Ti Maikadua a Samuel 20:1-26

  • Ibubusor ni Sheba; patayen ni Joab ni Amasa (1-13)

  • Pannakakamat ken pannakaputed ti ulo ni Sheba (14-22)

  • Administrasion ni David (23-26)

20  Adda idi manangriribuk a ti naganna ket Sheba+ nga anak ni Bikri a Benjaminita. Pinuyotanna ti tangguyob+ ket kinunana: “Awan ti bingaytayo ken David, ken awan ti matawidtayo iti anak ni Jesse.+ O Israel, agsublitayon kadagiti diostayo!”*+  Gapu iti dayta, saanen a simmurot ken David ti amin a tattao ti Israel no di ket simmurotdan ken Sheba nga anak ni Bikri;+ ngem sinuportaran latta dagiti tattao ti Juda ti arida, manipud Jordan agingga idiay Jerusalem.+  Idi nakasangpet ni David iti palasiona* idiay Jerusalem,+ innalana ti 10 a sabali pay nga assawana a nagbati a nangaywan iti palasiona+ ket pinagyanna ida iti maysa a balay ken pinaguardiaanna dayta. Inikkanna ida iti suplayda a taraon ngem saan a nakidendenna kadakuada.+ Nagtalinaedda sadiay agingga a natayda. Nagbiagda a kasla balo uray no sibibiag pay ti asawada.  Kinuna ti ari ken Amasa:+ “Iti uneg ti tallo nga aldaw, paumayem kaniak dagiti tattao ti Juda, ket masapul nga addaka met ditoy.”  Isu a napan inayaban ni Amasa dagiti taga-Juda; ngem saan a nakasangpet iti naikeddeng nga aldaw nga iyaayna.  Kinuna ni David ken Abisai:+ “Dakdakesto ti aramiden kadatayo ni Sheba+ nga anak ni Bikri ngem ni Absalom.+ Alaem dagiti tattaotayo ket kamatem, tapno saan a makapan kadagiti napaderan a siudad ket mailemmengannatayo.”  Isu a pimmanaw idiay Jerusalem dagiti tattao ni Joab,+ dagiti Kereteo, dagiti Peleteo,+ ken amin a nabileg a lallaki tapno kamatenda ni Sheba nga anak ni Bikri.  Idi asidegdan iti dakkel a bato idiay Gibeon,+ sinabat ida ni Amasa.+ Nakasuot ni Joab iti bado a pakigubat, ken nakabarikes iti espada a nayusok iti kalubanna. Bayat ti iyaasidegna, natnag ti espada.  Kinuna ni Joab ken Amasa: “Komustaka, kabsatko?” Iniggaman ti makannawan nga ima ni Joab ti barbas ni Amasa a kasla agkanna koma. 10  Saan a nadlaw ni Amasa a nakaiggem ni Joab iti espada. Dinuyok ni Joab ti tian ni Amasa,+ nga uray la naiburayray dagiti bagisna iti daga. Dinan pinidua a dinuyok; umdasen dayta a nakatayanna. Kalpasanna, intuloy ti agkabsat a da Joab ken Abisai a kamaten ni Sheba nga anak ni Bikri. 11  Nagtakder ti maysa kadagiti tattao ni Joab iti abay ni Amasa ket kinunana: “Siasinoman nga adda iti dasig da Joab ken David, sumurot koma ken Joab!” 12  Kabayatanna, nadigus ni Amasa iti bukodna a dara iti tengnga ti dalan. Idi nakitana nga aribungbonganen ti amin a tattao, inyalisna ni Amasa iti asideg a talon sana inabbongan iti lupot, ta nakitana a sumardeng ti amin a lumabas. 13  Idi naikkatnan ni Amasa iti kalsada, simmurot ti amin a lallaki ken Joab a mangkamat ken Sheba+ nga anak ni Bikri. 14  Linabsan ni Sheba ti amin a tribu ti Israel agingga idiay Abel iti Bet-maaca.+ Naguummong ti amin a kabagian ni Bikri ket simmurotda met kenkuana. 15  Immay ni Joab ken dagiti tattaona ket pinalawlawanda ni Sheba idiay Abel iti Bet-maaca ket nangibuntonda iti daga iti ruar ti pader ti siudad. Ket kinali dagiti tattao ni Joab ti pundasion ti pader tapno marba. 16  Adda masirib a babai a nagpukkaw iti ayan ti pader ti siudad: “Dumngegkayo, lallaki, dumngegkayo! Pangngaasiyo ta ibagayo ken Joab nga umay ditoy ta adda ibagak kenkuana.” 17  Isu nga immasideg ni Joab iti babai ket sinaludsod ti babai: “Sika kadi ni Joab?” Kinunana: “Wen, siak.” Kinuna ti babai: “Dumngegka kaniak, apo.” Kinuna ni Joab: “Dumdumngegak.” 18  Intuloy ti babai: “Idi un-unana, masansan nga ibagada, ‘Agdamagkayo laeng idiay Abel, ket sigurado a masolbar ti problemayo.’ 19  Siak ti pannakabagi dagiti mannakikappia ken matalek a tattao ti Israel. Kayatyo a dadaelen ti siudad a pannakaina ti Israel. Apay a kayatyo a pukawen* dagiti tattao* ni Jehova?”+ 20  Insungbat ni Joab: “Diak maitured a pukawen ken dadaelen dayta. 21  Saan a kasta ti panggepmi. Birbirokenmi laeng ti tao nga agnagan Sheba+ nga anak ni Bikri a naggapu iti kabambantayan ti Efraim+ a nagrebelde* ken Ari David. No isukoyo kaniak dayta a tao, panawakto ti siudad.” Kinuna ti babai ken Joab: “Bay-am ta ipuruakminto kenka ti ulona iti ruar ti pader!” 22  Dagus a napan ti masirib a babai kadagiti tattao ket pinutedda ti ulo ni Sheba nga anak ni Bikri sada impalladaw ken Joab. Kalpasan dayta, pinuyot ni Joab ti tangguyob, ket pimmanawdan iti siudad. Nagawidda iti balbalayda+ ket nagsubli ni Joab idiay Jerusalem nga ayan ti ari. 23  Ni Joab ti lider ti intero nga armada ti Israel;+ ni Benaias+ nga anak ni Jehoiada+ ti lider dagiti Kereteo ken dagiti Peleteo.+ 24  Ni Adoram+ ti lider dagidiay naayaban nga agtrabaho; ni Jehosafat+ nga anak ni Ahilud ti paralista. 25  Ni Sheva ti sekretario, ket da Zadok+ ken Abiatar+ ti papadi. 26  Ket ni Ira a Jairita ti nagbalin a panguluen a ministro* ni David.

Footnotes

Wenno mabalin a, “toldatayo.”
Wenno “balayna.”
Lit., “nga alun-onen.”
Lit., “tawid.”
Lit., “nangingato iti imana.”
Lit., “padi.”