Ti Maikadua a Samuel 24:1-25

  • Ti basol ni David a panangpabilangna kadagiti umili (1-14)

  • Ipapatay ti 70,000 gapu iti sakit (15-17)

  • Mangaramid ni David iti altar (18-25)

    • Awan ti daton nga awan bayadna (24)

24  Nakapungtot manen ni Jehova iti Israel,+ idi adda nangsugsog ken David* nga ibagbagana: “Bilangem+ ti Israel ken ti Juda.”+  Isu a kinuna ti ari iti kaduana a ni Joab+ a pangulo ti armada: “Pangngaasim ta sursorem ti amin a tribu ti Israel, manipud Dan agingga iti Beer-sheba,+ ket isuratmo ti bilang dagiti umili, tapno maammuak ti bilangda.”  Ngem kinuna ni Joab iti ari: “Apo ari, sapay koma ta mamin-100 a paaduen ni Jehova a Diosmo dagiti tattao, ket makitam koma dayta. Ngem apo ari, apay a kayatmo nga aramiden ti kasta?”  Ngem ti ari ti nasurot imbes a ni Joab ken dagiti pangulo ti armada. Isu a pimmanaw ni Joab ken dagiti pangulo ti armada iti ayan ti ari tapno mapanda bilangen dagiti tattao iti Israel.+  Binallasiwda ti Jordan ket nagkampoda idiay Aroer,+ iti kannawan* ti siudad nga adda iti tengnga ti tanap,* sada napan iti teritoria dagiti Gadita, ken idiay Jazer.+  Kalpasanna, napanda idiay Gilead+ ken iti daga ti Tatim-hodsi sada nagdirdiretso idiay Dan-jaan ken linikawda ti Sidon.+  Dimtengda iti napaderan a siudad ti Tiro+ ken iti amin a siudad dagiti Heveo+ ken Canaanita. Nagpatinggada idiay Negeb+ iti Juda idiay Beer-sheba.+  Sinursorda ngarud ti intero a daga ket kalpasan ti siam a bulan ken 20 nga aldaw, nagsublida idiay Jerusalem.  Inted ni Joab iti ari ti bilang dagiti nairehistro nga umili. Agdagup ti Israel iti 800,000 a mannakigubat a nakaespada ken 500,000 dagiti lallaki ti Juda.+ 10  Ngem kalpasan ti panangpabilang ni David kadagiti umili, sinidir ti konsiensiana*+ isu nga imbagana ken Jehova: “Nadagsen a basol+ daytoy inaramidko. Pangngaasim, Jehova, ta pakawanem ti basol+ daytoy adipenmo, ta minamaag unay ti inaramidko.”+ 11  Idi bimmangon ni David iti bigat, nakisarita ni Jehova ken ni Gad+ a propeta, a mangibaga iti sirmata ken David, ket kinunana: 12  “Inka ibaga ken David, ‘Daytoy ti kinuna ni Jehova: “Ikkanka iti tallo a pagpilian. Piliem no ania ti aramidek kenka.”’”+ 13  Iti kasta, napan ni Gad ken ni David ket kinunana: “Ania ti kayatmo kadagitoy: pito a tawen a nakaro a bisin iti dagam?+ Wenno tallo a bulan nga itarayam dagiti kalabanmo bayat a kamkamatendaka?+ Wenno tallo nga aldaw nga adda makapapatay a sakit iti dagam?+ Panunotem a naimbag no ania ti ibagak iti Daydiay nangibaon kaniak.” 14  Insungbat ni David ken ni Gad: “Mariribukanak unay. Pangngaasim ta bay-annakami a matnag iti ima ni Jehova,+ gapu ta dakkel ti asina;+ ngem dinak baybay-an a matnag iti ima ti tao.”+ 15  Nangyeg ngarud ni Jehova iti makapapatay a sakit+ iti Israel manipud iti bigat agingga iti naikeddeng a tiempo, isu a 70,000 a tattao ti natay+ kadagiti umili manipud Dan agingga iti Beer-sheba.+ 16  Idi ilayat ti anghel ti imana iti Jerusalem tapno dadaelenna dayta, naladingitan ni Jehova iti didigra,+ isu a kinunana iti anghel a mangpappapatay kadagiti umili: “Huston! Isardengmon.” Adda idi ti anghel ni Jehova iti asideg ti pagirikan ni Arauna+ a Jebuseo.+ 17  Idi nakita ni David ti anghel a mangpappapatay kadagiti umili, kinunana ken Jehova: “Siak ti nakabasol ken siak ti nakaaramid iti dakes. Ngem ania aya ti basol dagitoy a tattao?*+ Pangngaasim ta siak ken ti pamilia ni amak ti dusaem.”+ 18  Iti dayta nga aldaw, napan ni Gad ken David ket kinunana: “Inka iti pagirikan ni Arauna a Jebuseo ket mangbangonka iti altar a para ken Jehova.”+ 19  Inaramid ni David ti imbaga ni Gad kas iti imbilin ni Jehova. 20  Idi nakita ni Arauna ti ari ken dagiti adipenna nga um-umay kenkuana, dagus a rimmuar ket nagruknoy iti ari. 21  Insaludsod ni Arauna: “Apo ari, apay nga immayka kaniak nga adipenmo?” Insungbat ni David: “Tapno gatangek ti pagirikam a pangibangonak iti altar para ken Jehova, tapno agsardeng ti pannakadidigra dagiti umili.”+ 22  Ngem kinuna ni Arauna ken David: “Apo ari, alaem lattan ket idatonmo kenkuana ti ammom a nasayaat.* Adtoy dagiti baka a maidaton kas daton a mapuoran ken dagiti pagirik a pasagad ken sangol dagiti baka kas sungrod. 23  Itedko* amin dagitoy kenka, O ari.” Kinuna pay ni Arauna iti ari: “Sapay koma ta bendisionannaka ni Jehova a Diosmo.” 24  Ngem kinuna ti ari ken Arauna: “Saan, masapul a gatangek kenka. Saanak a mangipaay ken Jehova a Diosko kadagiti daton a mapuoran nga awan a pulos ti bayadak.” Isu a ginatang ni David ti pagirikan ken dagiti baka iti 50 a siklo* a pirak.+ 25  Nangbangon sadiay ni David iti altar+ a para ken Jehova ket nangipaay kadagiti daton a mapuoran ken daton a pakikappia. Impangag ni Jehova ti panagpakpakaasida para iti daga+ ket simmardeng ti pannakadidigra ti Israel.

Footnotes

Wenno “idi nasugsogan ni David.”
Wenno “abagatan.”
Karayan a maaddaan laeng iti danum no panagtutudo.
Wenno “pusona.”
Lit., “karnero.”
Lit., “nasayaat kadagiti matana.”
Lit., “Ited ni Arauna.”
Ti 1 siklo ket 11.4 g. Kitaem ti App. B14.