Ebanghelio ni Lucas 21:1-38

  • Dua a sinsilio ti napanglaw a balo (1-4)

  • PAGILASINAN TI UMAY (5-36)

    • Gubat, napigsa a ginggined, makapapatay a sakit, kinakurang ti taraon (10, 11)

    • Jerusalem a napalikmutan kadagiti armada (20)

    • Naituding a panawen dagiti nasion (24)

    • Iyaay ti Anak ti tao (27)

    • Ilustrasion maipapan iti kayo a higos (29-33)

    • Agtultuloy nga agbantay (34-36)

  • Mangisuro ni Jesus iti templo (37, 38)

21  Bayat nga agpalpaliiw, nakitana dagiti babaknang a mangipispisok kadagiti sagutda iti pagitinnagan* iti kontribusion.+  Kalpasanna, nakitana ti maysa a napanglaw a balo a babai a nangitinnag iti dua a babassit a sinsilio a nakabasbassit ti pategna,*+  ket kinunana: “Pudno kunak kadakayo, ad-adu ti impisok daytoy napanglaw a balo ngem iti amin a nagipisok.+  Ta tedtedda laeng ti impisokda. Ngem ti balo, nupay napanglaw, impisokna ti amin a pagbiagna.”+  Idi agangay, bayat a pagsasaritaan ti dadduma ti pannakaarkos ti templo kadagiti agkakapateg a bato ken naidaton a bambanag,+  kinunana: “No maipapan kadagitoy a banag a makitkitayo, dumtengto ti tiempo nga awanto a pulos ti bato nga agtalinaed iti bato a nakaituonanna, marpuogdanto amin.”+  Ket insaludsodda kenkuana: “Mannursuro, kaanonto a mapasamak dagita, ken anianto ti pagilasinan a mapasamakda?”+  Kinunana: “Agannadkayo tapno dikay maallilaw+ ta adunto ti mangusar iti naganko, nga ibagbagada, ‘Siak daydiay,’ ken ‘Asidegen ti naikeddeng a tiempo.’ Dikay sumurot kadakuada.+  Kasta met nga inton makadamagkayo kadagiti gubat ken riribuk,* dikay agbuteng. Masapul a mapasamak nga umuna dagitoy, ngem saan pay a dagus nga umay ti panungpalan.”+ 10  Ket imbagana kadakuada: “Bumusorto ti nasion iti sabali a nasion+ ken ti pagarian iti sabali a pagarian.+ 11  Addanto napipigsa a ginggined, ken bisin ken makapapatay a saksakit+ iti nadumaduma a lugar; ket addanto dagiti nakabutbuteng a buya ken dadakkel a pagilasinan iti langit. 12  “Ngem sakbay a mapasamak amin dagitoy, arestuendakayto dagiti tattao ken idadanesdakayo,+ nga ipandakayo kadagiti sinagoga ken ipaibaluddakayo. Ipandakayto kadagiti ari ken gobernador maigapu iti naganko.+ 13  Agresultanto dayta iti panangsaksiyo. 14  Gapuna, laglagipenyo a saan a kasapulan a sanayenyo a nasaksakbay no kasano ti panagidepensayo,+ 15  ta ikkankayto iti sasao ken sirib a saan a kabaelan a kontraen wenno supiaten ti amin a bumusbusor kadakayo.+ 16  Maysa pay, ipatiliwdakayto* uray dagiti nagannak, kakabsat a lallaki, kakabagian, ken gagayyemyo, ket patayendanto ti dadduma kadakayo,+ 17  ket guraendakayto ti amin a tattao gapu iti naganko.+ 18  Ngem awanto ti mapukaw nga uray maysa a buok ti uloyo.+ 19  Maisalakanyonto ti biagyo* no agibturkayo.+ 20  “Ngem inton makitayo a ti Jerusalem ket palikmutan dagiti armada,+ ammuenyo nga asidegen ti pannakadadaelna.+ 21  Iti kasta, dagidiay adda idiay Judea agkamangda koman iti kabambantayan,+ ket pumanaw koman dagidiay adda iti tengngana, ket saan koman a sumrek kenkuana dagidiay adda iti aw-away, 22  ta dagitoy dagiti aldaw ti pannakaipakat ti hustisia* tapno matungpal ti amin a naisurat. 23  Kaasi pay dagiti masikog ken agpaspasuso kadagita nga aldaw!+ Ta addanto nakaro a rigat iti daga ken pungtot maibusor kadagitoy a tattao. 24  Mapapataydanto iti tadem ti espada ket maipanda a balud iti amin a nasion;+ ket ibaddebaddekto dagiti nasion* ti Jerusalem agingga a matungpal ti naikeddeng a tiempo dagiti nasion.*+ 25  “Addanto met dagiti pagilasinan iti init ken bulan ken kadagiti bituen.+ Mariribukanto dagiti nasion ditoy daga ket saanda nga ammo ti aramidenda gapu iti panagdaranudor ken panagkibur ti baybay. 26  Matalimudawto dagiti tattao gapu iti buteng ken panangpadpadaanda kadagiti mapasamak iti intero a mapagnaedan a daga, ta magunggonto dagiti pannakabalin iti langit. 27  Kalpasanna, makitadanto ti Anak ti tao+ nga um-umay iti ulep nga addaan pannakabalin ken dakkel a dayag.+ 28  Ngem inton mangrugi a mapasamak dagitoy a banag, tumakderkayo iti nalinteg ken tumangadkayo, ta umas-asidegen ti pannakaisalakanyo.” 29  Kalpasanna, imbagana ti maysa nga ilustrasion: “Panunotenyo ti kayo a higos ken ti amin a dadduma pay a kayo.+ 30  No agbulongdan, makita ken ammoyon a dandanin ti kalgaw. 31  Isu nga inton makitayo a mapaspasamaken dagitoy a banag, masiguradoyo nga asidegen ti Pagarian ti Dios. 32  Pudno kunak kadakayo a saanto a pulos lumabas daytoy a henerasion agingga a mapasamak amin dagitoy a banag.+ 33  Agpukaw man ti langit ken daga, agtalinaedto latta dagiti saok.+ 34  “Ngem agannadkayo tapno saan a pulos a mapadagsenan ti pusoyo gapu iti sobra a pannangan ken panaginum+ ken kadagiti pakaringgoran iti biag,+ ket pagammuan ta dumteng kadakayo dayta nga aldaw 35  kas maysa a silo.+ Ta dumtengto dayta iti amin nga agnanaed iti intero a daga. 36  Agtultuloykayo ngarud nga agbantay,+ ken kanayon nga agpakpakaasikayo+ tapno malasatanyo amin dagitoy a masapul a mapasamak ken makapagtakderkayo iti sanguanan ti Anak ti tao.”+ 37  Iti aldaw, mangisursuro ni Jesus idiay templo, ngem iti rabii, mapan agdagus iti bantay a maawagan iti Bantay Dagiti Olibo. 38  Ket iti agsapa, mapan ti amin a tattao idiay templo tapno dumngegda kenkuana.

Footnotes

Wenno “pagikargaan.”
Lit., “dua a lepta.” Kitaem ti App. B14.
Wenno “panaggugulo.”
Wenno “traidorendakayto.”
Wenno “Magun-odanyonto ti kararuayo.”
Wenno “aldaw ti panagibales.”
Wenno “Gentil.”
Wenno “Gentil.”