Ti Maikadua a Samuel 21:1-22

  • Binales dagiti Gibeonita ti pamilia ni Saul (1-14)

  • Dagiti gubat maibusor kadagiti Filisteo (15-22)

21  Bayat ti panagturay ni David, adda nakaro a bisin+ a nagpaut iti tallo a tawen, isu a dinamag ni David ken ni Jehova no apay, ket kinuna ni Jehova: “Nakabasol ni Saul ken ti pamiliana, ta pinatayna dagiti Gibeonita.”+  Isu a pinaayaban ni David dagiti Gibeonita+ ket kinasaritana ida. (Saan nga Israelita dagiti Gibeonita no di ket isuda dagiti natedda kadagiti Amoreo,+ nga insapata idi dagiti Israelita a salaknibanda.+ Ngem inkagumaan ni Saul a patayen amin ida gapu ta dina mairusok a makipagnaedda kadagiti Israelita ken taga-Juda.)  Kinuna ni David kadagiti Gibeonita: “Ania ti maitulongko kadakayo, ken kasano a masubadak iti kinaimbag daydi dakes a naaramid kadakayo, tapno bendisionanyo dagiti tattao* ni Jehova?”  Kinuna kenkuana dagiti Gibeonita: “Saankami nga agkiddaw iti pirak wenno balitok+ para iti inaramid kadakami ni Saul ken ti pamiliana. Saan met a maiparbeng a patayenmi ti maysa nga Israelita.” Isu a kinunana: “Ania ngarud ti kayatyo nga aramidek para kadakayo?”  Insungbatda iti ari: “Ti tao a nangpadas a mangpatay kadakami amin ken awan ti iteddana kadakami a sibibiag iti sadinoman a teritoria ti Israel,+  itedmo koma kadakami ti pito nga annakna a lallaki. Ibitinminto dagiti bangkayda*+ iti imatang ni Jehova idiay Gibea+ a siudad ni Saul a pinili ni Jehova.”+ Isu a kinuna ti ari: “Itedko ida kadakayo.”  Nupay kasta, naasian ni Ari David ken Mefiboset+ nga anak ni Jonatan nga anak ni Saul, gapu iti tulaganda a dua ken ni Jonatan+ nga anak ni Saul iti imatang ni Jehova.  Isu nga innala ti ari da Armoni ken Mefiboset, ti dua a lallaki a putot ni Saul ken Rizpa+ nga anak a babai ni Aya, ken ti lima a lallaki a putot ni Adriel+ ken Mical*+ nga anak ni Saul. Ni Adriel ket anak ni Barzillai a Meholatita.  Inyawatna ida kadagiti Gibeonita ket imbitinda dagiti bangkayda iti tapaw ti bantay iti imatang ni Jehova.+ Naggigiddan a natay dagiti pito; napapatayda iti umuna nga al-aldaw ti panagani, idi mangrugi ti panagapit iti sebada. 10  Nangala ni Rizpa,+ nga anak a babai ni Aya, iti nakersang a lupot ket inyaplagna iti rabaw ti dakkel a bato manipud panangrugi ti panagani agingga a natuduan dagiti bangkay. Dina impalubos a dagiti billit iti tangatang ket agdisso kadakuada iti aldaw wenno asitgan dagiti atap nga animal iti rabii. 11  Naipadamag ken David ti inaramid ti sabali pay nga asawa ni Saul a ni Rizpa, nga anak a babai ni Aya. 12  Isu a napan innala ni David dagiti tulang da Saul ken Jonatan nga anakna manipud kadagiti lider* iti Jabes-gilead,+ a nangtakaw kadagita iti plasa ti Bet-san. Idiay ti nangibitinan kadakuada dagiti Filisteo idi pinatayda ni Saul idiay Gilboa.+ 13  Innalana ti tultulang da Saul ken Jonatan nga anakna, ket inurnongda met ti tultulang dagiti lallaki a napapatay.*+ 14  Kalpasanna, inkalida dagiti tulang da Saul ken Jonatan nga anakna idiay daga ti Benjamin idiay Zela+ a nakaitaneman ni Kis+ nga amana. Inaramidda ti amin nga imbilin ti ari ket kalpasanna, impangag ti Dios dagiti panagpakpakaasida para iti dagada.+ 15  Nagginnubat manen dagiti Filisteo ken dagiti Israelita.+ Isu a nakigubat ni David ken dagiti adipenna kadagiti Filisteo, ngem nabannog ni David. 16  Ni David ket kayat a patayen ni Isbi-benob, a maysa kadagiti annak ti Refaim,+ nga agdagsen iti 300 a siklo*+ ti gambang a pikana ken nakabarikes iti baro nga espada. 17  Dagus a tinulongan ni Abisai+ nga anak ni Zeruia ni David.+ Dinarupna ti Filisteo ket pinatayna. Isu a pinagkari dagiti soldadona: “Saankan a kumuykuyog kadakami iti paggugubatan!+ Saanmo nga iddepen ti silaw ti Israel!”+ 18  Kalpasanna, nakigubat manen dagiti Filisteo+ idiay Gob. Iti dayta a tiempo, pinatay ni Sibecai+ a Husatita ni Saf a maysa kadagiti kaputotan dagiti Refaim.+ 19  Iti sabali manen a pannakigubatda kadagiti Filisteo+ idiay Gob, ni Elhanan nga anak ni Jaare-oregim a Betlehemita pinatayna ni Goliat a Gitita, a ti putan ti pikana ket kas kapuskol ti pagipulipolan iti sag-ut dagiti agab-abel.+ 20  Adda manen gubat idiay Gat, ket adda sadiay ti maysa a lalaki a sobra ti kadakkelna, nga 6 ti ramay dagiti ima ken sakana, 24 amin; ken kaputotan met dagiti Refaim.+ 21  Lalaisenna ti Israel,+ isu a pinatay ni Jonatan nga anak ni Simei,+ a kabsat ni David. 22  Dagitoy ti uppat a kaputotan dagiti Refaim idiay Gat, ket pinapatay ida ni David ken dagiti adipenna.+

Footnotes

Lit., “tawid.”
Lit., “Ipakitaminto ida,” kayatna a sawen, matukkol dagiti takiag ken gurongda.
Wenno mabalin a, “Merab.”
Wenno mabalin a, “makinkukua iti daga.”
Lit., “naipakita.”
Agarup 3.42 kg. Kitaem ti App. B14.