Ti Maikadua a Samuel 1:1-27

  • Madamag ni David ti ipapatay ni Saul (1-16)

  • Ti dung-aw ni David iti ipapatay da Saul ken Jonatan (17-27)

1  Idi natay ni Saul, nagawid ni David manipud iti panangabakna* kadagiti Amalekita ket nagyan idiay Ziklag+ iti dua nga aldaw.  Iti maikatlo nga aldaw, adda lalaki a napisang ti badona ken adda rugit iti ulona a naggapu iti kampo ni Saul. Inasitganna ni David ket nagrukob ken nagruknoy iti sanguananna.  “Sadino ti naggapuam?” dinamag ni David. “Naglibasak iti kampo ti Israel,” kinunana.  Insaludsod ni David: “Ania ti napasamak? Pangngaasim ta ibagam kaniak.” Isu a kinunana: “Nagtatalaw dagiti soldado iti paggugubatan ken adu ti napapatay. Natay payen ni Saul ken ti anakna a ni Jonatan.”+  Dinamag ni David iti agtutubo a lalaki a nagipadamag kenkuana: “Kasanom nga ammo a natay ni Saul ken ni Jonatan nga anakna?”  Insungbat ti agtutubo a lalaki: “Nairana nga addaak idi idiay Bantay Gilboa.+ Agsadsadag ni Saul iti pikana, ket nakamakam dagiti nakakaruahe ken nakakabalio a lallaki.+  Idi tumaliaw, nakitanak isu nga inayabannak ket kinunak, ‘Apay, apo?’  Dinamagna, ‘Asinoka?’ ket kinunak, ‘Maysaak nga Amalekita.’+  Kalpasanna, kinunana, ‘Pangngaasim, umasidegka kaniak ket patayennak, ta sibibiagak pay laeng ngem marigrigatanak unayen.’ 10  Isu nga inasitgak ket pinatayko+ ta ammok a matayto met laeng gapu iti nakaro a sugatna. Kalpasanna, innalak ti korona* iti ulona ken ti pulseras iti takiagna ket inyegko ida kenka, apo.” 11  Gapu iti dayta, pinisang ni David ti badona ket kasta met ti inaramid ti amin a tattaona. 12  Nagdung-aw, nagsangit, ken nagayunarda+ agingga iti rabii gapu ta ni Saul, ni Jonatan nga anakna, ti nagadu a tattao ni Jehova, ken ti nagadu nga Israelita+ ket natay iti espada. 13  Dinamag ni David iti agtutubo a lalaki a nagipadamag kenkuana: “Asinoka ken tagaanoka?” Insungbat ti lalaki: “Anaknak ti maysa nga Amalekita a ganggannaet a residente iti lugaryo.” 14  Kinuna ni David: “Apay a dika man la nagbuteng a nangpatay iti dinutokan ni Jehova?”+ 15  Gapu iti dayta, inayaban ni David ti maysa kadagiti tattaona ket kinunana: “Asitgam ket patayem daytoy a lalaki!” Isu a dinuyokna ket natay.+ 16  Kinuna ni David iti lalaki: “Sika met laeng ti makimbasol iti ipapataymo ta sika a mismo ti nangibaga, ‘Siak ti nangpatay iti dinutokan ni Jehova.’”+ 17  Kalpasanna, kinanta ni David daytoy a dung-aw* para kada Saul ken ni Jonatan nga anakna,+ 18  ket imbilinna a maisuro kadagiti umili ti Juda ti dung-aw a napauluan iti, “Ti Pana” a naisurat iti libro ni Jasar.+ 19  “Ti pintasmo, O Israel, ket nadadael kadagiti nangato a dissom.+ Napapatay dagiti nabileg a tattaom! 20  Diyo ipakaammo dayta idiay Gat;+Diyo iwaragawag kadagiti kalsada ti Askelon,Ta amangan no agragsak dagiti annak a babbai dagiti Filisteo,Wenno dagiti annak a babbai dagiti di nakugit a tattao. 21  Sika a kabambantayan ti Gilboa,+Awan koma ti linnaaw wenno tudo kenka,Wenno taltalon a mangpataud kadagiti nasantuan a kontribusion;+Ta sadiay a narugitan dagiti kalasag dagiti nabileg a tattaom,Ti kalasag ni Saul ket saanen a nalanaan. 22  Naibukbok ti dara dagiti napapatay ken nasalput ti taba dagiti nabileg,Ta saan a nagmintis ti pana ni Jonatan+Ken kanayon nga adda naduyok ti espada ni Saul.+ 23  Maipatpateg ken madungdungngo* da Saul ken Jonatan+ idi sibibiagda,Dida nagsinsina agingga a nagsat ti angesda.+ Naparpartakda ngem kadagiti agila,+Nabilbilegda no idilig kadagiti leon.+ 24  O babbai iti Israel, ni Saul ket sangitanyo,A nangted kadakayo iti nalabaga ken nagarbo a bado,Ken nangikabil kadagiti balitok nga arkos kadagiti badoyo. 25  Napapatay iti gubat dagiti nabileg a tattaom! Napapatay ni Jonatan kadagiti nangato a dissom!+ 26  Maladingitanak unay ta awankan, Jonatan a kabsatko,Ta nakapatpategka unay kaniak.+ Ti ayatmo kaniak atiwenna ti ayat dagiti babbai.+ 27  Napapatay dagiti nabileg a tattaoKet awanen dagiti armas a pakigubat!”

Footnotes

Wenno “panangpapatayna.”
Wenno “diadema.”
Wenno “kanta ti panagladingit.”
Wenno “makaay-ayo.”