Ti Maikadua a Samuel 17:1-29

  • Kontraen ni Husai ti balakad ni Ahitofel (1-14)

  • Mapakdaaran ni David; pumanaw tapno malisianna ni Absalom (15-29)

    • Mangted ni Barzillai ken ti dadduma pay kadagiti masapsapul ken taraon (27-29)

17  Kinuna ni Ahitofel ken Absalom: “Pangngaasim ta palubosannak a mangpili iti 12,000 a lallaki ket mapanmi kamaten ni David ita a rabii.  Darupek inton nabannog ken nakapsuten,*+ ket butbutngekto. Agtalawto ti amin a naikuyog kenkuana ken ti ari laeng ti patayek.+  Kalpasanna, isublikto kenka ti amin a tattao. Ti panagsubli ti amin a tattao ket agdepende iti mapasamak iti lalaki a sapsapulem. Saanto a maan-ano ti amin a tattao.”  Nagustuan ni Absalom ken ti amin a panglakayen iti Israel dayta a singasing.  Ngem kinuna ni Absalom: “Pangngaasiyo ta ayabanyo met ni Husai+ nga Arkita, ket denggentayo ti makunana.”  Napan ni Husai ken Absalom ket kinuna kenkuana ni Absalom: “Kastoy ti balakad ni Ahitofel. Aramidentayo kadi dayta? No saan, ibagam kadakami.”  Gapuna, kinuna ni Husai ken Absalom: “Saan a nasayaat ita ti balakad ni Ahitofel!”+  Intuloy ni Husai: “Ammom a nabileg ni amam ken dagiti tattaona,+ ken desperadoda, a kasda la iti kabaian nga oso a napukawan kadagiti urbonna iti tay-ak.+ Mannakigubat met ni amam,+ ket saan a maturog iti ayan dagiti tattaona iti rabii.  Iti daytoy a kanito, isu ket aglemlemmeng iti maysa kadagiti kueba* wenno iti sabali pay a lugar;+ ket no isu nga umuna ti dumarup, ibaganto dagidiay makangngeg iti dayta, ‘Naabak dagiti pasurot ni Absalom!’ 10  Sigurado nga agpigerger uray pay ti natured a lalaki a ti pusona ket kas iti puso ti leon,+ ta ammo ti intero nga Israel a nabileg ni amam+ ken natured dagiti tattaona. 11  Daytoy ti maibalakadko: Ummongem ti intero nga Israel, manipud Dan agingga iti Beer-sheba,+ a kas iti kaadu ti darat iti igid ti baybay,+ ket idauluam ida a makigubat. 12  Darupentayo ni amam iti sadinoman nga ayanna a kaduatayo ti adu a soldado a kas iti kaadu ti linnaaw nga agtinnag iti daga; ket awanto ti uray maysa kadakuada a makalasat, uray isuna wenno ti asinoman kadagiti tattaona. 13  No agkamang iti maysa a siudad, mapanto ti intero nga Israel ket dadaelentayo dayta tapno awan ti mabati uray bassit a bato. Guyodentayto dayta iti tali agingga iti tanap.” 14  Kinuna ni Absalom ken ti amin a lallaki ti Israel: “Nasaysayaat ti balakad ni Husai nga Arkita+ ngem ti balakad ni Ahitofel!” Ta inkeddeng* ni Jehova a saan a masurot ti nasayaat a balakad ni Ahitofel,+ tapno maiyeg ni Jehova ti didigra ken Absalom.+ 15  Idi agangay, imbaga ni Husai kada Zadok ken Abiatar+ a papadi: “Kastoy ti imbalakad ni Ahitofel ken Absalom ken kadagiti panglakayen ti Israel, ket kastoy met ti imbalakadko. 16  Ipakaammoyo a dagus ken David ken ipakdaaryo, ‘Ita a rabii, pumanawka iti let-ang* a pagballasiwan iti Karayan Jordan. Ballasiwem ketdi ti karayan ta no saan, mapapatay* ti ari ken ti amin a kakaduana.’”+ 17  Nagyan da Jonatan+ ken Ahimaaz+ iti ruar ti siudad, idiay En-rogel,+ tapno awan ti makakita kadakuada. Isu a napan iti ayanda ti maysa nga adipen a babai ket imbagana dayta. Napanda imbaga dayta ken Ari David. 18  Ngem adda agtutubo a lalaki a nakakita kadakuada ket impulongna ken Absalom. Isu a dinardarasda a dua ti nagtalaw ket dimtengda iti balay ti maysa a tao idiay Bahurim+ nga adda bubon iti paraanganna. Bimmabada iti bubon, 19  ket nangala ti asawa ti makimbalay iti pinangkalubna iti bubon sana pinarabawan dayta iti bukbukel; ket awan ti nakaammo iti dayta. 20  Dimteng dagiti adipen ni Absalom iti balay ti babai ket sinaludsodda: “Ayan da Ahimaaz ken Jonatan?” Insungbat ti babai: “Bimmallasiwda iti karayan.”+ Napan ngarud binirok dagiti adipen ngem saanda ida a nasarakan isu a nagsublida idiay Jerusalem. 21  Idi nakapanawen dagiti adipen, rimmuar da Ahimaaz ken Jonatan iti bubon ket napanda impadamag ken Ari David: “Darasenyo ti bumallasiw iti karayan, ta kastoy ti imbalakad ni Ahitofel maibusor kadakayo.”+ 22  Dagus a pimmanaw ni David ken ti amin a kakaduana ket binallasiwda ti Jordan. Idi aglawagen, nakaballasiwda aminen. 23  Idi nakita ni Ahitofel a saan a nasurot ti balakadna, nagsakay iti asno ket nagawid iti ilina.+ Kalpasan a nabilinna dagiti miembro ti sangakabbalayanna,+ napan nagbekkel*+ isu a natay. Naitabon iti nakaitaneman dagidi ammana. 24  Kabayatanna, napan ni David idiay Mahanaim,+ ket binallasiw ni Absalom ti Jordan a kaduana ti amin a lallaki ti Israel. 25  Ni Amasa+ ti insukat ni Absalom iti saad ni Joab+ a pangulo ti armada. Ni Amasa ket anak da Itra nga Israelita ken Abigail+ nga anak ni Nahas, nga ading ni Zeruia nga ina ni Joab. 26  Ket nagkampo ti Israel agraman ni Absalom idiay Gilead.+ 27  Apaman a nakadanon ni David idiay Mahanaim, ni Sobi nga anak ni Nahas idiay Rabba+ a kukua dagiti Ammonita, ni Makir+ nga anak ni Amiel idiay Lo-debar, ken ni Barzillai+ a Gileadita idiay Rogelim 28  ket nangyeg kadagiti pagiddaan, palanggana, banga, trigo, sebada, arina, kinirog a bukbukel, patani, lentehas, iniruban a bukbukel, 29  diro, mantekilia, karnero, ken keso.* Impanda amin dagita a kanen ni David ken dagiti kakaduana,+ ta kinunada: “Mabisin ken nabannogen dagiti tattao ken mawawda idiay let-ang.”+

Footnotes

Wenno “agkakapsuten ti dua nga imana.”
Wenno “abut.”
Wenno “imbilin.”
Wenno mabalin a, “desierto a tanap.”
Lit., “maalun-on.”
Wenno “nagbitay.”
Lit., “nagbalay a gatas ti baka.”