Ti Maikadua a Samuel 8:1-18
8 Di nagbayag, inabak ni David dagiti Filisteo+ ken pinarmekna ida,+ ket innalana kadakuada ti Meteg-amma.
2 Inabakna dagiti Moabita+ ket pinagiddana ida nga agaabay iti daga sana rinukod ida iti tali. Pinagiddana dagiti naabak ken rinukodna ida iti tali tapno mapapatay ti dua a kakatlo ken mapagtalinaed a sibibiag ti maysa a kakatlo.+ Nagbalin dagiti Moabita nga adipen ni David ken nagbayadda iti buis kenkuana.+
3 Inabak ni David ni Hadadezer nga anak ni Rehob nga ari ti Zoba+ bayat a mapmapan idiay Karayan Eufrates tapno agturay manen sadiay.+
4 Tiniliw ni David ti 1,700 a kumakabalio ken 20,000 a soldado ni Hadadezer. Kalpasanna, pinilay ni David ti amin a kabalio, malaksid iti 100 a kabalio ti karuahe.+
5 Idi napan dagiti Siriano a taga-Damasco+ tapno tulonganda ni Ari Hadadezer ti Zoba, pinapatay ni David ti 22,000 a Siriano.+
6 Nangaramid ni David kadagiti kampo idiay Siria iti Damasco, ket nagbalin dagiti Siriano nga adipen ni David ken nagbayadda iti buis kenkuana. Pinagballigi* ni Jehova ni David iti sadinoman a napananna.+
7 Innala met ni David dagiti nagtimbukel a kalasag a balitok dagiti adipen ni Hadadezer sa impanna idiay Jerusalem.+
8 Nangala ni Ari David iti nagadu a gambang idiay Beta ken Berotai, dagiti siudad ni Hadadezer.
9 Nadamag ni Ari Toi ti Hamat+ nga inabak ni David ti intero nga armada ni Hadadezer.+
10 Isu nga imbaon ni Toi ni Joram nga anakna tapno komustaen ken padayawanna ni Ari David gapu ta inabakna ni Hadadezer (ta masansan idi a makigubat ni Hadadezer ken ni Toi), ket nangitugot kadagiti alikamen a pirak, balitok, ken gambang.
11 Pinagbalin ni Ari David dagitoy a nasantuan iti sanguanan ni Jehova, agraman dagiti pirak ken balitok nga innalana iti amin a nasion a pinarmekna:+
12 manipud Siria ken Moab,+ kadagiti Ammonita, Filisteo,+ ken Amalekita,+ ken dagiti banag nga innalana idi naparmekna ni Hadadezer+ nga anak ni Rehob nga ari ti Zoba.
13 Nagdindinamag met ni David idi agsubli manipud iti panangpapatayna iti 18,000 nga Edomita idiay Tanap ti Asin.+
14 Nangaramid ni David kadagiti kampo idiay Edom. Iti intero nga Edom, nangaramid kadagiti kampo, ket nagbalin nga adipenna ti amin nga Edomita.+ Pinagballigi* ni Jehova ni David iti sadinoman a napananna.+
15 Nagtultuloy a nagturay ni David iti intero nga Israel,+ ket impakatna ti hustisia ken kinalinteg+ iti amin nga iturayanna.+
16 Ni Joab+ nga anak ni Zeruia ti pangulo ti armada, ket ni Jehosafat+ nga anak ni Ahilud ti paralista.
17 Ni Zadok+ nga anak ni Ahitub ken ni Ahimelec nga anak ni Abiatar ti papadi, ken ni Seraias ti sekretario.
18 Ni Benaias+ nga anak ni Jehoiada ti panguluen dagiti Kereteo ken Peleteo.+ Dagiti annak ni David ti nagbalin a panguluen a ministro.*
