Ti Maikadua a Samuel 13:1-39

  • Ramesen ni Amnon ni Tamar (1-22)

  • Patayen ni Absalom ni Amnon (23-33)

  • Agkamang ni Absalom idiay Gesur (34-39)

13  Adda napintas a balasang a kabsat ni Absalom nga anak ni David. Tamar ti naganna.+ Nagayat kenkuana ni Amnon+ a maysa pay nga anak ni David.  Mariribukan unay ni Amnon nga uray la a nagsakit gapu iti kabsatna* a ni Tamar a maysa a birhen, ta kasla imposible a maitungpal ni Amnon ti tarigagayna ken Tamar.  Adda gayyem ni Amnon nga agnagan iti Jehonadab,+ nga anak ni Simeah+ a manong ni David. Nakasiksikap ni Jehonadab.  Isu a kinunana ken Amnon: “Anaknaka ti ari, ngem apay a kanayon a malidlidayka unay? Ibagam kaniak no apay.” Insungbat ni Amnon: “Agayatak ken Tamar a kabsat+ ni Absalom a kabsatko.”  Imbaga ni Jehonadab kenkuana: “Agiddaka iti katrem ken aginsasakitka. Inton umaynaka kitaen ni tatangmo, ibagamto kenkuana, ‘Paumayenyo man ditoy ni Tamar a kabsatko tapno idasarannak iti kanek. Kayatko a makita ti panangisaganana iti kanen ti masakit,* ken isunto metten ti mangpakan kaniak.’”  Isu a nagidda ni Amnon ken naginsasakit, ket immay kinita ti ari. Kinuna ni Amnon iti ari: “Pangngaasiyo ta paumayenyo ditoy ni Tamar a kabsatko tapno iyaramidannak iti dua a sinanpuso a tinapay. Kayatko a makita ti panangisaganana iti dayta ken isunto metten ti mangpakan kaniak.”  Nangibaon ni David iti mapan iti balay ni Tamar a mangibaga: “Pangngaasim ta mapanka iti balay ni Amnon a kabsatmo ket isaganaam iti kanenna.”*  Napan ngarud ni Tamar iti balay ni Amnon a kabsatna ket nasangpetanna nga agid-idda. Nangala ni Tamar iti arina ket minasana dayta sana linuto bayat a kitkitaen ni Amnon.  Inadawna dayta iti pariok sana indasar ken Amnon, ngem saanna a kinayat ti nangan. Kinunana ketdi: “Rummuarkayo amin!” Isu a rimmuarda amin. 10  Kinuna ni Amnon ken Tamar: “Iserrekmo ti makan* ditoy kuarto ket subuannak.” Isu nga innala ni Tamar dagiti inaramidna a sinanpuso a tinapay ket impanna ken ni Amnon a kabsatna nga adda iti kuarto. 11  Idi iyawat ni Tamar ti tinapay, ginammatan ni Amnon ket kinunana: “Umayka kabsatko, ta kaiddaennak.” 12  “Saan, kabsatko!” kinuna ni Tamar, “dimo aramiden kaniak daytoy a nakababain a banag, ta saan a maar-aramid daytoy iti Israel.+ Dimo aramiden daytoy nakaal-alas a banag.+ 13  Anianto pay ngarud ti rupak nga isangok iti publiko? Ket sika, agbalinkanto a maysa kadagiti awan babainna a tao iti Israel. Pangngaasim, ibagam daytoy iti ari, ta ammok a patganna no kiddawem nga agbalinak nga asawam.” 14  Ngem dina inkaskaso ni Tamar. Inusarna ti pigsana a nangipaidda kenkuana ket rinamesna. 15  Kalpasan dayta nga inaramidna, kinagurana unay ni Tamar. Nakarkaro payen ti gurana ngem iti nariknana idi a panagayat kenkuana. Kinuna ni Amnon: “Bumangonka ket pumanawkan!” 16  “Saan, kabsatko,” insungbat ni Tamar, “ta dakdakes a banag ti panangpapanawmo kaniak ngem iti inaramidmo kaniak!” Ngem saan a dimngeg ni Amnon kenkuana. 17  Inayaban ni Amnon ti agtutubo a katulonganna ket kinunana: “Paruarem daytoy a babai, sa itrangkam ti ridaw.” 18  (Nakabado idi ni Tamar iti espesial* a bado dagiti babbalasang* nga annak ti ari.) Isu a pinaruar ti katulongan sana intrangka ti ridaw. 19  Inikkan ni Tamar ti ulona+ iti dapo sana pinisang ti napintas a badona; ket pimmanaw a nakaparabaw dagiti imana iti ulona nga agsangsangit a magmagna. 20  Gapu iti daytoy, dinamag ni Absalom+ a kabsatna: “Ni kadi Amnon a kabsatmo ti nangaramid kenka iti daytoy? Dimo ibagbaga iti asinoman ti napasamak kenka, kabsatko. Kabsatmo*+ ni Amnon. Lipatem latta koman ti napasamak.” Nagyan ngarud ni Tamar iti balay ni Absalom a kabsatna, ket saan a nakilanglangen iti sabsabali. 21  Kasta unay ti pungtot ni Ari David idi naammuanna ti amin a napasamak.+ Ngem saanna a dinusa ni Amnon nga anakna ta dungdungnguenna ken isu ti inauna nga anakna. 22  Awan ti naimbag wenno dakes nga imbaga ni Absalom ken ni Amnon, ta ginura ni Absalom+ ni Amnon gapu iti panangramesna iti kabsatna a ni Tamar.+ 23  Naglabas ti dua a tawen. Pappapukisan idi ni Absalom dagiti karnerona idiay Baal-hazor nga asideg ti Efraim,+ ket inawisna ti amin nga annak a lallaki ti ari.+ 24  Napan ni Absalom iti ari ket kinunana: “Madama a pappapukisak dagiti karnerok. Ipakaasik iti ari nga umay koma agraman dagiti adipenna.” 25  Ngem kinuna ti ari ken Absalom: “Saan, anakko. No umaykami amin, adunto unayen ti asikasuem.” Pinilitna ti ari ngem saan nga immannugot. Binendisionan ketdi ti ari. 26  Kinuna ni Absalom: “No dikay makaumay, pakibagayo man ngarud ken ni Amnon a kabsatko a kumuyog kadakami.”+ Insungbat ti ari: “Apay koma a kumuyog kenka ni Amnon?” 27  Ngem kinombinsir ni Absalom, isu nga imbaon ti ari ni Amnon ken ti amin nga annakna a lallaki. 28  Kalpasanna, imbilin ni Absalom kadagiti katulonganna: “Inton makitayon a nakaragragsak ni Amnon nga umin-inum iti arak, patayenyon. Masapul a patayenyo. Dikay agbuteng, ta siak ti agbilbilin kadakayo. Papigsaenyo ti pakinakemyo ken agbalinkayo a natured.” 29  Inaramid dagiti katulongan ni Absalom ken ni Amnon ti eksakto nga imbilin ni Absalom. Kalpasan dayta, dinardaras ti dadduma pay nga annak ti ari ti naglibas a nakasakay iti bukodda a mulo.* 30  Addada pay laeng iti dalan idi naipadamag ken David: “Pinapatay ni Absalom ti amin nga annak a lallaki ti ari. Awan ti uray maysa a nabati.” 31  Timmakder ti ari ket pinigisna ti badona ken nagpakleb iti daga. Pinisang met ti amin nga adipenna nga agtaktakder sadiay dagiti badoda. 32  Ngem kinuna ni Jehonadab+ nga anak ni Simeah+ a manong ni David: “Apo ari, saan nga amin nga annakmo ti pinatayda. Ni laeng Amnon ti natay.+ Bilin dayta ni Absalom, ta inkeddengna a patayen ni Amnon+ manipud idi rinames ni Amnon ni Tamar+ a kabsatna.+ 33  Saanyo koma ngarud a patien* ti damag, apo ari, nga amin nga annakyo a lallaki ti natay, ta ni laeng Amnon ti natay.” 34  Kabayatanna, nagtalaw ni Absalom.+ Idi agangay, nakita ti parabantay nga adu ti sumungsungad iti dalan nga aggapu iti bantay. 35  Isu a kinuna ni Jehonadab+ iti ari: “Kitaenyo! Simmangpeten dagiti annak a lallaki ti ari, kas iti mismo nga imbaga daytoy adipenmo.” 36  Idi nalpasen a nakisarita ni Jehonadab iti ari, immay dagiti annak a lallaki ti ari, nga agsangsangit iti nakapigpigsa. Kasta unay met ti panagsangit ti ari ken ti amin nga adipenna. 37  Ngem nagtalaw ni Absalom ket napan ken Talmai+ nga anak ni Amihud nga ari ti Gesur. Adu nga aldaw a sinangsangitan ni David ti anakna. 38  Tallo a tawen a nagyan ni Absalom idiay Gesur+ manipud idi nagkamang sadiay. 39  Idi nailiwliwagen* ni Ari David ti ipapatay ni Amnon, mailiwen ken Absalom.

Footnotes

Kayatna a sawen, kabsatna iti ama.
Wenno “tinapay a pangliwliwa.”
Wenno “tinapay a pangliwliwa.”
Wenno “tinapay a pangliwliwa.”
Wenno “naarkosan.”
Lit., “birhen.”
Kayatna a sawen, kabsatna iti ama.
Anak ti asno ken kabalio.
Lit., “nga ipapuso.”
Wenno “naawaten.”