Ti Maikadua a Samuel 3:1-39

  • Bumilbileg ti pannakabalin ti pamilia ni David (1)

  • Dagiti annak a lallaki ni David (2-5)

  • Tallikudan ni Abner ni David (6-21)

  • Patayen ni Joab ni Abner (22-30)

  • Dung-awan ni David ni Abner (31-39)

3  Bimmayag ti gubat ti pamilia ni Saul ken ti pamilia ni David; ket nagtultuloy a bimmileg ni David,+ idinto ta nagtultuloy a kimmapuy ti pamilia ni Saul.+  Bayat ti kaaddana idiay Hebron,+ naaddaan ni David iti annak a lallaki. Ti inauna ket ni Amnon+ nga anakna ken Ahinoam+ a Jezreelita.  Ti maikadua ket ni Kileab nga anakna ken Abigail+ nga asawa daydi Nabal a Carmelita, ken ti maikatlo ket ni Absalom+ nga anakna ken Maaca nga anak ni Talmai+ nga ari ti Gesur.  Ti maikapat ket ni Adonias+ nga anakna ken Haggit, ken ti maikalima ket ni Sefatias nga anakna ken Abital.  Ti maikanem ket ni Itream nga anakna iti asawana a ni Egla. Dagitoy ti annak ni David a nayanak idiay Hebron.  Bayat a nagtultuloy ti gubat iti pamilia ni Saul ken iti pamilia ni David, intultuloy ni Abner+ a pinabileg ti saadna iti pamilia ni Saul.  Adda sabali pay nga asawa ni Saul nga agnagan iti Rizpa,+ nga anak a babai ni Aya. Idi agangay, kinuna ni Is-boset+ ken Abner: “Apay a nakikaiddaka iti sabali pay nga asawa ni amak?”+  Napalalo ti unget ni Abner iti imbaga ni Is-boset isu a kinunana: “Maysaak aya nga aso* iti Juda? Agingga ita, ipakpakitak ti napudno nga ayat iti pamilia ni amam a Saul ken kadagiti kakabsat ken gagayyemna, ket saanka nga inyawat iti ima ni David; sa ita, isingirmo kaniak ti basol mainaig iti maysa a babai.  Dusaennak koma ti Dios no saanko nga aramiden ken David ti kas iti insapata kenkuana ni Jehova,+ 10  a maikkat iti pamilia ni Saul ti pagarian ken maipasdek ti trono ni David iti intero nga Israel ken iti intero a Juda manipud Dan agingga idiay Beer-sheba.”+ 11  Saanen a nakasungbat ni Is-boset ken ni Abner gapu ta mabuteng kenkuana.+ 12  Dagus a nangibaon ni Abner kadagiti mensahero a mapan ken David ket imbagana: “Asino ti makinkukua iti daga?” Sana innayon: “Agtulagta ket aramidek ti amin a kabaelak* tapno maallukoyko ti intero nga Israel a mangsuporta kenka.”+ 13  Gapu iti dayta, kinunana: “Nasayaat! Makitulagak ngarud kenka. Ngem daytoy ti kondision: Saanak nga agpakita kenka malaksid no iyegmo nga umuna kaniak ni Mical+ nga anak ni Saul inton umayka.” 14  Nangibaon ni David kadagiti mensahero a mapan ken Is-boset+ nga anak ni Saul, ket imbagana: “Isublim kaniak ti asawak a ni Mical, a nagbalin nga asawak a kasukat ti intedko a 100 a makinruar a kudil* dagiti Filisteo.”+ 15  Isu a nangibaon ni Is-boset iti mangala ken Mical manipud iti asawana a ni Paltiel+ nga anak ni Lais. 16  Ngem sumursurot ni Paltiel nga asawana nga agsangsangit bayat a magmagnada agingga idiay Bahurim.+ Idi kuan, kinuna kenkuana ni Abner: “Agawidkan!” Isu a nagawid ni Paltiel. 17  Impaibaga ni Abner kadagiti panglakayen ti Israel: “Nabayagen a kayatyo ni David nga agbalin nga ariyo. 18  Isu nga ita, agtignaykayo, ta imbaga ni Jehova ken David,+ ‘Usarek ti ima ni David nga adipenko a mangisalakan iti ilik nga Israel iti ima dagiti Filisteo ken iti amin a kabusorda.’” 19  Kalpasanna, nakisarita ni Abner kadagiti tattao ti Benjamin.+ Personal met a nakisarita ken David idiay Hebron tapno ipakaammona ti nagtutulagan dagiti Israelita ken dagiti tattao ti Benjamin. 20  Idi immay ni Abner iti ayan ni David idiay Hebron a kaduana ti 20 a tattaona, insaganaan ida ni David iti padaya. 21  Kinuna ni Abner ken ni David: “Apo ari, bay-am a mapanko ummongen ti intero nga Israel, tapno makitulagda kenka, ket agbalinka nga ari iti amin a kayatmo nga iturayan.” Pinalubosan ni David ni Abner, ket nagawid a sitatalged. 22  Iti saan a nabayag, simmangpet dagiti tattao ni David agraman ni Joab. Kagapgapuda a nangraut ket nagadu ti inyawidda a naalada kadagiti rinautda. Ngem awanen ni Abner iti ayan ni David idiay Hebron ta nakaawiden a sitatalged. 23  Idi makasangpet ni Joab+ ken ti intero nga armadana, naipadamag kenkuana: “Napan ni Abner+ nga anak ni Ner+ iti ari, ket pinagawidna. Nakaawid a sitatalged.” 24  Isu a kinasarita ni Joab ti ari ket kinunana: “Ania ti inaramidmo? Immay gayam ni Abner ditoy, ngem apay a pinalubosam nga agawid a saan a naan-ano? 25  Dimo kadi am-ammo ni Abner nga anak ni Ner? Immay ditoy tapno sikapannaka ken ammuenna ti amin a garawmo ken ti amin nga ar-aramidem.” 26  Pimmanaw ni Joab iti sango ni David ket nangibaon kadagiti mensahero a mangkamat ken Abner. Nakamakamda iti pagurnongan iti danum idiay Sira; ngem saan nga ammo ni David ti napasamak. 27  Idi nakasubli ni Abner idiay Hebron,+ inayaban ni Joab iti uneg ti ruangan tapno kasaritana iti nalimed. Ngem dinuyokna ti tian ni Abner ket natay;+ kas panagibales gapu iti pannakapapatay* ni Asael a kabsatna.+ 28  Kinuna ni David idi nadamagna dayta: “Ammo ni Jehova nga awan a pulos ti basolko ken ti pagariak iti ipapatay+ ni Abner nga anak ni Ner. 29  Sapay koma ta ikaro dayta ni Joab+ ken ti intero a sangakabbalayan ni amana. Iti tunggal kaputotanna, kanayonto koma latta nga adda lalaki nga adda agruar iti mabagbagina+ wenno agkukutel+ wenno agtrabaho iti pagabelan* wenno matay iti paggugubatan wenno agkurang iti taraon!”+ 30  Pinatay ti agkabsat a da Joab ken Abisai+ ni Abner+ gapu iti panangpatayna ken Asael a kabsatda iti paggugubatan+ idiay Gibeon. 31  Imbaga ni David ken Joab ken iti amin a tattaona: “Pisangenyo dagiti badoyo ken agbadokayo iti nakersang a lupot ket dung-awanyo ni Abner.” Nagnagna met ni Ari David a simmaruno iti nakaipaiddaan ti bangkay ni Abner. 32  Intabonda ni Abner idiay Hebron; ket nagsangit ti ari iti napigsa iti tanem ni Abner. Nagsangit met ti amin a tattao. 33  Indung-aw ti ari ken ni Abner: “Rumbeng kadi a matay ni Abner a kas iti ipapatay ti awan naknakemna a tao? 34  Saan a nareppet dagiti imam,Saan met a nagalutan iti kawar* dagiti sakam. Napapatayka a kas iti pinatay dagiti kriminal.”*+ Gapu iti dayta, sinangitan manen ti amin a tattao. 35  Kalpasanna, nangted dagiti tattao ken David iti tinapay a pangliwliwa* iti dayta nga aldaw, ngem inkari ni David: “Dusaennak koma ti Dios no kanek dayta ken manganak iti aniaman sakbay a lumnek ti init!”+ 36  Nakita ti amin a tattao ti napasamak ket nagustuanda ti inaramid ti ari. Nagustuan ti amin a tattao ti amin nga inaramid ti ari. 37  Isu a napaneknekan ti amin a tattao ken ti intero nga Israel iti dayta nga aldaw nga awan ti basol ti ari iti ipapatay ni Abner nga anak ni Ner.+ 38  Kinuna ti ari kadagiti adipenna: “Saanyo kadi nga ammo a natay ita nga aldaw ti maysa a prinsipe ken naindaklan a tao iti Israel?+ 39  Uray no siak ti nadutokan* nga ari,+ napakapsutanak ita nga aldaw gapu kadagitoy a lallaki nga annak ni Zeruia,+ ta nagdakes ti inaramidda kaniak.+ Dusaen koma ni Jehova ti nakabasol gapu iti dakes nga inaramidna.”+

Footnotes

Lit., “ulo ti aso.”
Lit., “ken kitaem! adda kenka ti imak.”
Wenno “kudil ti murdong ti mabagbagi ti lalaki.”
Lit., “gapu iti dara.”
Nalabit tumukoy iti pilay a lalaki a masapul a mangaramid iti trabaho dagiti babbai.
Lit., “gambang.”
Lit., “annak ti kinakillo.”
Wenno “tinapay ti panagladingit.”
Wenno “napulotan.”