Ti Maikadua a Samuel 16:1-23

  • Padaksen ni Ziba ni Mefiboset (1-4)

  • Ilunod ni Simei ni David (5-14)

  • Awaten ni Absalom ni Husai (15-19)

  • Ti balakad ni Ahitofel (20-23)

16  Idi nakalabes bassit ni David iti tapaw ti bantay,+ sinabat ni Ziba+ a katulongan ni Mefiboset+ nga addaan iti dua nga asno a nakaawit iti 200 a tinapay, 100 a bibingka a pasas, 100 a bibingka a naaramid kadagiti prutas ti kalgaw,* ken maysa a dakkel a karamba nga arak.+  Kinuna ti ari ken Ziba: “Apay a nangyegka kadagitoy?” Insungbat ni Ziba: “Dagiti asno ket pagsakayan ti pamilia ti ari, dagiti tinapay ken prutas ti kalgaw ket para kadagiti agtutubo a lallaki, ken ti arak ket para kadagidiay mabannog iti let-ang.”+  Sinaludsod ti ari: “Ayanna ngay ti anak* ni apom?”+ Kinuna ni Ziba iti ari: “Nagbati idiay Jerusalem ta kinunana, ‘Isubli kaniak ita ti nasion ti Israel ti pagarian ni amak.’”+  Kinuna ti ari ken Ziba: “Kukuamon ti amin a kukua ni Mefiboset.”+ Insungbat ni Ziba: “Agruknoyak iti sanguananyo, apo ari. Sapay koma ta makasarakak iti parabur iti imatangyo.”+  Idi dimteng ni Ari David idiay Bahurim, maysa a lalaki iti pamilia ni Saul nga agnagan iti Simei+ nga anak ni Gera ti simmabat a mangilunlunod kenkuana bayat a sumungsungad.+  Batbatuenna ni David ken ti amin nga adipenna, agraman ti amin a dadduma pay a soldado ken nabileg a lallaki iti makannawan ken makannigidna.  Kinuna ni Simei bayat a mangilunlunod: “Pumanawka, pumanawka, sika a mammapatay! Awan serserbim a tao!  Pinataymo dagiti miembro ti pamilia ni Saul ken inagawmo ti kinaarina isu a dusdusaennaka ita ni Jehova. Ngem ited ni Jehova ti pagarian iti anakmo a ni Absalom. Kakaasika itan ta maysaka a mammapatay!”+  Kinuna ni Abisai nga anak ni Zeruia+ iti ari: “Apo ari,+ apay nga ilunlunodnaka daytoy natay nga aso?+ Palubosannak man ta mapanko putden ti ulona.”+ 10  Ngem kinuna ti ari: “Ania koma ti bibiangyo iti mapaspasamak kaniak, dakayo nga annak ni Zeruia?+ Bay-anyo nga ilunodnak,+ ta imbaga kenkuana ni Jehova,+ ‘Ilunodmo ni David!’ Isu nga awan ti karbengan ti asinoman a mangibaga, ‘Apay a kasta ti ar-aramidem?’” 11  Kinuna ni David ken Abisai ken iti amin nga adipenna: “Kayatnakto pay a patayen ti mismo nga anakko a nagtaud iti mismo a bagik,+ anianto la ketdin ti maysa a Benjaminita!+ Bay-anyo nga ilunodnak ta ni Jehova ti nangibilin nga aramidenna dayta! 12  Bareng makita ni Jehova ti rigatko,+ ket bendisionannak ni Jehova imbes a pumayso dagiti lunodna kaniak ita nga aldaw.”+ 13  Bayat a sumalsalog ni David ken dagiti tattaona, makigidgiddan met ni Simei a magmagna iti igid ti bantay bayat nga ilunlunodna ni David,+ batbatuenna, ken purpuruakanna iti adu a tapok. 14  Di nagbayag, nakadanon ti ari ken ti amin a kakaduana iti papananda. Nabambannogda isu a naginanada. 15  Kabayatanna, nakadanonen idiay Jerusalem ni Absalom ken ti amin a lallaki ti Israel, ket kaduana ni Ahitofel.+ 16  Napan ken Absalom ni Husai+ nga Arkita+ a gayyem* ni David ket kinunana: “Agbiag koma ti ari!+ Agbiag koma ti ari!” 17  Gapu iti dayta, kinuna ni Absalom ken Husai: “Kastoy kadi ti panangipakitam iti napudno a panagayatmo iti gayyemmo? Apay a saanka a kimmuyog iti gayyemmo?” 18  Kinuna ni Husai ken Absalom: “Saan, sumurotak iti daydiay pinili ni Jehova, iti daytoy nga ili, ken iti amin a lallaki ti Israel. Makikaduaak kenkuana. 19  Ulitek nga ibaga, Asino ti pagserbiak? Saan kadi a rumbeng laeng a ti anakna? Pagserbianka a kas iti panagserbik ken amam.”+ 20  Kinuna ni Absalom ken Ahitofel: “Balakadannak* man.+ Ania ti masapul nga aramidentayo?” 21  Isu a kinuna ni Ahitofel ken Absalom: “Kaiddaem dagiti sabali pay nga assawa ni amam,+ dagidiay imbatina a mangaywan iti palasio.*+ Inton madamag ti intero nga Israel ti inaramidmo a pananginsulto ken amam, lallalonto a tumured dagidiay mangsupsuporta kenka.” 22  Nangibangonda ngarud iti tolda para ken Absalom iti rabaw ti palasio,+ ket kinaidda ni Absalom dagiti sabali pay nga assawa ni amana+ iti imatang ti intero nga Israel.+ 23  Kadagidi nga aldaw, ti balakad ni Ahitofel+ ket maibilang a kas* iti sao ti pudno a Dios. Kasta idi ti kapateg para ken David ken ni Absalom ti amin a balakad ni Ahitofel.

Footnotes

Nangruna dagiti higos ken nalabit datiles.
Wenno “apoko.”
Wenno “pagtaltalkan.”
Wenno “Bagbagaannak.”
Wenno “balay.”
Wenno “kas iti maysa nga agkonkonsulta.”