ni Jesus ken ad-adda pay a simmirib ken nagtultuloy kenkuana ti pabor ti Dios ken dagiti tattao.

Footnotes

Kitaem ti App. A5.
Kitaem ti App. A5.
Lit., “dakkel nga armada iti langit.”
Kitaem ti App. A5.
Kitaem ti App. A5.
Kitaem ti App. A5.
Lit., “Tunggal lalaki a manglukat iti aanakan.”
Kitaem ti App. A5.
Kitaem ti App. A5.
Kitaem ti App. A5.
Wenno “Soberano.”
Lit., “manipud kinabirhenna.”
Kitaem ti App. A5.
Wenno “nagtulnog.”