Ebanghelio ni Lucas 18:1-43

  • Ilustrasion maipapan iti napinget a balo (1-8)

  • Ti Fariseo ken ti agsingsingir iti buis (9-14)

  • Ni Jesus ken dagiti ubbing (15-17)

  • Saludsod ti maysa a baknang nga agturay (18-30)

  • Naipadto manen ti ipapatay ni Jesus (31-34)

  • Makakita manen ti agpalpalimos a bulsek (35-43)

18  Kalpasanna, imbagana kadakuada ti ilustrasion maipapan iti kinapateg ti kanayon a panagkararagda ken ti saanda nga isusuko.+  Kinunana: “Iti maysa a siudad, adda hues nga awan panagbutengna iti Dios ken awan panagraemna iti tao.  Adda met balo iti dayta a siudad a kanayon a mapan kenkuana, nga ibagbagana, ‘Siguraduem a magun-odak ti hustisia iti nangidarum kaniak.’  Medio nabayag a di inkaskaso ti hues ngem kinunana iti bagina, ‘Uray awan panagbutengko iti Dios wenno awan panagraemko iti asinoman,  gapu ta kanayon nga is-istorbuennak daytoy a balo, siguraduek a magun-odanna ti hustisia tapno saanton nga agkaraumay ket maibus ti anusko iti panangirengrengna iti kiddawna.’”*+  Ket kinuna ti Apo: “Nangngegyo ti imbaga ti dakes a hues!  Saan kadi a sigurado nga ited met ti Dios ti hustisia kadagidiay pinilina, nga agpakpakaasi kenkuana iti aldaw ken rabii,+ bayat nga an-anusanna ida?+  Ipasiguradok kadakayo a sidadaras nga ited ti Dios ti hustisia kadakuada. Ngem inton dumteng ti Anak ti tao, talaga ngata a masarakannanto daytoy a pammati* ditoy daga?”  Imbagana met daytoy nga ilustrasion iti dadduma a mangibilbilang iti bagida a nalinteg ken mangtagtagibassit iti sabsabali: 10  “Dua a lallaki ti napan nagkararag idiay templo, maysa a Fariseo ken maysa nga agsingsingir iti buis. 11  Nagtakder ti Fariseo ket inkararagna dagitoy maipapan iti bagina, ‘Agyamanak, O Dios, ta saanak a kas iti dadduma a manangkikil, managdakdakes, mannakikamalala, wenno kas iti daytoy nga agsingsingir iti buis. 12  Agayunarak* iti mamindua iti kada lawas; itedko ti apagkapullo ti amin a magun-odak.’+ 13  Ngem ti agsingsingir iti buis a nakatakder iti adayo dina man la maitured ti tumangad no di ket dandanogenna ti barukongna, nga ibagbagana, ‘O Dios, kaasiannak ta managbasolak.’+ 14  Ibagak kadakayo, nagawid daytoy a tao a nalinlinteg ngem iti Fariseo.+ Ta asinoman a mangitan-ok iti bagina, maibabainto, ngem asinoman a mangipababa iti bagina, maitan-okto.”+ 15  Adda dagiti tattao a nangyeg kadagiti maladaga kenkuana tapno iparabawna koma ti imana kadakuada, ngem idi makita dagiti adalan, inungtanda ida.+ 16  Ngem imbaga ni Jesus nga iyegda kenkuana dagiti maladaga, nga ibagbagana: “Bay-anyo nga umasideg kaniak dagiti ubbing, diyo laplapdan ida, ta para kadagiti kas kadakuada ti Pagarian ti Dios.+ 17  Pudno kunak kadakayo, no ti asinoman dina awaten ti Pagarian ti Dios a kas iti panangawat ti maysa nga ubing, dinto pulos makastrek iti dayta.”+ 18  Ket insaludsod kenkuana ti maysa kadagiti agtuturay: “Naimbag a Mannursuro, ania ti masapul nga aramidek tapno agbiagak nga agnanayon?”+ 19  Kinuna ni Jesus: “Apay nga awagannak iti naimbag? Awan ti naimbag no di laeng ti Dios.+ 20  Ammom dagitoy a bilin, ‘Dika makikamalala,+ dika pumatay,+ dika agtakaw,+ dika agbalin nga ulbod a testigo,+ dayawem da tatang ken nanangmo.’”+ 21  Kinuna ti lalaki: “Tungtungpalekon amin dagita nanipud pay idi ubingak.” 22  Idi nangngeg dayta ni Jesus, kinunana kenkuana: “Adda pay maysa a masapul nga aramidem: Ilakom ti amin a banag nga adda kenka sa itedmo ti naglakuam kadagiti napanglaw, ket maaddaankanto iti kinabaknang idiay langit. Kalpasanna, umayka ket agbalinka a pasurotko.”+ 23  Idi nangngeg daytoy ti lalaki, nalidayan unay, ta nakabakbaknang.+ 24  Kinita ni Jesus ti lalaki sana kinuna: “Nagrigat ketdin a makastrek iti Pagarian ti Dios dagiti adda kuartana!+ 25  Kinapudnona, nalaklaka pay a lumsot ti kamelio iti abut ti dagum ngem ti baknang a sumrek iti Pagarian ti Dios.”+ 26  Kinuna dagidiay nakangngeg iti dayta: “Siasino ngaruden ti maisalakan?”+ 27  Kinunana: “Dagiti imposible kadagiti tattao ket posible iti Dios.”+ 28  Imbaga ni Pedro: “Kitaem! Pinanawanmi ti amin a banag ket sinurotdaka.”+ 29  Kinunana kadakuada: “Pudno kunak kadakayo, awan ti nangpanaw iti balay wenno asawa wenno kakabsat wenno nagannak wenno annak maigapu iti Pagarian ti Dios,+ 30  a saanto nga umawat iti ad-adu pay iti daytoy a tiempo, ken iti masanguanan a sistema ti bambanag,* biag nga agnanayon.”+ 31  Inyadayona bassit ti Sangapulo ket Dua sana kinuna kadakuada: “Sumangsang-attayon idiay Jerusalem, ket matungpalto amin nga insurat dagiti propeta maipapan iti Anak ti tao.+ 32  Kas pagarigan, mayawatto iti tattao kadagiti nasion+ ket mapagang-angawan,+ main-insulto, ken matuptupraan.+ 33  Ken kalpasan a sapsaplitenda, patayendanto,+ ngem mapagungarto iti maikatlo nga aldaw.”+ 34  Ngem saanda a natarusan ti kaipapanan ti aniaman kadagita, ta nailimed kadakuada dagita a sasao, ken saanda a naawatan dagiti naibaga. 35  Idi asidegen ni Jesus iti Jerico, adda bulsek a lalaki nga agpalpalimos nga agtugtugaw iti igid ti dalan.+ 36  Nangngegna nga adu a tattao ti lumablabas isu a dinamagna no ania ti mapaspasamak. 37  Kinunada kenkuana: “Lumablabas ni Jesus a Nazareno!” 38  Ket impukkawna: “Jesus nga Anak ni David, kaasiannak!” 39  Inungtan dagidiay adda iti sangona ken imbagada nga agulimek, ngem inyad-addana pay nga impukkaw: “Anak ni David, kaasiannak!” 40  Nagsardeng ni Jesus ket pinaayabanna ti lalaki. Idi nakaasidegen, dinamag ni Jesus: 41  “Ania ti kayatmo nga aramidek kenka?” Kinunana: “Apo, pagsubliem koma ti panagkitak.” 42  Kinuna ni Jesus kenkuana: “Makakitakan; pinaimbagnaka ti pammatim.”+ 43  Dagus a nakakita, ket simmurot kenkuana,+ nga intan-okna ti Dios. Idi nakita met dayta ti amin a tattao, indaydayawda ti Dios.+

Footnotes

Wenno “ket dudogennak iti kasta unay.”
Wenno “daytoy a kita ti pammati.” Lit., “ti pammati.”
Kitaem ti Glosario, “Panagayunar.”
Wenno “iti umay a panawen.” Kitaem ti Glosario.