Ti Maikadua a Samuel 9:1-13

  • Ti napudno nga ayat ni David ken Mefiboset (1-13)

9  Kalpasanna, kinuna ni David: “Adda kadi pay nabati iti balay ni Saul a pangipakitaak iti napudno nga ayat maigapu ken Jonatan?”+  Adda idi maysa nga adipen iti balay ni Saul a ti naganna ket Ziba.+ Pinaayaban ni Ari David ket dinamagna: “Sika kadi ni Ziba?” Insungbatna: “Wen, siak ti adipenmo.”  Intuloy ti ari: “Adda kadi pay nabati iti balay ni Saul a pangipakitaak iti napudno nga ayat ti Dios?” Insungbat ni Ziba iti ari: “Adda pay maysa nga anak a lalaki ni Jonatan; pilay ti dua a sakana.”+  Dinamag ti ari: “Ayanna?” Insungbat ni Ziba: “Adda idiay Lo-debar, iti balay ni Makir+ nga anak ni Amiel.”  Dagus a nangibaon ni Ari David iti mapan mangala kenkuana idiay balay ni Makir nga anak ni Amiel idiay Lo-debar.  Idi makadanon ni Mefiboset, nga anak ni Jonatan ken apoko ni Saul, nagdumog ken nagruknoy iti sango ni David. Kinuna ni David: “Mefiboset!” ket simmungbat: “Wen, apo.”  Kinuna ni David kenkuana: “Dika agbuteng, ta manamnamam ti napudno nga ayatko+ maigapu ken Jonatan nga amam. Isublikto kenka ti amin a daga ni Saul nga apongmo, ken kanayonkanto a makipangan* kaniak iti lamisaanko.”+  Gapu iti dayta, nagruknoy ni Mefiboset ket kinunana: “Asinoak koma nga adipenmo, tapno iturongmo ti atensionmo* iti natay nga aso a kas kaniak?”+  Pinaayaban ti ari ni Ziba, a katulongan ni Saul, ket kinunana: “Amin a kukua ni Saul ken ti intero a balayna, itedko iti apoko ni Saul nga amom.+ 10  Talonem ti daga para kenkuana, a kaduam dagiti annakmo ken dagiti adipenmo, ket urnongem dagiti maapit tapno kanen ti pamilia ti apoko ti amom. Ngem ni Mefiboset nga apoko ti amom ket kanayon a makipanganto kaniak iti lamisaanko.”+ Ni Ziba ket addaan iti 15 nga annak a lallaki ken 20 nga adipen.+ 11  Kinuna ni Ziba iti ari: “Aramiden daytoy adipenmo ti amin nga imbilinmo, apo ari.” Isu a nakipangan ni Mefiboset iti lamisaan ni David* a kas maysa kadagiti annak ti ari. 12  Adda met ubing pay nga anak a lalaki ni Mefiboset nga agnagan iti Mica.+ Amin nga agnanaed iti balay ni Ziba ket nagbalin nga adipen ni Mefiboset. 13  Iti kasta, ni Mefiboset a pilay ti dua a sakana+ ket nagnaed idiay Jerusalem ken kanayon a nakipangan iti lamisaan ti ari.+

Footnotes

Lit., “mangan iti tinapay.”
Lit., “rupam.”
Wenno mabalin a, “lamisaanko.”