Ti Maikadua a Samuel 10:1-19

  • Dagiti panagballigi maibusor iti Ammon ken Siria (1-19)

10  Idi natay ti ari dagiti Ammonita,+ ti anakna a ni Hanun ti simmaruno nga ari.+  Gapuna, kinuna ni David: “Ipakitaakto iti napudno nga ayat ni Hanun nga anak ni Nahas, ta impakitaannak idi ni amana iti napudno nga ayat.” Isu a nangibaon ni David kadagiti adipenna a mangliwliwa kenkuana gapu iti ipapatay ni amana. Ngem idi nakadanon dagiti adipen ni David iti daga dagiti Ammonita,  kinuna dagiti prinsipe dagiti Ammonita iti apoda a ni Hanun: “Panagkunam, padpadayawan ni David daydi amam babaen ti panangibaonna kadagiti mangliwliwa kenka? Saan ngata nga imbaon ni David dagiti adipenna tapno agpaliiw ken agespia, sadanto parmeken ti siudad?”  Gapuna, innala ni Hanun dagiti adipen ni David ket kiniskisanna ti bangir a kagudua dagiti barbasda+ ken pinutedna dagiti badoda iti batog ti patongda sa pinapanawna ida.  Idi naibaga daytoy ken David, dagus a nangibaon kadagiti lallaki a sumabat kadakuada ta naibabainda unay. Kinuna ti ari kadakuada: “Agyankayo idiay Jerico+ ket agsublikayo inton umatiddog manen dagiti barbasyo.”  Nadlaw dagiti Ammonita a kagurgura idan ni David isu a nangibaonda kadagiti mensahero ken nangtangdanda iti 20,000 a soldado a Siriano iti Bet-rehob+ ken Zoba+ a kaduada ti ari ti Maaca+ ken ti 1,000 a soldado ken 12,000 a soldado manipud idiay Istob.*+  Idi nadamag dayta ni David, imbaonna ni Joab ken ti intero nga armada, agraman dagiti kabibilgan a mannakigubatna.+  Rimmuar dagiti Ammonita ket nagpuestoda iti pagserkan ti siudad tapno makigubat idinto ta adda iti nawayang a lugar dagiti Siriano iti Zoba ken Rehob, agraman dagiti soldado ti Istob* ken Maaca.  Idi nakita ni Joab a dumarupen dagiti kabusor iti sanguanan ken iti likudanna, pinilina dagiti kalaingan a soldado ti Israel ket pinagsaganana ida a sumabat kadagiti Siriano.+ 10  Intalekna ti dadduma pay a soldado iti panangidaulo* ti kabsatna a ni Abisai+ tapno pagpuestuenna ida a sumabat kadagiti Ammonita.+ 11  Kinunana: “No makitam a diak maabak dagiti Siriano, umaynakto tulongan. Ngem no makitak a dimo maabak dagiti Ammonita, umaykanto tulongan. 12  Masapul a bumilegta ken papigsaenta ti pakinakemta+ para kadagiti kailianta ken kadagiti siudad ti Diostayo, ket aramidento ni Jehova ti nasayaat.”+ 13  Dimmarup ni Joab ken dagiti soldadona, ket nagtataray a pimmanaw dagiti Siriano iti sanguananna.+ 14  Idi nakita dagiti Ammonita a nagtataray dagiti Siriano, nagtatarayda met a pimmanaw iti sanguanan ni Abisai ket immatrasda. Kalpasan ti pannakilaban ni Joab kadagiti Ammonita, nagsubli idiay Jerusalem. 15  Idi nakita dagiti Siriano nga inabak ida dagiti Israelita, naguurnongda manen.+ 16  Isu a pinaayaban ni Hadadezer+ dagiti Siriano nga adda iti rehion ti Karayan,*+ ket nakadanonda idiay Helam. Idadauluan ida ni Sobak a pangulo ti armada ni Hadadezer. 17  Idi naipadamag dayta ken David, inummongna a dagus ti intero nga armada ti Israel. Binallasiwda ti Jordan ket napanda idiay Helam. Nagsagana met dagiti Siriano a sumabat ken dumarup ken David.+ 18  Ngem nagtataray a pimmanaw dagiti Siriano iti sanguanan dagiti Israelita. Pinatay ni David ti 700 a kumakaruahe ken 40,000 a kumakabalio a Siriano, agraman ni Sobak a pangulo ti armadada.+ 19  Idi nakita ti amin nga ari ken dagiti adipen ni Hadadezer nga inabak idan ti Israel, dagus a nakikappiada ken nagpaiturayda iti Israel.+ Manipud idin, mabutengen dagiti Siriano a tumulong kadagiti Ammonita.

Footnotes

Wenno “dagiti lallaki idiay Tob.”
Wenno “dagiti lallaki idiay Tob.”
Lit., “iti ima.”
Kayatna a sawen, ti Eufrates.